అఖిలప్రియ చేసే వ్యవహారాల వల్ల భూమా అభిమానులు తలదించుకొంటున్నారు

దివంగత భూమా‌ నాగిరెడ్డి, శోభా నాగిరెడ్డి దంపతులపై వారి కూతురు భూమా అఖిలప్రియ, అల్లుడు భార్గవరామ్ చీటింగ్ కేసు పెట్టించడం అవమానకరమని బీజేపీ నేత భూమా కిషోర్ రెడ్డి పేర్కొన్నారు. తమ ఎదుగుదల కోసం తల్లిదండ్రుల‌ పేర్లు చెడగొట్టడం బాధాకరంగా ఉందని.. 2011లో భూమా నాగిరెడ్డి ఆస్తులు అమ్ముకునే స్థితిలో ఉన్నారని అవాస్తవాలు ప్రచారం చేయడం చాలా సిగ్గుచేటన్నారు. అఖిలప్రియ చేసే వ్యవహారాల వల్ల భూమా కార్యకర్తలు, అభిమానులు తలదించుకోవాల్సిన పరిస్థితి ఉందన్నారు.

డబ్బు కోసం అఖిలప్రియ విఖ్యాత్ రెడ్డి తల్లిదండ్రుల పైనే చీటింగ్ కేసు పెట్టించే స్థాయికి దిగజాతారని అనుకోలేదన్నారు కిషోర్ రెడ్డి. వారసులంటే డబ్బును, అధికారాన్ని అనుభవించడం కాదు.. తల్లిదండ్రుల పేరును నిలబెట్టాలని అఖిలప్రియ, విఖ్యాత్ రెడ్డి గుర్తుపెట్టుకుంటే మంచిదన్నారు. తన పిన్ని, బాబాయ్ ఎంతో కష్టపడితే కానీ ఈ స్థాయికి రాలేదని.. అఖిలప్రియ వార్డు మెంబర్‌గా కూడా గెలవలేని వ్యక్తి అన్నారు. ఆమె ఎమ్మెల్యే, మంత్రి అయ్యిందంటే భూమా నాగిరెడ్డి, శోభానాగిరెడ్డి వల్లే అన్నారు.

శోభానాగిరెడ్డి మరణంతో ఎమ్మెల్యేగా, నాగిరెడ్డి మరణం తర్వాత అఖిల మంత్రి అయ్యారన్నారు. లేకపోతే ఆళ్లగడ్డలో వార్డు మెంబర్‌గా కూడా పనికిరారని ధ్వజమెత్తారు. హైదరాబాద్‌లో కిడ్నాప్‌లు, ఆళ్లగడ్డలో దోపిడీలు, అమాయకుల్ని కొట్టి ఆస్తులు రాయించుకుంటారని.. ఇన్ని చేస్తున్నా భరించి ఉన్నామన్నారు. చివరికి తల్లిదండ్రుల్ని కూడా వదల్లేదని.. ఇదంతా చూస్తూ భూమా జగత్ విఖ్యాత్ ఏం చేస్తున్నారో తెలియడం లేదన్నారు. సినిమా డైలాగ్‌లు చెప్పడం కాదు.. ఒక్క పనికొచ్చే పని చేశారా అంటూ మండిపడ్డారు.

ఇంత దిగజారిపోయే పరిస్థితికి తీసుకొచ్చారని.. తల్లిదండ్రుల పరువును బజారుకు ఈడ్చారన్నారు. భూమా వారుసలమని చెప్పుకునే అర్హత ఉందా.. వారసులంటే తల్లిదండ్రుల పరువు నిలబెట్టేవాళ్లు.. పోగొట్టేవాళ్లు కాదు అన్నారు. భూమా దంపతులపై కేసు పెట్టిన గుంటూరు కు చెందిన వెంకటరామయ్య.. పెట్టించిన అఖిల ప్రియ లాయర్లు శివప్రసాద్, లింగమయ్య.. దీని వెనుక ఉన్న భార్గవరామ్ వెంటనే కేసు వెనక్కి తీసుకోకపోతే భూమా అభిమానులే ఆళ్లగడ్డ నడిబొడ్డున ఈడ్చి కొట్టాల్సింది వస్తుంది అన్నారు. అంతేకాదు భూమా కిషోర్ రెడ్డి 2019 ఎన్నికలకకు ముందు టీడీపీలో ఉండేవారు.. కానీ ఆ తర్వాత బీజేపీలో చేరారు. అలాగే కిషోర్ రెడ్డి, అఖిలప్రియ మధ్య విభేదాలు ఉన్నాయి.. ఆమెతో పాటూ భార్గవ్ రామ్‌పై కిషోర్ కేసు కూడా పెట్టారు.. అలాగే విగ్రహాల విషయంలో కూడా వివాదం నడిచింది.