దక్షిణ భారతదేశంలోనే తొలిసారిగా....విశాఖ జిల్లాలో దివ్యాంగుల స్పోర్ట్స్ సెంటర్ ఏర్పాటు

ఆంధ్రప్రదేశ్ రాష్ట్రంలో మరో ప్రతిష్టాత్మక సంస్థ కొలువుదీరనుంది. విశాఖపట్నంలో దివ్యాంగుల కోసం స్పోర్ట్స్ సెంటర్ ఏర్పాటు కానుంది. ఈ దిశగా అడుగులు పడుతున్నాయి. విశాఖపట్నంలో దివ్యాంగుల క్రీడా కేంద్రం (దివ్యాంగుల స్పోర్ట్స్ సెంటర్) నెలకొల్పేందుకు సహకరించాలంటూ.. టీడీపీ ఎంపీ లావు శ్రీకృష్ణ దేవరాయలు కేంద్రాన్ని కోరారు. కేంద్ర సామాజిక న్యాయం, సాధికారత మంత్రి వీరేంద్ర కుమార్‌తో ఎంపీ లావు శ్రీకృష్ణ దేవరాయలు భేటీ అయ్యారు. ఈ సందర్భంగా దేశంలో వివిధ ప్రాంతాల్లో దివ్యాంగుల కోసం క్రీడా కేంద్రాలను ఏర్పాటు చేయాలని కేంద్రం తీసుకున్న నిర్ణయంపై చర్చించారు. ఈ క్రమంలోనే విశాఖపట్నంలో దివ్యాంగుల క్రీడా కేంద్రం ఏర్పాటు చేయాలని నిర్ణయించారని.. ఇందుకు ఆంధ్రప్రదేశ్ ప్రభుత్వం కూడా ముందడుగు వేసిందన్నారు.

దివ్యాంగుల క్రీడా కేంద్రం నిర్మాణం కోసం విశాఖపట్నం జిల్లా బక్కన్నపాలెంలో ఏపీ ప్రభుత్వం 22.64 ఎకరాల ప్రభుత్వ భూమిని కూడా గుర్తించిన విషయాన్ని ఎంపీ కృష్ణదేవరాయలు.. కేంద్ర మంత్రికి వివరించారు. 2025 మార్చి నెలలో కేంద్ర ప్రభుత్వ అధికారులు.. స్థల పరిశీలన కూడా చేశారన్నారు. దివ్యాంగుల క్రీడా కేంద్రం ఏర్పాటు కోసం రాష్ట్ర ప్రభుత్వం అవసరమైన అన్ని పత్రాలు సమర్పించి పూర్తి సహకారం అందించినట్లు వివరించారు.

ఈ నేపథ్యంలో విశాఖలో దివ్యాంగుల క్రీడా కేంద్రం త్వరితగతిన ఏర్పాటు చేసేలా.. కేంద్ర ప్రభుత్వం అవసరమైన ఆర్థిక సహాయం, పరిపాలనా ఆమోదాలు మంజూరు చేయాలని కేంద్ర మంత్రిని లావు శ్రీకృష్ణదేవరాయలు కోరారు. ఈ కేంద్రం అందుబాటులోకి వస్తే.. ఆంధ్రప్రదేశ్‌లోని దివ్యాంగ క్రీడాకారులకు మెరుగైన శిక్షణ సదుపాయాలు లభిస్తాయని.. జాతీయ, అంతర్జాతీయ స్థాయిలో ప్రతిభ కనబర్చేందుకు అవకాశం కలుగుతుందని వివరించారు.

మరోవైపు రూ.200 కోట్లతో విశాఖలో దివ్యాంగుల స్పోర్ట్స్ సెంటర్ నిర్మించేందుకు కేంద్రం గతంలో అంగీకరించింది. ఈ సెంటర్ నిర్మాణం పూర్తి అయ్యి అందుబాటులోకి వస్తే.. భారతదేశంలోనే రెండో దివ్యాంగుల క్రీడా కేంద్రంగా నిలుస్తుంది. అలాగే దక్షిణ భారతదేశంలోనే తొలి దివ్యాంగుల క్రీడా కేంద్రంగా గుర్తింపు సంపాదించుకుంటుంది. అయితే గతేడాది మార్చి నెలలో కేంద్ర బృందం పరిశీలన తర్వాత.. ఈ ప్రాజెక్టుపై అడుగులు ముందుకు పడలేదు. దీంతో దివ్యాంగుల క్రీడా కేంద్రం నిర్మాణానికి అయ్యే ఆర్థిక సాయం, అనుమతులు మంజూరు చేయాలంటూ ఎంపీ లావు శ్రీకృష్ణ దేవరాయలు కేంద్ర మంత్రిని కోరారు.