ఐనాక్స్ థియేటర్లను ప్రారంభించిన మంత్రి అమర్నాథ్
Andhra Pradesh Telugu | Suryaa Desk | Published : Fri, Oct 28, 2022, 07:24 PM
గాజువాకలోని సీఎంఆర్ కాంప్లెక్స్ లో నెలకొల్పిన ఐనాక్స్ థియేటర్లను రాష్ట్ర పరిశ్రమల శాఖ మంత్రి గుడివాడ అమర్నాథ్ శుక్రవారం ప్రారంభించారు. సీఎంఆర్ కాంప్లెక్స్ లోని మూడో ఫ్లోర్ లో ఉన్న ఐనాక్స్ స్క్రీన్ 1, 2, 3 లను ఆయన ప్రారంభించారు. ఈ సందర్భంగా ఆయన మాట్లాడుతూ.. శరవేగంగా అభివృద్ధి చెందుతున్న గాజువాక పట్టణంలో ఇప్పటికే పలు ఇంటర్నేషనల్ సంస్థలు తమ కార్యకలాపాలను ప్రారంభించాయని, ఇప్పుడు ఐనాక్స్ థియేటర్స్ కూడా గాజువాక ప్రజలకు అందుబాటులోకి రావడం హర్షనీయమని ఆయన అన్నారు.
ఇప్పటి వరకు గాజువాక ప్రజలు విశాఖ నగరానికి వెళ్లి ఇటువంటి స్క్రీన్లపై సినిమాలు చూడాల్సి వచ్చేదని, సీఎంఆర్లో ఐనాక్స్ థియేటర్లు అందుబాటులోకి రావడంతో ఇక్కడ ప్రజలు సుదూర ప్రాంతాలకు వెళ్లాల్సిన అవసరం లేదని మంత్రి అమర్నాథ్ చెప్పారు. ఐనాక్స్ థియేటర్లను సిఎంఆర్ షాపింగ్ కాంప్లెక్స్ లో ఏర్పాటు చేయడం పట్ల సీఎంఆర్ సంస్థ అధినేత రమణకు అమర్నాథ్ అభినందనలు తెలియజేశారు. ఈ కార్యక్రమంలో విశాఖ ఎంపీ ఎంవీవి సత్యనారాయణ, నగర మేయర్ వెంకట హరి కుమారి, ఎమ్మెల్యే తిప్పల నాగిరెడ్డి, 68 వార్డ్ ఇన్చార్జి గుడివాడ లతీష్, 72వ వార్డ్ కార్పొరేటర్ ఏజే స్టాలిన్, ఛాంబర్ ఆఫ్ కామర్స్ నాయకులు పైడా కృష్ణ ప్రసాద్, కంకటాల మల్లిక్ తదితరులు పాల్గొన్నారు.
|
|