దేశంలోని బలహీనుల కోసం బలహీనమైన ప్రధాని అవసరం: అసదుద్దీన్ ఓవైసీ

దేశంలోని బలహీనుల కోసం బలహీనమైన ప్రధాని అవసరమే ప్రధాని నరేంద్ర మోదీని ఉద్దేశించి.. ఎంఐఎం చీఫ్ అసదుద్దీన్ ఓవైసీ  సంచలన వ్యాఖ్యలు చేశారు. దేశానికి బలహీనమైన ప్రధాని .. కిచిడి ప్రభుత్వం కావాలని ఆయన అన్నారు. దేశం ఇప్పటి వరకు ఎంతోమంది బలమైన, శక్తివంతమైన ప్రధానులు చూసిందని ఆయన అభిప్రాయపడ్డారు. ఈ ఏడాది గుజరాత్ ఎన్నికలు జరగనున్న విషయం తెలిసిందే... ఈ క్రమంలో శనివారం అహ్మదాబాద్‌లో అసదుద్దీన్ ఓవైసీ పర్యటించారు. ఈ సందర్భంగా ఆయన మాట్లాడుతూ.. కేంద్ర ప్రభుత్వం, ప్రధాని మోదీపై విమర్శలు గుప్పించారు.

బిల్కిస్ బానో కేసులో ఖైదీల విడుదల విషయంలో మౌనం వహించడంపై గుజరాత్‌లోని అధికార బీజేపీకి భిన్నంగా ఏమీ లేదని ఆమ్ ఆద్మీ పార్టీపై కూడా అసదుద్దీన్ దాడి చేశారు. డిసెంబర్‌లో జరగనున్న గుజరాత్ అసెంబ్లీ ఎన్నికల్లో ఏఐఎంఐఎం అభ్యర్థులను నిలబెడుతుందని వెల్లడించారు. అలాగే "దేశానికి ఇప్పుడు బలహీన ప్రధాని అవసరమని నేను నమ్ముతున్నాను. మేము శక్తివంతమైన ప్రధానిని చూశాం. ఇప్పుడు మనకు బలహీనమైన ప్రధాని కావాలి. తద్వారా అతను బలహీనులకు సహాయం చేస్తారు. శక్తివంతమైన ప్రధాని శక్తిమంతులకు మాత్రమే సహాయం చేస్తున్నారు." అని ఆయన అన్నారు.

అదేవిధంగా బలహీనమైన వ్యక్తి ప్రధానమంత్రి అయినప్పుడు.. బలహీనుడు ప్రయోజనం పొందుతాడని, బలమైన వ్యక్తి ప్రధానమంత్రి అయినప్పుడు శక్తిమంతుడు లాభపడతాడని అసదుద్దీన్ అభిప్రాయపడ్డారు. అలాగే దేశానికి ఖిచిడీ ప్రభుత్వం కూడా అవసరమని అసదుద్దీన్ ఓవైసీ అన్నారు. అదేవిధంగా ఆమ్ ఆద్మీ పార్టీకి, బీజేపీకి తేడా లేదన్నారు. రెండు పార్టీలు ఒకే మాట చెబుతుంటాయని, బిల్కిస్ బానోపై ఆప్ ఒక్క మాట కూడా మాట్లాడడం లేదని ఆరోపించారు.

ఇదే సందర్భంగా బీహార్ ముఖ్యమంత్రి నితీష్ కుమార్‌ను ప్రతిపక్షాల ప్రధానమంత్రి అభ్యర్థిగా కొందరు అంచనా వేయడం గురించి ప్రశ్నించగా.. ప్రతిపక్షాలు మోదీకి పోటీగా ముఖాలను ప్రదర్శించడానికి ప్రయత్నిస్తే బీజేపీయే లాభపడుతుందని అసదుద్దీన్ తెలిపారు. అలాగే ఇటీవల ఆర్‌ఎస్‌ఎస్‌ను ప్రశంసించిన తృణమూల్ కాంగ్రెస్ పార్టీ అధినేత్రి మమతా బెనర్జీనిపై కూడా అసద్‌ ఫైర్‌ అయ్యారు. ఆమె గతంలో ఎన్‌డీఏలో కొనసాగారన్నారు.