ఆస్తి తగాదాలైనా, కుటుంబ గొడవలైనా.. పరిష్కారం మీ వాట్సాప్‌లోనే

సామాన్య మధ్య తరగతి పౌరులకు చట్టపరమైన సేవలను మరింత చేరువ చేస్తూ కేంద్ర న్యాయ మంత్రిత్వ శాఖ విప్లవాత్మక నిర్ణయం తీసుకుంది. దేశవ్యాప్తంగా ప్రతి ఒక్కరికీ ఉచితంగా న్యాయ సలహాలు అందించేందుకు 'న్యాయ సేతు' పేరుతో వాట్సాప్ చాట్‌బాట్‌ను అందుబాటులోకి తెచ్చింది. న్యాయాన్ని మరింత సులభంగా, అందరికీ అందించే దిశగా వేసిన ఈ అడుగుతో.. ఇకపై న్యాయ సహాయం కేవలం ఒక్క మెసేజ్ దూరంలోనే ఉండనుంది.

ఏయే సమస్యలకు పరిష్కారం లభిస్తుంది?

ఈ ఏఐ ఆధారిత చాట్‌బాట్ ద్వారా పౌరులు వివిధ చట్టపరమైన అంశాలపై ప్రాథమిక సమాచారం, సలహాలు పొందవచ్చు. ముఖ్యంగా వివాహ సంబంధిత సమస్యలు, విడాకులు, ఆస్తి తగాదాలకు సంబంధించిన వివరాలను తెలుసుకోవచ్చు. అలాగే గృహ హింస బాధితులకు అవసరమైన న్యాయ మార్గదర్శకత్వం కూడా లభిస్తుంది. భూవివాదాలు, నేర చట్టాలకు సంబంధించిన ప్రాథమిక సమాచారం కూడా దీని ద్వారా అందుబాటులో ఉండనుంది. అంతేకాకుండా వాణిజ్య వివాదాలు, రక్షణ రంగానికి చెందిన చట్టపరమైన సందేహాలను కూడా దీని ద్వారా నివృత్తి చేసుకోవచ్చు.

ఈ సేవలను వినియోగించుకోవడం చాలా సులభం. ముందుగా మీ మొబైల్‌లో "7217711814" అనే నంబర్‌ను సేవ్ చేసుకోండి. వాట్సాప్ ఓపెన్ చేసి ఈ నంబర్‌కు 'Hi' అని మెసేజ్ పంపండి. (ఇది 'Tele-Law' పేరుతో కనిపిస్తుంది). మీ మొబైల్ నంబర్‌ను వెరిఫై చేసుకున్న తర్వాత.. చాట్‌బాట్ మీకు అవసరమైన ఆప్షన్లను చూపిస్తుంది. అయితే స్మార్ట్ నావిగేషన్ సాయంతో మీకు కావాల్సిన సమాచారాన్ని వేగంగా పొందవచ్చు.

ప్రభుత్వం ఈ సేవలను గొప్పగా ప్రారంభించినప్పటికీ.. క్షేత్రస్థాయిలో కొన్ని సాంకేతిక సమస్యలు ఎదురవుతున్నట్లు వినియోగదారులు ఫిర్యాదు చేస్తున్నారు. చాట్‌బాట్ అప్పుడప్పుడు 'బిల్డ్ ఎర్రర్' అని చూపిస్తోందని సోషల్ మీడియా వేదికగా నెటిజన్లు అసహనం వ్యక్తం చేస్తున్నారు. మరికొందరు మెటా యాజమాన్యంలోని వాట్సాప్‌కు బదులుగా భారత్ స్వదేశీ ప్లాట్‌ఫామ్ అరట్టైని ఎందుకు వాడలేదని ప్రశ్నిస్తున్నారు.

న్యాయ సేతు ప్రారంభంతో పాటు వాట్సాప్ తన వినియోగదారుల కోసం సరికొత్త అప్‌డేట్‌లను (వెర్షన్ 2.26.1.18) కూడా తెచ్చింది. ఇకపై యూజర్లు థర్డ్ పార్టీ యాప్‌ల అవసరం లేకుండానే వాట్సాప్‌లోనే సొంతంగా టెక్స్ట్ స్టిక్కర్లను తయారు చేసుకోవచ్చు. ప్రస్తుతం ఇది బీటా టెస్టర్లకు మాత్రమే అందుబాటులో ఉండగా.. త్వరలోనే అందరికీ అందుబాటులోకి రానుంది. మొత్తానికి కోర్టుల చుట్టూ తిరగలేని పేదలకు, సామాన్యులకు 'న్యాయ సేతు' ఒక డిజిటల్ వారధిగా నిలుస్తుందని ప్రభుత్వం భావిస్తోంది. సాంకేతిక లోపాలను సరిదిద్దితే.. ఇది దేశంలోనే అతిపెద్ద లీగల్ హెల్ప్ డెస్క్‌గా అవతరించే అవకాశం ఉంది.