కూతురి పేరుతో రోడ్డు...ఆ పనుల్లో కూలీలుగా మారిన తల్లిదండ్రులు

పేదరికంలో పుడితే పేదరికంలోనే చచ్చేవారి సంఖ్య మన దేశంలో ఎక్కువ. పేదరికంలో పుట్టి ఉన్నతశిఖరాలకు అధిరోహించిన వారిని వేళ్లపై లెక్కపెట్టవచ్చు. భారత దేశంలో పేదరికం ఏ స్థాయిలో ఉందో తెలియజేసే మరో ఘటన వెలుగులోకి వచ్చింది. ఆమె పేరు మీదే రోడ్డు నిర్మించే స్థాయిలో కూతురుకు పేరు వచ్చింది.. దౌర్భాగ్యం ఏమిటంటే.. ప్రభుత్వం నిర్మిస్తున్న ఆ రోడ్డు పనుల్లో ఆమె తల్లిదండ్రులే కూలీలుగా చేరారు. నిజానికి తమ కడుపున పుట్టిన పిల్లలు మంచి స్థాయికి ఎదగాలని తల్లిదండ్రులు ఎంతో కష్డపడతారు. పిల్లలు ఆ స్థాయికి వచ్చిన తర్వాత తల్లిదండ్రులు అన్నేళ్లు పడిన కష్టాలను మరిచిపోతారు. ఇలాగే జార్ఖండ్‌లో ఓ కుటుంబం తమ కూతురు సాధించిన ఘనతకు పొంగి పోతున్నారు. కానీ వారి కష్టాల నుంచి ఇంకా గట్టెక్క లేదు.

క్రీడా రంగంలో అష్టమ్ ఒరాన్.. పేరు తెలియని వారుండరు. మహిళల ఫిఫా ప్రపంచకప్‌లో భారత జట్టుకు నాయకత్వం వహించిన జార్ఖండ్ యువతి. పూట గడవడమే కష్టంగా ఉండే పేదల ఇంట్లో పుట్టింది. అత్యంత పేదరికంలోనే ఎంతో పట్టుదలగా తన కలను సాకారం చేసుకుంది. ఎంత కష్టమైనా సరే ఫుట్‌ బాల్ నేర్చుకుని.. ఆ రంగంలో సత్తా చాటుకుంది. ఆమె పేరు దేశమంతా మారుమోగిపోతుంది. నేడు తన పేరు మీదే ఓ రోడ్డును నిర్మించే స్థాయికి చేరుకుంది.

కానీ ఏం లాభం.. ఆమె కుటుంబ కష్టాలు మాత్రం తీరలేదు. అష్టమ్ ఒరాన్ పేరు మీద నిర్మిస్తున్న రోడ్డు పనుల్లో ఆమె తల్లిదండ్రులే కూలీలుగా మారారు. రోజు కూలీ కింద వారు రూ.250 చొప్పున తీసుకున్నారు. గుమ్లా జిల్లాలోని మారుమూల గ్రామమైన బనారిగోర టోలి గ్రామంలోని అష్టమ్ ఇంటి వరకు ప్రభుత్వం రహదారిని నిర్మిస్తున్నారు. ఆ పనుల్లో ఆమె తల్లిదండ్రులు కూలీలుగా పనిచేస్తున్నారు. ఇదేంటని ప్రశ్నిస్తే.. పొట్టపోసుకోవడానికి తప్పడం లేదని అష్టన్ ఒరాన్ తల్లిదండ్రులు చెప్పారు.

ఇంకా విచిత్రమేమిటంటే అష్టమ్ అక్క, చెల్లెళ్లు కూడా క్రీడాకారులే. అష్టమ్ అక్క సుమీనా ఓరాన్ జాతీయ స్థాయి డిస్కస్ త్రో అథ్లెట్. చెల్లెలు అల్కా ఇంద్వార్ అండర్ 16 ఫుట్‌బాల్ జట్టు క్రీడాకారిణి. తమ్ముడు చదువుకుంటున్నాడు. కుటుంబంలో పిల్లలు మంచి క్రీడాకారులుగా ఎదిగారు కానీ.. వారి కుటుంబ ఆర్థిక స్థితిలో మాత్రం ఏ మాత్రం మార్పు రాలేదు. దాంతో వారికీ కష్టాలు తప్పడం లేదు. మరోవైపు అష్టమ్ తల్లిదండ్రులు ఆ రోడ్డు నిర్మాణంలో కూలి పనులు చేస్తున్న సంగతి తనకు తెలియదని గుమ్లా డిప్యూటీ కమిషనర్ సుశాంత్ గౌరవ్ అన్నారు. తమ బిడ్డలకు మంచి ఉద్యోగం వచ్చినప్పుడు.. కూలీ పనులు చేయడం మానేస్తామని అష్టమ్ తల్లిదండ్రులు చెబుతున్నారు.