దమ్ముంటే నన్ను పట్టుకోండి.. ట్రంప్‌నకు కొలంబియా అధ్యక్షుడు సవాల్

వెనుజులాలో అమెరికా ఆపరేషన్ చేపట్టి.. అధ్యక్షుడు నికోలస్ మదురోను బందీగా తీసుకుంది. ఆపరేషన్ అనంతరం మెక్సికో, కొలంబియా వంటి లాటిన్ అమెరికా దేశాలకు డొనాల్డ్ ట్రంప్ వార్నింగ్ ఇచ్చారు. ఈ క్రమంలో కొలంబియా అధ్యక్షుడు గుస్తావో పెట్రో... ట్రంప్‌నకు సవాల్ విసిరారు. అమెరికా ఆపరేషన్‌ను తీవ్రంగా ఖండించిన పెట్రో.. “నన్ను పట్టుకోవాలంటే రండి.. నేను మీకోసం ఇక్కడే ఎదురు చూస్తున్నాను” అని వ్యాఖ్యానించారు.

‘అమెరికా బాంబులు వేస్తే గ్రామీణ రైతులు (కాంపెసినోలు) పర్వతాల్లో వేల సంఖ్యలో గెరిల్లాలుగా మారతారు.. అలాగే దేశంలో ఎక్కువ మంది ప్రేమించి గౌరవించే అధ్యక్షుడ్ని నిర్బంధిస్తే వారు ‘జాగ్వార్’ను వదిలిపెడతారు’ అని ఆయన హెచ్చరించారు. ఒకప్పుడు వామపక్ష గెరిల్లా నాయకుడిగా ఉన్న పెట్రో.. 1990లలో ఆయుధాలు వీడి ప్రధాన రాజకీయాల్లోకి వచ్చారు. “మళ్లీ ఆయుధాన్ని తాకనని నేను ప్రమాణం చేశాను… కానీ మాతృభూమి కోసం అవసరమైతే మళ్లీ ఆయుధం పట్టుకుంటాను’ అని కూడా అన్నారు.

వెనుజులాపై దాడి అనంతరం ఉద్రిక్తతలు తీవ్రస్థాయికి చేరుకున్నాయి. ట్రంప్ మీడియాతో మాట్లాడుతూ.. కొలంబియాను అమెరికాకు డ్రగ్స్ విక్రయించే వ్యక్తి పాలిస్తున్నాడని ఆరోపించారు. ‘కొలంబియా కూడా తీవ్రమైన అనారోగ్యంలో ఉంది. కోకైన్ తయారు చేసి అమెరికాకు అమ్మడం ఇష్టపడే ఒక రోగిష్ఠి అక్కడ పాలిస్తున్నాడు.. కానీ, ఎక్కువకాలం అతడు పాలించలేడు’ అని ట్రంప్ వ్యాఖ్యానించారు. అలాగే, కొలంబియాపై ఆపరేషన్ చేపట్టడం కూడా సమంజసం అనిపిస్తోంది అని అన్నారు.

కాగా, వెనుజులాపై దాడి, మదురో అరెస్ట్‌ల విషయంలో కొలంబియా స్పందిస్తూ విదేశాంగ శాఖ విడుదల చేసిన ప్రకటనలో ‘తమ దేశం సంభాషణ, సహకారం, పరస్పర గౌరవం ఆధారంగా అంతర్జాతీయ సంబంధాలను కొనసాగిస్తుంది’ అని స్పష్టం చేసింది. అయితే, దేశాల మధ్య సంబంధాల విషయంలో బెదిరింపులు లేదా బలప్రయోగాలు ఆమోదయోగ్యం కాదని పేర్కొంది.

డ్రగ్స్ అక్రమ రవాణాతో సంబంధాలున్నాయనే ఆరోపణలపై పెట్రోతో పాటు ఆయన కుటుంబ సభ్యులపై గతేడాది అక్టోబరులో ట్రంప్ ఆంక్షలు విధించారు. కోకైన్ ఉత్పత్తిలో కొలంబియా ప్రపంచంలోనే అగ్రస్థానంలో ఉంది. కోకా మొక్క ప్రధానంగా పెరూ, బొలీవియా, కొలంబియా ఈ మూడు లాటిన్ అమెరికా దేశాల్లో సాగు చేస్తారు.

అయితే, పెట్రో మాదిరిగా నికోలస్ మదురో ట్రంప్‌కి సవాల్ విసిరారు. తనపై అమెరికా రివార్డు పెంచిన తర్వాత ‘మిరాఫ్లోరెస్‌లోనే నేను ఎదురు చూస్తాను. ఆలస్యం చేయొద్దు, పిరికివాడా’ అంటూ ఆయన ఆవేశపూరిత ప్రసంగం చేశారు. అమెరికా సైనిక చర్య తర్వాత ఆదివారం వైట్‌హౌస్ మదురోను ఎద్దేవా చేస్తూ ఎక్స్ (ట్విట్టర్)‌లో వీడియోను విడుదల చేసింది. అందులో మదురో అమెరికాను సవాలు చేసిన దృశ్యాలు, అలాగే మదురో, ఆయన భార్య సిలియా ఫ్లోరెస్‌ను పట్టుకునేందుకు నిర్వహించిన దాడి ఫుటేజ్‌ అందులో ఉన్నాయి.

61 సెకన్ల నిడివి ఉన్న ఈ వీడియోలో వెనుజులాపై దాడుల అనంతరం ట్రంప్ నిర్వహించిన మీడియా సమావేశం దృశ్యాలు కూడా ఉన్నాయి. ఆ సందర్భంగా అమెరికా రక్షణ మంత్రి పీట్ హెగ్సెత్ మాట్లాడుతూ... మదురోకు అవకాశం ఇచ్చాము కానీ ఇక లేదు అని వ్యాఖ్యానించారు. వెనుజులాపై దాడికి అమెరికా సుదీర్ఘ ప్రణాళికతో వ్యవహరించింది. అమెరికా బలగాలు కారకాస్‌‌పై వైమానిక దాడులు చేపట్టి, మదురో, ఆయన భార్యను అరెస్ట్ చేశారు.