పాస్ పోర్ట్ కావాలా...నెలన్నర వేచివుండాల్సిందే
national | Suryaa Desk | Published : Sun, Oct 02, 2022, 10:36 PM
పాస్ పోర్ట్ అంటే అదేమీ పెద్ద ప్రయాస కాదు అని ఈ రోజుల్లో చెప్పేమాట. అది నిజమైనా పాస్ పోర్ట్ మంజూరు సమయం మాత్రం పెరిగిపోయింది. పాస్ పోర్ట్ కావాలంటూ వస్తున్న దరఖాస్తుల సంఖ్య భారీగా పెరిగింది. దీనికితోడు కరోనా ఆంక్షలతో గతంలో తాలూకూ దరఖాస్తులు కూడా కొంత అపరిష్కృతంగా ఉన్నాయి. దీంతో వేచి చూడాల్సిన సమయం పెరిగిపోయింది. గతంలో అయితే పాస్ పోర్ట్ వారం, పది రోజుల్లోనే వచ్చేసేది. స్లాట్ బుక్ చేసుకుని, తదుపరి రెండు రోజుల్లోనే పాస్ పోర్ట్ కేంద్రానికి వెళ్లి సర్టిఫికెట్ల వెరిఫికేషన్ పూర్తి చేసుకోవాల్సి ఉండేది. పోలీసులు విచారణ పూర్తి చేసిన తర్వాత పాస్ పోర్ట్ జారీ అయ్యేది. కానీ, ఇప్పుడు పాస్ పోర్ట్ కోసం స్లాట్ కావాలంటే నెలన్నర పాటు వేచి చూడాల్సి వస్తోంది.
దీనికితోడు అధిక దరఖాస్తులు ఉన్నందున విచారణకు కూడా కొంత అధిక సమయం తీసుకుంటోంది. వెరసి 45 రోజులకు పైనే వేచి చూడాల్సిన పరిస్థితి నెలకొంది. విదేశాలకు ఉన్నత విద్య, ఉపాధి కోసం వెళుతున్న వారి సంఖ్యలో గణనీయమైన పెరుగుదల కనిపిస్తోంది. ప్రస్తుతం రోజువారీగా పది వేల మందికి పైనే పాస్ పోర్ట్ స్లాట్ ల కోసం పాస్ పోర్ట్ సేవా వెబ్ సైట్ ను సందర్శిస్తున్నారు. కానీ వాస్తవ సామర్థ్యం ఐదు వేలే. దీంతో రెట్టింపు సమయం పడుతోంది.
|
|