చిత్తు కాగితంలా అంతర్జాతీయ చట్టాలు.. తుంగలో తొక్కుతున్న అమెరికా

ఐక్య రాజ్య సమితి (ఐరాస) చార్టర్ ఆర్టికల్ 2(4) ప్రకారం రాజకీయ సాత్వంత్ర్యం, ఒక ప్రాంతంపై సార్వభౌమత్వం ఉన్న ఏ దేశంపై.. మరో దేశం దాడి చేయకూడదు. ఒకవేళ ఇతరవైపు నుంచి సాయుధ దాడులు జరిగితే, ప్రపంచ శాంతి కోసం ఐరాస భద్రతా మండలి ఒక దాడికి అనుమతి ఇస్తే తప్ప.. మరో దేశంపై దాడి చేయడానికి వీలు లేదు. వెనుజులా నుంచి సాయుధ దాడి లేకున్నా (సెల్ఫ్ డిఫెన్స్ ఆర్టికల్ 51), ఐరాస అనుమతి ఇవ్వకున్నా.. అమెరికా ఏకపక్షంగా వెనుజులాపై దాడికి దిగింది. ఇది ముమ్మాటికీ చట్టాన్ని తుంగలో తొక్కడమే అని చాలా మంది అంతర్జాతీయ న్యాయవాదులు అభిప్రాయపడుతున్నారు. వెనుజులా అధ్యక్షుడు నికోలస్ మదురో నార్కో టెర్రరిజం నాయకుడని.. తన చర్యను అమెరికా సమర్థించుకుంటోంది. అయితే ఈ అభియోగాలపై మదురోపై చర్యలు తీసుకోవాలనుకున్నా.. ఆ దేశ అనుమతి తప్పనిసరి. కేవలం భుజబలం ఉందన్న గర్వంతో.. చట్టాలను లెక్కచేయకుండా ఇష్టారాజ్యంగా అమెరికా వ్యవహరించిందని నిపుణులు ఆరోపిస్తున్నారు.

అమెరికాను ఏం చేయలేమా..?

అమెరికా ఒక దేశ ప్రభుత్వాన్ని ఏకపక్షంగా కూలగొట్టడం ముమ్మాటికీ నేరమే అని అంతర్జాతీయ సంబంధాల నిపుణులు, విద్యావేత్తలు బల్లగుద్ది చెబుతున్నారు. అయితే ఒక సెషన్స్ కోర్టులో నేరస్థుడికి శిక్ష విధించినట్లు.. అమెరికా చేసిన తప్పుకు కూడా శిక్ష విధించగలమా? అంటే అస్సలు అలా చేయలేం. ఐరాస భద్రతా మండలిలో అమెరికాకు వీటో పవర్ ఉంది. ఇక అమెరికా ఆర్థికంగా, సైనికపరంగా ఎంత శక్తిమంతమైనదో అందరికీ తెలిసిందే.

అమెరికా చర్యను దురాక్రమణగా గుర్తిస్తూ.. ఆ దేశానికి వ్యతిరేకంగా ఐరాస అత్యవసర సమావేశం ఏర్పాటు చేసి.. తీర్మానం ప్రవేశపెట్టాలని చాలా దేశాలు డిమాండ్ చేస్తున్నాయి. కానీ వీటో పవర్‌తో ఉన్న అమెరికాపై ఇలాంటి తీర్మానం తీసుకురావడం అంత తేలిక కాదు. అంతేకాకండా అమెరికాపై ఐరాస ఆంక్షలను అమలు చేయడం రాజకీయంగా అసాధ్యం. ఇక ఇంటర్నేషనల్‌ కోర్టులో అమెరికాకు వ్యతిరేకంగా కేసు వేస్తామంటే.. అందుకు జురిడిక్షన్ అనుమతి కావాలి. అంటే దానికి అమెరికా ఒప్పుకోవాలి. అది జరగని పని.

ఇలా చేయొచ్చు..

ఐరాస అత్యవసర సమావేశాలు నిర్వహించి ఇతర దేశాలు.. అమెరికా దురాక్రమణను ఖండించొచ్చు. అంతేకాకుండా వెనుజులా నుంచి అమెరికా బలగాలు వెనక్కి వెళ్లాలని, ఆ దేశ సార్వభౌమత్వాన్ని పునరుద్ధరించాలని సాధారణ తీర్మానాలు చేసుకోవచ్చు. ఇక వివిధ దేశాలు వ్యక్తిగతంగా అమెరికా తీరును ఖండించొచ్చు. తమ సొంత ఆంక్షలను అమెరికాపై విధించొచ్చు. రాయబారులను వెనక్కి పిలిపించవచ్చు. అంతేకాకుండా అమెరికా ఆక్రమించిన కొత్త ప్రాంతాన్ని గుర్తించకుండా ఉండిపోవచ్చు. అమెరికా తీరుకు నిరసనగా ఏ దేశమైన.. యూఎస్‌తో తెగదెంపులు చేసుకోవచ్చు. అంతేగానీ అమెరికాను బోనులో నిలబెట్టి నిలదీయలేమని నిపుణులు అంటున్నారు.

కాగా, ప్రస్తుతం ఉన్న అంతర్జాతీయ చట్టాలు, వ్యవస్థలు.. ఒక నేరస్థుడికి శిక్ష విధించినట్లు అమెరికా వంటి సూపర్ పవర్‌కు శిక్ష విధించలేవు. కేవలం అమెరికా తీరును దురాక్రమణగా ఖండిస్తాయి అంతే. ఇలా చేస్తే అమెరికాకు వచ్చే నష్టం ఏం ఉండదు. కానీ భవిష్యత్తులో అమెరికాపై వివిధ దేశాలకు నమ్మకం పోయే అవకాశం ఉంది. అమెరికాకు వ్యతిరేకంగా బ్రిక్స్ వంటి కొత్త కూటములు పుట్టొచ్చు, ఇప్పటికే ఉన్నవి బలపడొచ్చు. అందుకే ఐరాస భద్రతా మండలిలో వీటో పవర్ కలిగిన అమెరికా.. వెరేవాళ్లకు నీతులు వల్లెవేస్తోందని.. అంతర్జాతీయ చట్టాలను చిత్తుకాగితంలా పరిగణించి తుంగలో తొక్కేస్తోందని విదేశీ వ్యవహారాల నిపుణులు అభిప్రాయపడుతున్నారు.