రేప్ చేసిన కుమారుడిని రక్షించిన తల్లికి క్లీన్ చిట్, నిందితుడికీ శిక్ష తగ్గింపు

మాతృత్వంలోని అంతులేని మమకారంపై హర్యానా హైకోర్టు కీలక వ్యాఖ్యలు చేసింది. కన్నబిడ్డ ఎంతటి నేరానికి పాల్పడినా.. అతడిని రక్షించుకోవాలనే తల్లి తాపత్రయాన్ని చట్టం నేరంగా పరిగణించలేదని ధర్మాసనం అభిప్రాయపడింది. ఐదేళ్ల పసిబాలికపై అత్యాచారం చేసి, హత్య చేసిన కేసులో నిందితుడి కాపాడుకునేందుకు ప్రయత్నించిన తల్లిని నిర్దోషిగా ప్రకటిస్తూ.. కోర్టు వెతీర్పునిచ్చింది. ప్రస్తుతం ఈ అంశం దేశవ్యాప్తంగా చర్చనీయాంశంగా మారింది.

మరణశిక్ష నుంచి యావజ్జీవానికి..

ఓ ఐదేళ్ల బాలికపై హత్యాచారానికి పాల్పడిన కేసులో కిందిస్థాయి కోర్టు నిందితుడికి గతంలో మరణశిక్ష విధించింది. అయితే ఈ తీర్పును సవాలు చేస్తూ దాఖలైన పిటిషన్‌ను విచారించిన జస్టిస్ అనూప్ చిత్కర, జస్టిస్ సుఖ్విందర్ కౌర్‌లతో కూడిన ధర్మాసనం.. నిందితుడికి విధించిన మరణశిక్షను యావజ్జీవ కఠిన కారాగార శిక్షగా మారుస్తూ ఉత్తర్వులు ఇచ్చింది. నిందితుడి నేరం రుజువు అయినప్పటికీ.. చట్టపరమైన వెసులుబాటును పరిగణనలోకి తీసుకుంటూ కోర్టు ఈ నిర్ణయం తీసుకుంది.

ఈ కేసులో ప్రధాన నిందితుడితో పాటు అతనికి సహకరించి నేరాన్ని దాచడానికి ప్రయత్నించిందన్న ఆరోపణలతో అతని తల్లిపై కూడా కేసు నమోదైంది. అయితే హైకోర్టు ఆమెను నిర్దోషిగా ప్రకటించింది. "తన కుమారుడిని రక్షించుకోవడానికి ప్రయత్నించిన తల్లిని శిక్షించే ప్రత్యేక సెక్షన్ ఏదీ ఐపీసీలో లేదు" అని ధర్మాసనం స్పష్టం చేసింది. కొడుకు చేసే నేరాన్ని పోలీసులకు తెలియజేయకుండా దాచడం నేరమైనప్పటికీ.. అది ఒక తల్లి కోణం నుంచి చూసినప్పుడు తన బిడ్డను కాపాడుకోవాలనే సహజ సిద్ధమైన ప్రవృత్తిగా కోర్టు అభివర్ణించింది.

"నిందితుడు బయటి ప్రపంచానికి ఎంతటి విలన్ లేదా క్రూరుడైనా.. కన్నతల్లికి మాత్రం ఎప్పటికీ 'రాజా బేటా' (మారాజు)యేనని" న్యాయమూర్తులు వ్యాఖ్యానించారు. జరిగిన ఘోరాన్ని అధికారులకు చెప్పకుండా, తన కొడుకును రక్షించడానికే ఆమె ప్రాధాన్యతను ఇచ్చిందని కోర్టు పేర్కొంది. "ఇది సమాజంలో వేళ్లూనుకున్న దారుణమైన ప్రవృత్తి. ముఖ్యంగా మగపిల్లలకు అత్యంత ప్రాధాన్యతనిచ్చే ఈ ప్రాంతపు పితృస్వామ్య భావజాలం, సంస్కృతిలో ఇదొక భాగం" అని ధర్మాసనం తన తీర్పులో విశ్లేషించింది.

నేరస్థుడిని కాపాడే ప్రయత్నం చట్టవిరుద్ధమే అయినా.. అది ఓ తల్లి తన కుమారుడి పట్ల చూపే గుడ్డి ప్రేమ నుంచి ఉద్భవించిందని కోర్టు గుర్తించింది. చట్టానికి, మాతృత్వానికి మధ్య ఉన్న సున్నితమైన సరిహద్దులను స్పృశిస్తూ వచ్చిన ఈ తీర్పు.. న్యాయ వర్గాల్లో ఆసక్తిని రేకెత్తిస్తోంది.