గుండె ఆరోగ్యంగా ఉండాలంటే రోజుకు 10 వేల అడుగులు నడిస్తే సరిపోతుందా?

గుండె ఆరోగ్యంగా ఉండాలంటే రోజుకు 10 వేల అడుగులు నడిస్తే సరిపోతుందా? సమాధానం కాదు. సాధారణ గుండెతో పాటు హృదయనాళాలకి సంబంధించిన ఫిట్‌నెస్ నిర్వహించడానికి రోజుకు 10 వేల అడుగులు నడవడం సాయపడుతుంది. ఇది ఆచరణాత్మకంగా ఉంటుంది. కానీ గుండె ఆరోగ్యానికి ఇది ఒక్కటే సరిపోదు అని డాక్టర్ నూతన్ కుమార్, కన్సల్టెంట్ ఇంటర్వెన్షనల్ కార్డియాలజిస్ట్ (స్పార్ష్ హాస్పిటల్, యలహంక, బెంగళూరు) వివరించారు.

గుండె ఆరోగ్యం కోసం కేవలం నడిచే అడుగుల సంఖ్య మీద మాత్రమే ఆధారపడకూడదు. సరైన జీవనశైలి పాటించనివారికి వాకింగ్ మంచి ఆప్షన్. నిశ్చల జీవనశైలి ఉన్నవారు రోజుకు 7 వేల నుంచి 10 వేల అడుగులు నడవడం మంచిది. ఇది సరైన రక్త ప్రసరణకు మద్ధతు ఇస్తుంది. బరువు నిర్వహణకు సాయపడుతుంది. గుండెకి హాని చేసే రక్తపోటును నియంత్రిస్తుంది. జీవక్రియ ఆరోగ్యాన్ని కూడా పెంచుతుంది.

సరిగ్గా నడవడం చాలా ముఖ్యం

సరిగ్గా నడిచినప్పుడే గుండె ఆరోగ్యం మెరుగుపడుతుందని వైద్యులు అంటున్నారు. శ్వాస, హృదయ స్పందన రేటు వేగంగా ఉండేలా.. శరీరం వెచ్చగా ఉండేలా, మీకు కొంచెం ఊపిరి ఆడనట్లు అనిపించేలా వాకింగ్ చేయాలి. అంటే బ్రిస్క్ వాకింగ్ చేయాలి అని డాక్టర్ చెబుతున్నారు. అందుకే రోజంతా నెమ్మదిగా నడవడం కంటే 30 నిమిషాల చురుకైన నడక (బ్రిస్క్ వాకింగ్) చాలా ప్రయోజనకరంగా ఉంటుంది. ఇది హృదయనాళాల వశ్యతను పెంచుతుంది. రక్తపోటును నియంత్రిస్తుంది. ఇన్సులిన్ సెన్సిటివిటీని మెరుగుపరుస్తుంది. కొలెస్ట్రాల్ తగ్గించడంలో సాయపడుతుంది. వైద్యుల అభిప్రాయం ప్రకారం, రోజుకు 7,000 నుంచి 8,000 అడుగులు సరైన పద్ధతిలో నడిస్తే గుండె ఆరోగ్యం మెరుగుపడుతుంది.

10 వేల అడుగుల వాకింగ్ సరిపోదా?

నేటి ప్రస్తుత బిజీ లై‌ఫ్‌స్టైల్‌లో చాలా మందికి రోజులో ఒకేసారి 10 వేల అడుగులు నడవడం చాలా కష్టం. ఎక్కువసేపు కూర్చొని పనిచేయడం , డయాబెటిస్, అధిక కొలెస్ట్రాల్, అధిక ట్రైగ్లిజరైడ్లు లేదా గుండె జబ్బుల కుటుంబ చరిత్ర వంటి పరిస్థితులకు కేవలం 10 వేల అడుగులు నడిస్తే సరిపోదు. ఇలాంటి ఆరోగ్య పరిస్థితులు ఉన్న వారు వ్యాయామ ప్రణాళికల్ని వైద్య మార్గదర్శకత్వంలో అమలు చేయాలి. అంటే డాక్టర్లు చెప్పిన సలహాలు తీసుకోవాలి. వాకింగ్‌తో పాటు సమతుల్య ఆహారం, సరైన నిద్ర, ఒత్తిడిని నిర్వహించడం చాలా ముఖ్యం.

గుండె ఆరోగ్యం కోసం ఏం చేయాలి?

డాక్టర్ నూతన్ ప్రకారం మంచి గుండె ఆరోగ్యం కోసం వారానికి కనీసం 150 నిమిషాలు మితమైన-ఏరోబిక్ కార్యకలాపాలతో పాటు వ్యాయామంలో పాల్గొనడం ముఖ్యం. ఇందులో చురుకైన నడక, సైక్లింగ్ లేదా మెట్లు ఎక్కడం వంటివి ఉండొచ్చు. దీంతో స్ట్రెంత్ ట్రైనింగ్ (బల శిక్షణ), ఫ్లెక్సిబుల్ వ్యాయామాల్ని కూడా లక్ష్యంగా చేసుకోవాలి. రోజుకు 10,000 అడుగులు పూర్తి చేయడం మంచి విషయమే అయినప్పటికీ.. ఇది గుండె రక్షణకు పూర్తి హామీ ఇవ్వదు. నడక ఒక అద్భుతమైన పునాది కానీ సమగ్రమైన, బ్యాలెన్స్‌డ్ లైఫ్‌స్టైల్ గుండె యొక్క దీర్ఘకాలిక ఆరోగ్యాన్ని నిర్ణయిస్తుంది.

వాకింగ్‌తో పాటు పాటించాల్సిన ఇతర అలవాట్లు

గుండె ఆరోగ్యం కోసం వాకింగ్‌తో పాటు కొన్ని ఆరోగ్యకరమైన అలవాట్లు కూడా పాటించాల్సి ఉంటుంది.

సమతుల్య ఆహారం: మీరు తినే ఆహారం విషయంలో కూడా చాలా జాగ్రత్తగా ఉండాలి. ఏది పడితే అది తింటే ఆరోగ్యానికి మంచిది కాదు. ఉప్పు, ప్రాసెస్ చేసిన ఆహారాలు, తీపి పదార్థాలు, జంక్ ఫుడ్స్, వేయించిన ఆహారాలకు దూరంగా ఉండాలి. సమతుల్య ఆహారం తీసుకోవాలి. ఆహారంలో తాజా పండ్లు, కూరగాయలు, ఫైబర్ ఎక్కువగా ఉండే ఫుడ్స్‌ని భాగం చేసుకోవాలి.

ఒత్తిడి నిర్వహణ: ఈ రోజుల్లో చాలా మంది ఒత్తిడిని అనుభవిస్తున్నారు. ఒత్తిడి తగ్గించుకోవడం కోసం యోగా, ధ్యానం వంటి వాటిని జీవనశైలిలో భాగం చేసుకోవాలి.

చెడు అలవాట్లు మానేయండి: స్మోకింగ్, ఆల్కహాల్ వంటివి గుండె ఆరోగ్యానికి మంచివి కావు. వీటిని మానేయడానికి ప్రయత్నించండి.

సరైన నిద్ర: గుండె ఆరోగ్యానికి ప్రతి రోజూ సరైన నిద్ర కూడా చాలా ముఖ్యం. రోజుకు కనీసం ఏడు నుంచి ఎనిమిది గంటలు నిద్రపోయేలా ప్లాన్ చేసుకోండి.

బరువు నియంత్రణ: ఊబకాయం లేదా అధిక బరువు గుండె ఆరోగ్యానికి మంచిది కాదు. అధిక బరువు తగ్గించుకుంటే గుండెపై భారాన్ని తగ్గిస్తుంది.

ఆరోగ్యంపై శ్రద్ధ: కొలెస్ట్రాల్, రక్తపోటు, డయాబెటిస్ గుండె ఆరోగ్యానికి మంచి విషయాలు కావు. అందుకే వీటిని ఎప్పటికప్పుడు పర్యవేక్షించాలి. కొలెస్ట్రాల్, బీపీ, రక్తంలో షుగర్ లెవల్స్‌ను పరీక్షించుకోవాలి.