2010లో నోకియా ఫోన్లు ఆర్డర్ చేస్తే ... 16 ఏళ్లు ఆలస్యంగా డెలివరీ

ఒకప్పుడు నోకియా ఫోన్లు అంటే పెద్ద బ్రాండ్. ఎవరి చేతిలో చూసినా ఎక్కువగా నోకియా కీప్యాడ్ ఫోన్లు కనిపించేవి. సెల్‌ఫోన్లు వచ్చిన కొత్తల్లో నోకియా బ్రాండ్‌కు చెందిన మోడళ్లు మార్కెట్‌లో హాట్ కేకుల్లో అమ్ముడుపోయేవి. పల్లె నుంచి పట్నం వరకు అంతా నోకియా ఫోన్లు వాడేవారు. దీంతో అప్పట్లో నోకియా ఫోన్లకు ఉన్న క్రేజే వేరు. అయితే 2010లో నోకియా ఫోన్లను ఆర్డర్ చేసిన ఓ వ్యాపారి.. 16 ఏళ్ల సుదీర్ఘ నిరీక్షణ తర్వాత.. ఇప్పుడు వాటిని పొందారు. ఆ ఫోన్ల ప్యాకింగ్‌లను ఆ వ్యాపారి ఓపెన్ చేస్తున్న వీడియో నెట్టింట వైరల్ కావడంతో.. నెటిజన్లు కామెంట్ల వర్షం కురిపిస్తున్నారు. ఈ సంఘటన లిబియాలో జరిగింది.

లిబియాలో అంతర్యుద్ధం కారణంగా 16 ఏళ్ల పాటు నిలిచిపోయిన నోకియా ఫోన్ల షిప్‌మెంట్ ఎట్టకేలకు రాజధాని ట్రిపోలీలో ఆ వ్యాపారికి చేరింది. 2010లో ఆర్డర్ చేసిన ఆ ఫోన్ల బాక్సులను ఓపెన్ చేస్తూ ఆ వ్యాపారి ఆశ్చర్యపోయిన వీడియో వైరల్ అవుతోంది. లిబియాలో సుదీర్ఘకాలం కొనసాగిన అంతర్యుద్ధం, రాజకీయ అస్థిరత కారణంగా నిలిచిపోయిన ఈ నోకియా ఫోన్ల బాక్సులు ఇప్పుడు బయటికి వచ్చాయి.

వైరల్ అవుతున్న ఆ వీడియోలో ఆ వ్యాపారి తన ఫ్రెండ్స్‌తో కలిసి ఆ పాత ఫోన్ బాక్సులను ఓపెన్ చేస్తున్నట్లు ఉంది. ఆ కాలంలో అత్యంత పాపులర్ అయిన నోకియా కీప్యాడ్ ఫోన్లు, మ్యూజిక్ ఎడిషన్ మోడల్స్, అప్పట్లో ధనవంతులు వాడే కమ్యూనికేటర్ హ్యాండ్‌సెట్‌లను చూసి వారు నవ్వు ఆపుకోలేకపోయారు. వీటిని ఫోన్లు అంటారా లేక పురాతన కళాఖండాలా అంటూ ఆ వ్యాపారి జోక్ చేస్తూ ఆశ్చర్యపోయారు.

అయితే ఆ నోకియా ఫోన్లను పంపించిన వ్యక్తి.. వాటిని అందుకునే వ్యాపారి ఇద్దరూ లిబియా రాజధాని ట్రిపోలీలోనే ఉండటం గమనార్హం. కేవలం కొన్ని కిలోమీటర్ల దూరంలోనే వారు నివసిస్తుండగా.. అక్కడి నుంచి ఇక్కడి వరకు రావడానికి ఏకంగా 16 ఏళ్ల టైమ్ పట్టింది. లిబియాలో యుద్ధం కారణంగా ఈ సెల్‌ఫోన్ల షిప్‌మెంట్ వేర్‌హౌస్‌లలోనే ఉండిపోయింది.

 ఈ ఫోన్ల బాక్సులను చూస్తూ ఆ వ్యాపారి ఫ్రెండ్ ఒక ఆసక్తికరమైన కామెంట్ చేశారు. 16 ఏళ్ల క్రితం ఈ ఫోన్ల విలువతో ఒక పెద్ద ఇల్లు కొనేవాళ్లమని.. కానీ ఇప్పుడు వీటికి ఎలాంటి విలువ లేదని వాపోయారు. టెక్నాలజీ ఎంత వేగంగా మారుతుందో చెప్పడానికి ఈ ఘటనే నిదర్శనమని పేర్కొన్నారు.

ఈ వీడియో నెట్టింట వైరల్ కావడంతో నెటిజన్లు రకరకాలుగా స్పందిస్తున్నారు. యుద్ధం సామాన్యుల జీవితాలను, వ్యాపారాలను ఎలా అతలాకుతలం చేస్తుందో చెప్పడానికి ఇదొక చేదు జ్ఞాపకం అని కొందరు నెటిజన్లు కామెంట్ చేశారు. మరికొందరు మాత్రం.. ఇప్పుడు ఈ పాత నోకియా మోడల్స్ వింటేజ్ కేటగిరీ కిందకు వస్తాయని.. పాత వస్తువులను సేకరించే వారికి వీటిని విక్రయిస్తే అప్పట్లో ఉన్న ధర కంటే ఎక్కువ లాభం వచ్చే అవకాశం ఉందని సలహాలు ఇస్తున్నారు.