ధనకర్ణుడిని మించిన ధనకర్ణుడు ఆయన

మాయమైపోతున్నడమ్మ మనిషన్న వాడు అని పాడుకొనే ఈ  రోజుల్లో మానవత్వం ఇంకా బతికేవుంది అని చాటే వారూ ఉన్నారు. ఇదిలావుంటే అమెరికాకు చెందిన ఓ వ్యాపారవేత్త... తన కంపెనీని దానం చేశాడు. ఒకటి కాదు.. రెండు కాదు.. ఏకంగా వేల కోట్లు విలువ చేసే కంపెనీనే ఇచ్చి అభినవ దాన కర్ణుడుగా నిలిచాడు. అవుట్‌ డోర్ దుస్తులకు సంబంధించిన అమెరికన్ రిటైలర్ కంపెనీ పటగోనియా వ్యవస్థాపకుడు వైవోన్ చౌనార్డ్ పర్యావరణ పరిరక్షణ కోసం 50 సంవత్సరాల క్రితం ప్రారంభించిన మొత్తం వ్యాపారాన్ని విరాళంగా ఇస్తున్నారు.

పటగోనియా కంపెనీని 1973లో స్థాపించారు. దీనిని ప్రారంభించి 50 ఏళ్లు అయింది. ఈ కంపెనీ తయారు చేసిన అవుట్ డోర్ దుస్తులను 10 దేశాలలో విక్రయిస్తోంది. న్యూయార్క్ టైమ్స్ వెల్లడించిన వివరాల ప్రకారం ఈ కంపెనీ విలువ సుమారు $3 బిలియన్లు.. అంటే మన కరన్సీలో అచ్చంగా రూ.24 వేల కోట్లు. ఇంత విలువైన కంపెనీని వైవోన్ చౌనార్డ్ (83).. వాతావరణంలో వచ్చే సంక్షోభాలను ఎదుర్కోవడానికి, జీవ వైవిధ్యాన్ని కాపాడేందుకు వినియోగించాలనే సద్దుద్దేశంతో.. విరాళంగా అందజేస్తున్నారు.

ఈ కంపెనీ ద్వారా వచ్చే డబ్బంతా ఇక నుంచి పర్యావరణ హితం కోసం పనిచేసే కార్యక్రమాలకు ఇవ్వనున్నారు. వైవోన్ చౌనార్డ్‌తో పాటు, అతని భార్య, వారి పిల్లలు కూడా ఈ దుస్తుల కంపెనీలో తమ వాటాను ఇచ్చేస్తున్నారు. తన నిర్ణయాన్ని తెలియజేస్తూ వైవోన్ సంస్థకు ఒక లేఖ కూడా రాశారు. అందులో "భూమి ఇప్పుడు మా ఏకైక వాటాదారు. అభివృద్ధి చెందుతున్న గ్రహం గురించి ఏదైనా చేయాలనే ఆశ ఉంటే.. మన దగ్గర ఉన్న వనరులతో మనం చేయగలినదంతా చేయాలి." అని పేర్కొన్నారు. ఆ లెటర్‌ను బుధవారం పటగోనియా వెబ్‌సైట్‌లో పోస్ట్ చేశారు.

అయితే వైవోన్ చౌనార్డ్ నిర్ణయం అందరిని ఆశ్చర్యం కలిగించవచ్చు. కానీ వైవోన్ గురించి తెలిస్తే.. అందులో ఎటువంటి అతిశయోక్తి కలగదు. ఎందుకంటే వైవోన్ చౌనార్డ్ చాలా కష్టపడి పైకి వచ్చిన వ్యక్తి. 1960లలో రాక్ క్లైంబర్‌గా తనకంటూ ఒక పేరు తెచ్చుకున్నాడు. ఉత్తర అమెరికాలోని పర్వత శ్రేణులను అధిరోహించాడు. చౌనార్డ్ తండ్రి మెకానిక్ ప్లంబర్. రాక్ క్లైంబింగ్ పట్ల తనకున్న ఆసక్తితో చౌనార్డ్ తన సొంత సాధనాలను తయారు చేసుకోవాలనుకున్నాడు. దానికోసం ఆ పనిని నేర్చుకోవాలనుకున్నాడు. ఆ తర్వాత రాక్ క్లైంబింగ్‌కు ఉపయోగపడే టూల్స్ కంపెనీని పెట్టాడు. తర్వాత 1973లో దళసరి దుస్తులను అందించేందుకు పటాగోని కంపెనీని స్థాపించి.. విజయవంతంగా నడిపించాడు. అలా ఎంతో కష్టనష్టాలను ఓర్చుకుని కంపెనీ అభివృద్ధి దశలో నడిపించాడు.