ఢిల్లీ ఎయిమ్స్లో జేపీ నడ్డాకు గుండె చికిత్స
కేంద్ర ఆరోగ్య, కుటుంబ సంక్షేమ శాఖ మంత్రి జేపీ నడ్డా స్వల్ప అస్వస్థతకు గురయ్యారు. ఢిల్లీలోని ఆల్ ఇండియా ఇన్స్టిట్యూట్ ఆఫ్ మెడికల్ సైన్సెస్ (ఎయిమ్స్)లో చేరిన ఆయనకు వైద్యులు యాంజియోప్లాస్టీ నిర్వహించారు. నిన్న ఈ చికిత్స జరగ్గా, ప్రస్తుతం ఆయన ఆరోగ్యం నిలకడగా ఉందని ఎయిమ్స్ వర్గాలు నేడు ఒక అధికారిక ప్రకటనలో తెలిపాయి. ఆయనను కార్డియాలజీ విభాగంలో వైద్యుల పర్యవేక్షణలో ఉంచినట్లు పేర్కొన్నాయి. వివరాల్లోకి వెళితే.. ఆగస్టు 13వ తేదీ సాయంత్రం జేపీ నడ్డాకు కాస్త నలతగా అనిపించడంతో కుటుంబ సభ్యులు ఆయనను ఎయిమ్స్కు తరలించారు. అక్కడ వైద్యులు ఆయన ఆరోగ్య పరిస్థితిని అంచనా వేసి, అవసరమైన వైద్య పరీక్షలు చేశారు. ఇందులో భాగంగా ఆగస్టు 14న ఆయనకు కరోనరీ యాంజియోగ్రఫీ పరీక్ష నిర్వహించారు. ఈ పరీక్ష ఫలితాల ఆధారంగా వైద్యుల బృందం యాంజియోప్లాస్టీ చేయాలని నిర్ణయించింది. ఈ మేరకు నిన్న ఆయనకు విజయవంతంగా యాంజియోప్లాస్టీ చికిత్స పూర్తిచేశారు. "గౌరవనీయ ఆరోగ్య, కుటుంబ సంక్షేమ శాఖ మంత్రి జేపీ నడ్డాకు ఆగస్టు 17న యాంజియోప్లాస్టీ జరిగింది. ప్రస్తుతం ఆయన ఆరోగ్యం నిలకడగా ఉంది. ఢిల్లీ ఎయిమ్స్లోని కార్డియాలజీ విభాగంలో వైద్యుల పర్యవేక్షణలో ఉన్నారు" అని ఎయిమ్స్ తన ప్రకటనలో స్పష్టం చేసింది. సాధారణంగా గుండెకు రక్తాన్ని సరఫరా చేసే రక్తనాళాల్లో పూడికలు లేదా అడ్డంకులు ఏర్పడినప్పుడు వాటిని తొలగించడానికి యాంజియోప్లాస్టీ చికిత్స చేస్తారు. దీనిని పెర్క్యుటేనియస్ కరోనరీ ఇంటర్వెన్షన్ (పీసీఐ) అని కూడా అంటారు. ఇది అతితక్కువ కోతతో చేసే సురక్షితమైన ప్రక్రియ. ఒక సన్నని ట్యూబ్ (కాథెటర్) ద్వారా చిన్న బెలూన్ను రక్తనాళంలోకి పంపించి, అడ్డంకి ఉన్నచోట ఉబ్బించడం ద్వారా రక్త ప్రసరణను పునరుద్ధరిస్తారు. దీనికి ముందు చేసే కరోనరీ యాంజియోగ్రఫీ అనేది ఒక నిర్ధారణ పరీక్ష. దీని ద్వారా రక్తనాళాల్లోని అడ్డంకులను గుర్తిస్తారు. ప్రస్తుత మోదీ ప్రభుత్వంలో జేపీ నడ్డా ఆరోగ్య శాఖతో పాటు రసాయనాలు, ఎరువుల శాఖల మంత్రిగా కూడా కీలక బాధ్యతలు నిర్వర్తిస్తున్నారు. గతంలో ఆయన బీజేపీ జాతీయ అధ్యక్షుడిగానూ పనిచేశారు. ఇటీవలి వారాల్లో ఆయన చాలా చురుగ్గా ఉంటూ దేశవ్యాప్తంగా పలు ఆరోగ్య సంరక్షణ కార్యక్రమాలు, మౌలిక సదుపాయాలపై సమీక్షలు నిర్వహించారు. ప్రస్తుతం ఆయన ఆరోగ్యం నిలకడగా ఉన్నప్పటికీ, యాంజియోగ్రఫీలో గుర్తించిన వివరాలు లేదా ఇతర ఆరోగ్య సమస్యల గురించి ఆసుపత్రి వర్గాలు పూర్తి సమాచారం వెల్లడించలేదు.
