పుతిన్ తో అలా అని మోదీ అమెరికాలో హీరో అయ్యారు

ఇది యుద్ధం చేసే కాలం కాదని పుతిన్‌కు మోదీ సూచించడం పట్ల భారత ప్రధానిపై అమెరికా మీడియా ప్రశంసలు కురిపించింది.  ఉజ్బెకిస్థాన్‌లోని సమర్ఖండ్‌లో రష్యా అధ్యక్షుడు వ్లాదిమిర్ పుతిన్‌తో భేటీ అయిన ప్రధాని నరేంద్ర మోదీ.. ఉక్రెయిన్‌తో యుద్ధంపై కీలక వ్యాఖ్యలు చేసిన విషయం తెలిసిందే. ‘ఉక్రెయిన్‌పై యుద్ధం విషయంలో పుతిన్‌ను మోదీ మందలించారు’ అని హెడ్‌లైన్‌తో వాషింగ్టన్ పోస్ట్ కథనాన్ని ప్రచురించింది. ‘ఇది యుద్ధాల యుగం కాదు.. దీని గురించి నేను మీతో ఫోన్‌లో మాట్లాడాను.. అని పుతిన్‌ను మోదీ బహిరంగంగానే మందలించారు’ అని పేర్కొంది.

‘ఈ మందలింపు 69 ఏళ్ల రష్యన్ బలవంతుడు అన్ని వైపుల నుంచి అసాధారణ ఒత్తిడికి గురువుతున్నట్టు చూపుతోంది’ అని తెలిపింది. మోదీ వ్యాఖ్యలకు పుతిన్ స్పందిస్తూ.. ‘‘ఉక్రెయిన్‌లోని సంఘర్షణపై మీరు నిరంతరం వ్యక్తపరిచే మీ ఆందోళనల గురించి నాకు తెలుసు.. దీన్ని వీలైనంత త్వరగా ముగిసేలా మా వంతు కృషి చేస్తాం. దురదృష్టవశాత్తు ప్రత్యర్థి ఉక్రెయిన్ నాయకత్వం, చర్చల ప్రక్రియను విడిచిపెట్టినట్లు ప్రకటించింది.. 'యుద్ధభూమిలో సైనిక మార్గాల ద్వారా తన లక్ష్యాలను సాధించాలనుకుంటున్నట్లు వెల్లడించింది... అయినప్పటికీ అక్కడ ఏమి జరుగుతుందో మేము ఎప్పటికప్పుడు మీకు తెలియజేస్తాం’’ అని అన్నారు.

ఈ విషయాన్ని వాషింగ్టన్ పోస్ట; ది న్యూయార్క్ టైమ్స్ రెండూ తమ వెబ్‌పేజ్‌లో ప్రధాన వార్తగా ప్రచురించాయి. ‘‘భారత ప్రధాని పుతిన్‌తో ఇప్పుడు యుద్ధ శకం కాదు అని చెప్పారు’’ అని న్యూయార్క్ టైమ్స్ తన శీర్షికలో పేర్కొంది. ‘స్నేహపూర్వక ఈ సమావేశంలో ఇద్దరు నాయకులు తమ సుదీర్ఘ చరిత్రను ప్రస్తావించారు.. మోదీ వ్యాఖ్యలు చేయడానికి ముందు ఉక్రెయిన్‌ యుద్ధం గురించి భారత ఆందోళనలను తాను అర్థం చేసుకున్నానని పుతిన్ అన్నారు’’ అని చెప్పింది. ‘‘చైనా అధ్యక్షుడు జీ జిన్‌పింగ్‌‌తో పుతిన్ సమావేశమైన మర్నాడు మోదీ ఈ వ్యాఖ్యలు చేశారు.. దండయాత్ర ప్రారంభం తర్వాత పుతిన్‌, మోదీ మధ్య జరిగిన మొదటి ముఖాముఖి భేటీలో ఉక్రెయిన్ గురించి బహిరంగంగా ప్రస్తావించి వైఖరిని స్పష్టం చేశారు’’ అని న్యూయార్క్ టైమ్స్ వ్యాఖ్యానించింది.