ఇండోర్‌లో శతక్కొట్టిన మిచెల్, ఫిలిప్స్.. భారత్‌కు భారీ టార్గెట్

భారత్ - న్యూజిలాండ్ మధ్య జరుగుతున్న మూడో వన్డేలో కివీస్ పరుగుల వరద పారించింది. ఇండోర్ వేదికగా జరుగుతున్న ఈ మ్యాచ్‌లో భారత బౌలర్లు తొలుత ఆధిపత్యం ప్రదర్శించినా.. డారెల్ మిచెల్ డామినేషన్‌తో న్యూజిలాండ్ భారీ స్కోర్ సాధించింది. సిరీస్ డిసైడర్ అయిన ఈ మ్యాచ్‌లో మిచెల్‌తో పాటు గ్లెన్ ఫిలిప్స్ సెంచరీల మోత మోగించారు. దాంతో న్యూజిలాండ్ జట్టు 337 పరుగులు చేసింది.

టాస్ గెలిచిన టీమిండియా బౌలింగ్ ఎంచుకుని న్యూజిలాండ్‌ను బ్యాటింగ్‌కి ఆహ్వానించింది. అర్ష్‌దీప్ సింగ్, హర్షిత్ రాణా బ్యాక్ టు బ్యాక్ వికెట్లతో న్యూజిలాండ్ ఓపెనర్లను పెవిలియన్‌కు పంపారు. దాంతో కివీస్ కేవలం ఐదు పరుగులకే రెండు వికెట్లు కోల్పోయింది. రెండో వన్డేలో న్యూజిలాండ్ విజయంలో కీలకంగా మారిన మిచెల్ - విల్ యంగ్ కలిసి మరో వికెట్ పడకుండా కాపాడారు. ఈ ఇద్దరూ మూడో వికెట్‌కు 53 పరుగుల భాగస్వామ్యం అందించారు.

విల్ యంగ్ 30 పరుగులు చేసి అవుటవ్వగా.. ఆ తర్వాత మిచెల్ - ఫిలిప్స్ కలిసి భారీ భాగస్వామ్యం అందించారు. ఈ క్రమంలోనే ఈ ఇద్దరూ సెంచరీలు కూడా పూర్తి చేసుకున్నారు. ఫిలిప్స్ - మిచెల్ కలిసి 186 బంతుల్లో 219 పరుగుల భాగస్వామ్యం నెలకొల్పారు. గ్లెన్ ఫిలిప్స్ 88 బంతుల్లో 9 ఫోర్లు, మూడు సిక్సర్లతో 106 పరుగులు చేసి అవుటయ్యాడు.

రాజ్‌కోట్ వన్డేలో సెంచరీ చేసి మ్యాచ్‌ని గెలిపించిన డారెల్ మిచెల్ ఇండోర్‌లో కూడా శతకం బాదాడు. ఒకానొక దశలో 150 పరుగుల మార్క్‌ను అందుకుంటాడని అందరూ అనుకున్నా మొహమ్మద్ సిరాజ్ బౌలింగ్‌లో భారీ షాట్‌కి ప్రయత్నించి క్యాచ్ రూపంలో అవుటయ్యాడు. 131 బంతులు ఆడిన మిచెల్ 15 ఫోర్లు, 3 సిక్సర్లతో 137 పరుగులు చేసి అవుటయ్యాడు.

ఫిలిప్స్ అవుటైన తర్వాత వెంటవెంటనే న్యూజిలాండ్ మూడు వికెట్లు కోల్పోయింది. 277 పరుగుల వద్ద ఫిలిప్స్ అవుటవ్వగా, మిచెల్ 283 పరుగుల వద్ద, మిచెల్ హే 286 పరుగుల వద్ద వెంటవెంటనే వికెట్లు కోల్పోయారు. దాంతో కేవలం 9 పరుగుల వ్యవధిలోనే న్యూజిలాండ్ మూడు కీలక వికెట్లు పోగొట్టుకుంది. ఆఖర్లో కివీస్ కెప్టెన్ మైకేల్ బ్రేస్‌వెల్ బౌండరీలు బాది 18 బంతుల్లో 28 పరుగులు చేయడంతో న్యూజిలాండ్ 8 వికెట్ల నష్టానికి 337 రన్స్ చేయగలిగింది. టీమిండియా బౌలర్లలో అర్ష్‌దీప్ సింగ్, హర్షిత్ రాణా చెరో మూడు వికెట్లు తీసుకోగా.. సిరాజ్, కుల్దీప్ యాదవ్‌కు చెరో వికెట్ దక్కింది.