ఆ కారణంతో,,,పెళ్లి అయిన 24 గంటల్లోనే డాక్టర్ల జంట విడాకులు

సాధారణంగా పెళ్లి అంటే నూరేళ్ల పంట అంటారు. కానీ ఈ పెళ్లి మాత్రం ఒక్క రోజులోనే పెటాకులు అయింది. మహారాష్ట్రలోని పుణెలో చోటుచేసుకున్న ఈ వింత ఉదంతం ప్రస్తుతం సోషల్ మీడియాలో హాట్ టాపిక్‌గా మారింది. ప్రేమించి పెళ్లి చేసుకున్న ఆ డాక్టర్ దంపతులు.. పెళ్లయిన 24 గంటలు కూడా గడవకముందే విడిపోవాలని నిర్ణయించుకోవడం అందరినీ ఆశ్చర్యపరిచింది. పెళ్లి చేసుకున్న కొన్ని గంటల్లోనే వారి మధ్య ఉద్యోగం విషయంలో.. విభేదాలు తలెత్తడంతో పెళ్లి తంతు ముగిసిన వెంటనే విడాకుల కోసం కోర్టు మెట్లు ఎక్కారు.

మహిళా డాక్టర్ తరపు లాయర్ వెల్లడించిన వివరాల ప్రకారం.. వారిద్దరిదీ ఒక ప్రేమ వివాహం అని.. అయితే పెళ్లి వరకు అంతా సవ్యంగానే ఉన్నప్పటికీ.. పెళ్లి అయిన వెంటనే భర్త తన వృత్తికి సంబంధించిన అసలు విషయాన్ని బయటపెట్టాడు. ఆ వ్యక్తి డాక్టర్ అయినప్పటికీ.. మర్చంట్ నేవీలో పని చేస్తానని.. డ్యూటీ నిమిత్తం ఏ సమయంలోనైనా షిప్‌పై వెళ్లాల్సి ఉంటుందని తెలిపాడు. ఒకసారి వెళ్తే 6 నెలల పాటు ఇంటికి దూరంగా ఉండాల్సి వస్తుందని చెప్పాడు. అది విని అతడి భార్య షాక్ అయింది.

 ఇంత ముఖ్యమైన విషయాన్ని పెళ్లికి ముందే ఎందుకు చెప్పలేదని భర్తను భార్య ప్రశ్నించింది. 6 నెలల పాటు భర్తకు దూరంగా ఉండటం తనకు ఇష్టం లేదని ఆమె ఖరాకండిగా చెప్పేసింది. ఈ విషయంలో ఇద్దరి మధ్య గొడవ పెద్దది కావడంతో.. పెళ్లయిన 24 గంటలకే విడిపోవాలని నిర్ణయించుకున్నారు. మరోవైపు.. ఈ కేసులో విశేషమేమిటంటే.. దంపతుల మధ్య ఎలాంటి హింస లేదా గొడవలు జరగలేదు. కేవలం ఆలోచనా విధానాలు కలవకపోవడం వల్లే విడిపోవాలని నిర్ణయించుకున్నారు.

పెళ్లయిన వెంటనే వారు విడిపోయినప్పటికీ.. చట్టపరంగా విడాకులు రావడానికి 18 నెలల సమయం పట్టింది. తాజాగా పరస్పర అంగీకారంతో కోర్టు వారిద్దరికీ విడాకులు మంజూరు చేసింది. పెళ్లికి ముందే భార్యాభర్తలకు ఒకరి గురించి ఒకరు పూర్తి వివరాలు తెలుసుకోకపోవడం వల్ల ఇలాంటి ఇబ్బందులు ఎదురవుతాయని ఈ ఘటన మరోసారి నిరూపించింది.