బాక్స్‌లో నుంచి బయటకు వచ్చిన రోకో,,,,వడోదరాలో విరాట్ కోహ్లి-రోహిత్ శర్మకు వినూత్న సన్మానం

భారత క్రికెట్ దిగ్గజాలు విరాట్ కోహ్లి , రోహిత్ శర్మలకు వడోదరాలో వినూత్న రీతిలో సన్మానం జరిగింది. భారత్ – న్యూజిలాండ్ తొలి వన్డే సందర్భంగా బరోడా క్రికెట్ అసోసియేషన్ (బీసీఏ) ఈ ఇద్దరు స్టార్‌లను గౌరవించింది. అయితే ఆ సన్మానం జరిగిన విధానం ఇప్పుడు సోషల్ మీడియాలో వైరల్ అవుతోంది.

వడోదరాలోని కోటాంబి స్టేడియంలో తొలి పురుషుల వన్డే మ్యాచ్ జరగడంతో, మిడ్ ఇన్నింగ్స్ విరామ సమయంలో కోహ్లి – రోహిత్‌కు పూల బొకేలు అందజేశారు. కానీ ఇక్కడే అసలు ట్విస్ట్ ఉంది! ఐసీసీ చైర్మన్ జై షా, బీసీసీఐ అధికారి మిథున్ మాన్హాస్ సమక్షంలో బీసీఏ ఒక పెద్ద కబోర్డ్ ఏర్పాటు చేసింది. అందులో కోహ్లి, రోహిత్‌ల లైఫ్ సైజ్ స్టిక్కర్లు అతికించి, ఇద్దరినీ ఆ కబోర్డ్‌లోకి తీసుకెళ్లి పేర్లు ప్రకటించగానే బయటకు తీసుకొచ్చారు.

దీంతో ఫ్యాన్స్ ఒక్కసారిగా నవ్వుల్లో మునిగిపోయారు. కోహ్లి–రోహిత్ అన్‌బాక్సింగ్ సెర్మనీ అంటూ సోషల్ మీడియాలో మీమ్స్ వరదలా వచ్చాయి. ఈ వినూత్న సన్మానాన్ని చూసి కోహ్లి, రోహిత్ కూడా నవ్వు ఆపుకోలేకపోయారు. బయటకు వచ్చిన తర్వాత తమ ఫోటోలపై సంతకాలు చేసి అభిమానులను ఆకట్టుకున్నారు. కోటాంబి స్టేడియంలో ఇదే తొలి అంతర్జాతీయ వన్డే కావడంతో, దాదాపు 35 వేల మంది అభిమానులు స్టేడియాన్ని నింపేశారు. కెరీర్ చివరి దశలో ఉన్న కోహ్లి–రోహిత్‌లకు ఇది ప్రత్యేక ఘనతగా మారింది. గత దశాబ్దంన్నర కాలంలో వన్డే క్రికెట్‌ను కొత్త నిర్వచనంతో మలిచిన ఈ ఇద్దరు లెజెండ్స్‌కు ప్రత్యేకంగా గౌరవం చూపించాలన్నదే నిర్వాహకుల ఆలోచనగా తెలుస్తోంది.

ఇక మ్యాచ్ విషయానికి వస్తే టాస్ గెలిచిన శుభమన్ గిల్ బౌలింగ్ ఎంచుకోవడంతో న్యూజిలాండ్ బ్యాటింగ్‌కి వచ్చింది. ఓపెనర్లు కాన్వే, నికోలస్ అద్భుత ఆరంభం ఇవ్వడం.. మధ్య ఓవర్లలో డారెల్ మిచెల్ స్కోర్ బోర్డును పరుగులు పెట్టించడంతో కివీస్ 50 ఓవర్లలో 8 వికెట్ల నష్టానికి 300 పరుగులు చేసింది. డారెల్ మిచెల్ 84 పరుగులు చేయగా.. కాన్వే 56, నికోలస్ 62 పరుగులు చేశారు. టీమిండియా పేసర్లు సిరాజ్, ప్రసిద్ధ్, హర్షిత్ తలో రెండు వికెట్లు తీశారు.