ఇజ్రాయెల్‌కు అమెరికా మిలిటరీ మద్దతు.. భారీ నౌక చేరింది

ఇరాన్‌పై అమెరికా దాడి జరిగే అవకాశాల నేపథ్యంలో ప్రపంచంలోనే అతిపెద్ద విమాన వాహక నౌకగా పేరుగాంచిన USS Gerald R. Ford ఇజ్రాయెల్ ఉత్తర తీరానికి చేరుకున్నట్లు సమాచారం. ప్రాంతీయ ఉద్రిక్తతలు పెరుగుతున్న వేళ ఈ నౌక మోహరింపు ప్రాధాన్యం సంతరించుకుంది.అమెరికా సైనిక చర్యలకు సిద్ధమవుతోందన్న సంకేతాల మధ్య ఇరాన్ కూడా ప్రతిస్పందనకు అన్ని విధాలా సిద్ధమవుతోందని అంతర్జాతీయ వర్గాలు పేర్కొంటున్నాయి. గతంలో వెనిజులాపై చేపట్టిన ఆపరేషన్‌లో కీలక పాత్ర పోషించిన ఈ నౌక, అవసరమైతే ఇరాన్‌పై ఆపరేషన్‌లోనూ భాగస్వామ్యం కావచ్చని సమాచారం.ఇప్పటికే పశ్చిమాసియాలో అమెరికా యుద్ధనౌకలు, వైమానిక దళాలు మోహరించబడ్డాయి. అత్యాధునిక సాంకేతికత కలిగిన F-22 Raptor స్టెల్త్ యుద్ధవిమానాలను కూడా ఇజ్రాయెల్‌కు తరలించినట్లు తెలుస్తోంది. ఇవి బ్రిటన్‌లోని RAF Lakenheath ఎయిర్‌బేస్ నుంచి బయలుదేరి దక్షిణ ఇజ్రాయెల్‌లోని స్థావరానికి చేరుకున్నట్లు నివేదికలు చెబుతున్నాయి.ఖతార్‌లోని Al Udeid Air Baseలో అమెరికా వైమానిక ఉనికి గణనీయంగా తగ్గినట్లు తాజా చిత్రాలు సూచిస్తున్నాయి. అక్కడ కేవలం కొన్ని C-17, C-130 రవాణా విమానాలు, అటాక్ హెలికాప్టర్లు మాత్రమే మిగిలి ఉన్నట్లు సమాచారం. ఇదే సమయంలో ఇజ్రాయెల్‌లోని Ben Gurion Airport వద్ద అమెరికా సైనిక విమానాల రద్దీ కనిపిస్తున్నట్లు తెలుస్తోంది.గ్రీస్‌లోని Chania International Airport ప్రాంతంలో యూఎస్ నేవీకి చెందిన రీఫ్యూయలింగ్ విమానాలు, RC-135 నిఘా విమానాలు, F-15 యుద్ధవిమానాలు కనిపించాయి. అలాగే సౌదీ అరేబియాలోని Prince Sultan Air Baseలో కూడా KC-135 ట్యాంకర్లు, కమాండ్ కమ్యూనికేషన్ విమానాలు మోహరించబడ్డాయి.మరోవైపు, ఒకవేళ ఇరాన్‌పై దాడి జరిగితే అమెరికా స్థావరాలపై ప్రతిదాడులు జరిగే అవకాశముందని అంచనా వేస్తున్నారు. మధ్యప్రాచ్యంలో ఇప్పటికే వేలాది అమెరికా సైనికులు మోహరించబడ్డారని సమాచారం. టెల్ అవీవ్ ప్రాంతంలో భద్రతను కట్టుదిట్టం చేస్తూ, ఇజ్రాయెల్ పార్లమెంట్ సమీపంలో Iron Dome క్షిపణి రక్షణ వ్యవస్థను ఏర్పాటు చేసినట్లు తెలుస్తోంది.ఇదిలా ఉండగా, ఇరాన్‌లోని Parchin ప్రాంతంలో ఉన్న సైనిక స్థావరం వద్ద పేలుళ్లు సంభవించినట్లు వార్తలు వినిపిస్తున్నాయి. అయితే ఈ ఘటనలపై అధికారిక ధృవీకరణ కోసం ప్రపంచ దృష్టి కేంద్రీకృతమైంది.