ఉపాధి హామీ పనుల సగటు వేతనం రూ. 240 : సీఎం వై.ఎస్.జగన్

ఉపాధి హామీ పనుల సగటు వేతనం రూ. 240 ఉండేలా కలెక్టర్లు చర్యలు తీసుకోవాలని ఆంధ్రప్రదేశ్ రాష్ట్ర ముఖ్యమంత్రి వై.ఎస్.జగన్మోహన్ రెడ్డి ఆదేశాలు జారీ చేశారు. పూర్తి కాని ఆర్బీకేలు, సచివాలయాలు, హెల్త్‌ క్లినిక్స్‌ను అక్టోబర్ నెలాఖరుకు పూర్తిచేయాలని సూచించారు. 3,966 గ్రామాల్లో డిసెంబర్ నాటికి డిజిటల్‌ లైబ్రరీల ఏర్పాటును పూర్తిచేయాలని ఆదేశించారు.

విద్య, వైద్యంలో నాడు- నేడు పనుల ప్రగతిపై ముఖ్యమంత్రి వైఎస్ జగన్మోహన్ రెడ్డి సమీక్ష నిర్వహించారు. స్పందన కార్యక్రమంలో భాగంగా జిల్లా కలెక్టర్లు, ఎస్పీలతో మంగళవారం ముఖ్యమంత్రి జగన్మోహన్‌రెడ్డి వీడియో కాన్ఫరెన్స్ నిర్వహించారు. ఈ సందర్భంగా స్పందన కార్యక్రమంలో వస్తున్న ఫిర్యాదుల పరిష్కారం.. పురోగతిపై చర్చించారు.

ఈ సందర్భంగా సీఎం జగన్ మాట్లాడుతూ..ఇక, ప్రభుత్వ స్కూళ్లు, ఆస్పత్రుల నిర్వహణపై సమర్థవంతమైన పర్యవేక్షణ ఉండాలని సీఎం జగన్ అన్నారు. ఫిర్యాదుల స్వీకరణకు ప్రత్యేక ఫోన్‌ నంబర్లతో బోర్డులను ఏర్పాటు చేయాలని సూచించారు. అక్టోబర్ 2 నాటికి వేల గ్రామాల్లో జగనన్న భూ హక్కు మరియు భూ రక్ష సర్వే పూర్తి కావాలన్నారు. సంబంధిత వ్యక్తుల చేతిలో జగనన్న భూ రక్ష హక్కు పత్రాలు ఇవ్వాలని ఆదేశించారు.

అక్టోబర్ తర్వాత ప్రతి నెలలోనూ వెయ్యి గ్రామాల్లో సర్వే పూర్తి చేసి పత్రాలు అందించేలా చర్యలు తీసుకోవాలని సీఎం జగన్ సూచించారు. గ్రామ, వార్డు సచివాలయాల్లో ప్రతి రోజూ మధ్యాహ్నం 3 గటల నుంచి సాయంత్రం 5 గంటల వరకు స్పందన కార్యక్రమం కచ్చితంగా నిర్వహించాలని ఆదేశాలు జారీ చేశారు. ప్రతి సోమవారం జిల్లా, డివిజన్, సబ్‌ డివిజన్, మండల స్థాయిల్లో కచ్చితంగా స్పందన జరగాలన్నారు. సంబంధిత అధికారులు కచ్చితంగా స్పందనలో పాల్గొనాలని సూచించారు. ప్రతి బుధవారం స్పందన వినతులపై కలెక్టర్లు సమీక్ష నిర్వహించాలన్నారు.

గడప గడపకూ మన ప్రభుత్వం పేరుతో నేరుగా ప్రజల వద్దకు ఎమ్మెల్యే, సచివాలయం సిబ్బంది, వాలంటీర్లు వెళ్తున్నారని.. ప్రజల నుంచి వచ్చిన వినతుల ఆధారంగా అందులో ప్రాధాన్యతా పనులుగా గుర్తించి వాటిపై ఓ విజ్ఞప్తిని సంబంధిత ఎమ్మెల్యే పంపిస్తున్నారని సీఎం జగన్ వివరించారు. ఈ ప్రాధాన్యతా పనులను పూర్తి చేయడానికి ఒక్కో సచివాలయానికి రూ. 20 లక్షలు కేటాయించినట్లు చెప్పారు. దాదాపు 15 వేల సచివాలయాలకు ప్రాధాన్యతా పనుల కోసం రూ.3 వేల కోట్లు ఖర్చు చేయబోతున్నట్లు తెలిపారు. వృద్ధిరేటులో ఏపీ టాప్‌గా నిలవడం సంతోషకరమన్నారు. ఆగస్టు 25వ తేదీన నేతన్న నేస్తం అమలు చేస్తామని.. సెప్టెంబర్‌ 22న వైఎస్సార్‌ చేయూత కార్యక్రమం చేపట్టనున్నట్లు సీఎం జగన్‌ వివరించారు.