డ్రాకు కొద్ది నిమిషాల ముందు లాటరీ కొన్నాడు.. రూ.25 లక్షలు గెలిచాడు

అదృష్టం ఎప్పుడు, ఎవరిని, ఎ రూపంలో వరిస్తుందో ఎవరూ ఊహించలేరు. పంజాబ్‌లోని రూప్‌నగర్ (జిల్లాలో సరిగ్గా ఇదే జరిగింది. 2026 కొత్త ఏడాది వేళ ఒక వ్యక్తిని అదృష్టం వరించిన తీరు చూస్తే ఎవరైనా ఆశ్చర్య పోవాల్సిందే. కేవలం రూ. 1,000 పెట్టి కొన్న లాటరీ టికెట్.. ఆ వ్యక్తిని నిమిషాల వ్యవధిలోనే లక్షాధికారిని చేసింది. డ్రా తీయడానికి కేవలం 45 నిమిషాల ముందు కొన్న టికెట్‌కే మొదటి బహుమతి వరించడం ఇప్పుడు రాష్ట్రవ్యాప్తంగా చర్చనీయాంశమైంది.

చివరి టికెట్‌తో చక్కటి అదృష్టం

స్థానిక 'అశోక లాటరీ' దుకాణంలో కొత్త ఏడాది బంపర్ డ్రా కోసం విక్రయించిన 'గోల్డెన్ లాటరీ' టికెట్లలో ఒక వ్యక్తి రూ. వెయ్యి వెచ్చించి ఒక టికెట్ కొనుగోలు చేశారు. విశేషం ఏమిటంటే.. ఆ టికెట్ అమ్ముడైన సరిగ్గా 45 నిమిషాలకే లక్కీ డ్రా నిర్వహించారు. అశోక లాటరీ బృందం వెల్లడించిన వివరాల ప్రకారం.. అది ఆ దుకాణంలో మిగిలి ఉన్న చివరి టికెట్లలో ఒకటి. ఫలితాలు ప్రకటించగానే.. ఆ వ్యక్తి కొన్న టికెట్‌కే మొదటి బహుమతి కింద రూ. 25 లక్షలు దక్కినట్లు తేలింది.

అనూహ్యంగా ఇంత పెద్ద మొత్తంలో నగదు గెలుచుకోవడంతో సదరు విజేత ఆనందానికి అవధులు లేకుండా పోయాయి. అయితే తన వ్యక్తిగత కారణాల దృష్ట్యా మీడియా ముందుకు రావడానికి లేదా కెమెరాలకు ముఖం చూపించడానికి ఆయన నిరాకరించారు. తన వివరాలను పూర్తిగా గోప్యంగా ఉంచాలని అశోక లాటరీ నిర్వాహకులను కోరారు. అయినప్పటికీ ఈ గెలుపుకు సంబంధించిన అన్ని అధికారిక పత్రాలు, ధృవీకరణ పత్రాలు సిద్ధంగా ఉన్నాయని నిర్వాహకులు స్పష్టం చేశారు. ప్రస్తుతం ఆ విజేత తన కుటుంబ సభ్యులతో కలిసి ఈ సంబురాల్లో మునిగిపోయారు.

నమ్మకానికి మారుపేరుగా 'అశోక లాటరీ'

ఈ సందర్భంగా అశోక లాటరీ బృందం నగర ప్రజలకు నూతన సంవత్సర శుభాకాంక్షలు తెలిపింది. గత ఏడాది కూడా తమ అవుట్‌లెట్ నుంచే ఒక పెద్ద బహుమతి లభించిందని.. ఇప్పుడు మళ్లీ రూ. 25 లక్షల జాక్‌పాట్ తగలడం తమకు గర్వకారణంగా ఉందని వారు పేర్కొన్నారు. రోపర్ జిల్లాలో తమది అత్యంత నమ్మకమైన ప్రభుత్వ గుర్తింపు పొందిన లాటరీ కేంద్రమని, భవిష్యత్తులో కూడా తమ కస్టమర్లను ఇలాంటి మరెన్నో ఆకర్షణీయమైన బహుమతులు వరిస్తాయని వారు ఆశాభావం వ్యక్తం చేశారు. కేవలం వెయ్యి రూపాయల పెట్టుబడితో.. అదీ చివరి నిమిషంలో తీసుకున్న నిర్ణయం ఒక సామాన్యుడి జీవితంలో కొత్త వెలుగులు నింపడం పట్ల స్థానికులు హర్షం వ్యక్తం చేస్తున్నారు.