సిడ్నీ ఉగ్రవాదికి భారత దౌత్యవేత్తలతో సంబంధాలు.. ఫ్యాక్ట్ చెక్ ఎం చెబుతోందంటే?

ఆస్ట్రేలియాలోని సిడ్నీ బీచ్‌లో కాల్పులు జరిపి మారణహోమం సృష్టించిన ఉగ్రవాది సాజిద్ అక్రమ్ ఉదంతం ఇప్పుడు అంతర్జాతీయ దౌత్య వివాదానికి దారితీస్తోంది. ఈ కేసును సాకుగా చూపుతూ సోషల్ మీడియాలో భారత దౌత్యవేత్తలపై జరుగుతున్న తప్పుడు ప్రచారాన్ని కేంద్ర విదేశాంగ శాఖ తీవ్రంగా ఖండించింది. ఫిలిప్పీన్స్‌లోని భారత దౌత్యవేత్తలకు ఉగ్రవాదులతో సంబంధాలు ఉన్నాయని.. అందుకే అక్కడి ప్రభుత్వం వారిపై చర్యలు తీసుకుందంటూ వస్తున్న వార్తల్లో ఏమాత్రం నిజం లేదని స్పష్టం చేసింది.

అసలు వివాదం ఏమిటి?

సిడ్నీ కాల్పుల నిందితుడు 50 ఏళ్ల సాజిద్ అక్రమ్ హైదరాబాద్‌కు చెందిన వ్యక్తిగా దర్యాప్తు సంస్థలు గుర్తించిన సంగతి తెలిసిందే. అతను 27 ఏళ్ల క్రితమే ఆస్ట్రేలియా వెళ్లినప్పటికీ.. ఇప్పటికీ భారతీయ పాస్‌పోర్టుతోనే అక్కడ నివసిస్తున్నాడు. అయితే గత నవంబరులో సాజిద్ తన కుమారుడు నవీద్ అక్రమ్‌తో కలిసి ఫిలిప్పీన్స్‌కు వెళ్లి.. అక్కడ ఐసిస్ శిక్షణ తీసుకున్నట్లు దర్యాప్తులో తేలింది. ఈ నేపథ్యంలోనే నిందితులకు భారత దౌత్యవేత్తలు సహకరించారనే తప్పుడు వార్తలు సోషల్ మీడియాలో వైరల్ అయ్యాయి.

ఈ వ్యవహారంపై భారత విదేశాంగ శాఖ 'ఫ్యాక్ట్ చెక్' విభాగం రంగంలోకి దిగింది. సోషల్ మీడియాలో వైరల్ అవుతున్న పోస్టులు అవాస్తవమని, ప్రజలను తప్పుదోవ పట్టించేలా కొన్ని శక్తులు కుట్ర చేస్తున్నాయని పేర్కొంది. "ఫిలిప్పీన్స్‌లో ఉన్న భారత అధికారులపై ఎటువంటి చర్యలు తీసుకోలేదు. అటువంటి పోస్టులు కుట్రపూరితమైనవి. వాటిని ఎవరూ నమ్మవద్దు" అని విదేశాంగ శాఖ ఎక్స్ వేదికగా స్పష్టం చేసింది. ఇటువంటి సున్నితమైన అంశాలపై తప్పుడు సమాచారాన్ని వ్యాప్తి చేయడం వల్ల రెండు దేశాల మధ్య దౌత్య సంబంధాలు దెబ్బతినే ప్రమాదం ఉందని ఎంఈఏ హెచ్చరించింది.

ముఖ్యంగా అంతర్జాతీయ ఉగ్రవాద ఘటనలతో భారత అధికారులకు ముడిపెడుతూ చేసే ప్రచారం వెనుక విదేశీ శక్తుల ప్రమేయం ఉండవచ్చని అనుమానిస్తున్నారు. సోషల్ మీడియా వినియోగదారులు అధికారిక సమాచారాన్ని మాత్రమే నమ్మాలని, బాధ్యతారహితంగా పోస్టులను షేర్ చేయవద్దని కేంద్రం సూచించింది. ప్రస్తుతం ఆస్ట్రేలియా, భారత దర్యాప్తు సంస్థలు సాజిద్ అక్రమ్ మూలాలు, అతని ఆర్థిక లావాదేవీలు, ఫిలిప్పీన్స్‌లో అతనికి అందిన సహకారంపై లోతైన విచారణ జరుపుతున్నాయి. దౌత్యవేత్తలపై వస్తున్న ఆరోపణలు కేవలం దర్యాప్తును పక్కదారి పట్టించే ప్రయత్నంగానే భావిస్తున్నారు.