కూటమి పాలనలో రాష్ట్రాన్ని అప్పులమయం చేసారు

లెక్కా జ‌మ లేకుండా ఏడాదిన్న‌ర‌లోనే రూ. 2.80 ల‌క్ష‌ల కోట్లు అప్పులు చేసి ఏపీని సీఎం చంద్ర‌బాబు దివాళా అంచున నిల‌బెట్టాడ‌ని వైయ‌స్ఆర్‌సీపీ అధికార ప్ర‌తినిధి పుత్తా శివ‌శంక‌ర్‌ ఆగ్ర‌హం వ్య‌క్తం చేశారు. తాడేప‌ల్లి లోని పార్టీ కేంద్ర కార్యాల‌యంలో ఆయ‌న మీడియాతో మాట్లాడుతూ కూట‌మి అధికారంలోకి వ‌చ్చాక ఏ ఒక్క సంక్షేమ ప‌థ‌కం అమ‌లు చేయ‌క‌పోయినా, రాష్ట్రంలో అభివృద్ధి ఆనవాళ్లు కూడా క‌నిపించ‌క‌పోయినా అప్పులు మాత్రం రూ. 2.80 ల‌క్ష‌ల కోట్ల‌కు చేరుకున్నాయ‌ని వివ‌రించారు. కూట‌మి ప్ర‌భుత్వం చేస్తున్న అప్పుల‌కు లెక్క‌లుంటే చూపించాల‌ని డిమాండ్ చేశారు. మార్క్‌ఫెడ్ నుంచి రూ. 18 వేల కోట్లు అప్పులు తెచ్చి కూడా మామిడి రైతుల‌కు మ‌ద్ధ‌తు ధ‌ర కింద చెల్లించాల్సిన రూ. 260 కోట్లు కూడా ఇవ్వ‌లేద‌ని వివ‌రించారు. చంద్ర‌బాబు అప్పుల ద్వారా తెస్తున్న డ‌బ్బంతా ఆయన బినామీల జేబుల్లోకే చేరుతోంద‌ని, అప్పులు తెచ్చిన డ‌బ్బుతో చంద్ర‌బాబు, ప‌వ‌న్ క‌ళ్యాణ్‌, లోకేష్‌లు ప్ర‌త్యేక విమానాల్లో తిరుగుతూ జ‌ల్సాలు చేస్తున్నార‌ని ఆగ్ర‌హం వ్య‌క్తం చేశారు. మాజీ సీఎం వైయ‌స్ జ‌గ‌న్ గారు త‌న ఐదేళ్ల పాల‌న‌లో రెండేళ్లు కరోనా సంక్షోభాన్ని ఎదుర్కొంటూ కూడా కేవ‌లం రూ. 3.72 ల‌క్ష‌ల కోట్లు అప్పులు చేశార‌ని, అందులోనూ రూ. 2.73 ల‌క్ష‌ల కోట్లు డీబీటీ ద్వారా నేరుగా ల‌బ్ధిదారుల ఖాతాల్లో జ‌మ చేశార‌ని వెల్ల‌డించారు. కానీ కూట‌మి ప్ర‌భుత్వం ఏడాదిన్న‌ర‌లోనే 2.80 ల‌క్ష‌ల కోట్లు అప్పులు చేసినా ఏ ఒక్క దానికీ బాధ్య‌త‌గా లెక్క‌లు చూపించ‌డం లేద‌ని చెప్పారు. పోర్టులు, మెడిక‌ల్ కాలేజీలు, ఇళ్ల స్థ‌లాల పంపిణీ, గ్రామ స‌చివాల‌యాలు, ఆర్బీకేలు వంటి వాటి ద్వారా వైయ‌స్ జ‌గ‌న్ గారు సృష్టించిన సంప‌ద‌ను కూట‌మి నాయ‌కులు దోచుకుతింటున్నార‌ని పుత్తా శివ‌శంక‌ర్‌ మండిప‌డ్డారు.