వాట్సాప్ షాక్.. పలు ఫోన్లకు సపోర్ట్ నిలిపివేత, యూజర్లపై ప్రభావం

ప్రముఖ మెసేజింగ్ యాప్ WhatsApp ఈ ఏడాది చివరి నాటికి పలు పాత ఆండ్రాయిడ్ స్మార్ట్‌ఫోన్‌లలో తన సేవలను నిలిపివేయాలని నిర్ణయించింది. ఫోన్‌లను అప్‌గ్రేడ్ చేయని వినియోగదారులు వాట్సాప్ సేవలను కోల్పోయే అవకాశముంది.WhatsApp హెల్ప్ సెంటర్ సమాచారం ప్రకారం, సెప్టెంబర్ 8, 2026 నుంచి Android 6.0 కంటే తక్కువ వెర్షన్ ఉన్న ఫోన్లకు సపోర్ట్ నిలిపివేయబడుతుంది. అంటే Android 5.0, 5.1 వంటి పాత వెర్షన్లపై ఇకపై వాట్సాప్ పనిచేయదు. భద్రతను మెరుగుపరచడం మరియు కొత్త ఫీచర్లను అందించడమే ఈ నిర్ణయానికి ప్రధాన కారణమని కంపెనీ వెల్లడించింది.ఈ మార్పు ముఖ్యంగా 2014 కంటే ముందు విడుదలైన స్మార్ట్‌ఫోన్‌లపై ప్రభావం చూపనుంది. ముఖ్యంగా Samsung, Sony, LG, Huawei వంటి బ్రాండ్ల పాత మోడళ్లు ఈ జాబితాలో ఉన్నాయి. ఉదాహరణకు Sony Xperia Z4, Z3, Z5 సిరీస్, Samsung Galaxy S6 సిరీస్, Galaxy Note 4, Note 5, OnePlus One, OnePlus 2, Lenovo K3 Note, A7000, అలాగే Asus Zenfone 2 సిరీస్ వంటి ఫోన్లు ప్రభావితమయ్యే అవకాశముంది.భారత్, బ్రెజిల్, పాకిస్థాన్ వంటి దేశాల్లో పాత ఆండ్రాయిడ్ ఫోన్లు ఇప్పటికీ విస్తృతంగా వినియోగంలో ఉన్నందున, ఈ నిర్ణయం అక్కడి వినియోగదారులపై ఎక్కువ ప్రభావం చూపనుంది.పాత ఫోన్ వాడుతున్న వినియోగదారులు వెంటనే Settings‌లోకి వెళ్లి ‘About Phone’ విభాగంలో తమ ఆండ్రాయిడ్ వెర్షన్‌ను తనిఖీ చేయాలి. ఒకవేళ సాఫ్ట్‌వేర్ అప్‌డేట్ అందుబాటులో ఉంటే వెంటనే అప్‌డేట్ చేయడం మంచిది. అప్‌డేట్ చేయలేని పరిస్థితి ఉంటే, వాట్సాప్ సేవలను కొనసాగించేందుకు కొత్త ఫోన్ కొనడం తప్ప మరో మార్గం ఉండదు. అలాగే ముఖ్యమైన చాట్స్, మీడియా ఫైల్స్ పోకుండా ముందుగానే బ్యాకప్ తీసుకోవాలని నిపుణులు సూచిస్తున్నారు.అయితే Apple iPhone వినియోగదారులకు ప్రస్తుతం ఎలాంటి ఇబ్బంది లేదు. iOS 15.1 లేదా అంతకంటే ఎక్కువ వెర్షన్ ఉన్న ఐఫోన్లు, అలాగే iPadOS 15.1 ఉన్న ఐప్యాడ్లలో వాట్సాప్ యథావిధిగా పనిచేస్తుంది. ఆండ్రాయిడ్‌లో జరుగుతున్న ఈ మార్పులు ప్రస్తుతం ఐఫోన్ యూజర్లపై ప్రభావం చూపవు.