తీర్పులే కాదు...సామాజిక బాధ్యతను గుర్తుచేస్తున్నారు

ఇటీవల కొందరు న్యాయ మూర్తులు  కీలక తీర్పులే కాదు తమ వద్దకు వచ్చిన బాధితులకు సామాజిక బాధ్యత గుర్తు చేస్తూ తమ వంతు పాత్రను పోషిస్తున్నారు.  వైవాహిక జీవితం సాఫీగా సాగడం లేదని, మనస్పర్థలతో ఇక కలిసుండలేమని భావించినవారు కోర్టు ద్వారా విడాకులు తీసుకుంటారు. అయితే, ఇలా విడాకుల కోరుకునే జంటలకు న్యాయస్థానాలు తొలుత కౌన్సిలింగ్ ఇచ్చి కలిసి సాగేందుకు ప్రయత్నాలు చేస్తాయి. ఈ ప్రయత్నాలు అన్ని వేళలా సఫలం కాకపోవచ్చు. ఏళ్లుగా విడాకుల కోసం తిరిగిన జంటలు.. మళ్లీ ఒక్కటైన సందర్భాలు ఎన్నో. తాజాగా, విడిపోవడానికి సిద్ధమైన 17 జంటలు.. న్యాయస్థానం సయోధ్యతో మనసు మార్చుకున్నాయి. ఈ ఘటన కర్ణాటకలోని ధార్వాడలో శనివారం నిర్వహించిన లోక్‌ అదాలత్‌‌లో చోటుచేసుకుంది.

ధార్వాడ్‌ ప్రాంతానికి చెందిన 17 జంటలు విడాకులు కోరుతూ లోక్ అదాలత్‌కు వచ్చారు. అయితే, ఈ జంటలను విడిపోవద్దని, కలిసి జీవించాలని న్యాయమూర్తులు, న్యాయవాదులు చెప్పి చూశారు. వారు చేసిన సంధాన ప్రయత్నాలు సఫలమై.. వారంతా కలిసి జీవించేందుకు అంగీకరించారు. అనంతరం విడాకుల కోసం చేసుకున్న అర్జీలను ఉపసంహరించుకున్నారు. విడాకుల కోసం దరఖాస్తు చేసుకున్న దంపతుల్లో కొందరు సంతానం లేని వారు ఉన్నారు. మరికొందరు తమ ఆనందం కోసం, పిల్లల భవిష్యత్తు కోసం విడాకులు తీసుకోకూడదని నిర్ణయించుకున్నారు.

లోక్ అదాలత్‌లో న్యాయమూర్తులు కె.శాంతి, నాగశ్రీ హితబోధ చేయడంతో తమ అర్జీలను ఉపసంహరించుకుంటున్నట్లు ప్రకటించారు. రెండు దశాబ్దాల పాటు న్యాయ పోరాటం చేసిన తెలుగు దంపతులు గతేడాది సుప్రీంకోర్టు ప్రధాన న్యాయమూర్తి సూచనలతో తిరిగి కలిసి కాపురం చేయడానికి అంగీకరించిన విషయం తెలిసిందే. 1998లో వివాహమైన ఈ దంపతుల్లో భర్తపై 2001లో వేధింపులకు సంబంధించి క్రిమినల్‌ కేసు దాఖలు కావడంతో ట్రయల్‌ కోర్టు 2002లో అతడికి జైలు, జరిమానా విధించింది. మహిళ అత్త, మరదలకు కూడా అదే శిక్ష విధిస్తూ తీర్పు చెప్పింంది. అనంతరం హైకోర్టుకు వెళ్లడం జైలు శిక్షను మినహాయించింది. హైకోర్టు తీర్పు సవాల్‌ చేస్తూ ఆమె సుప్రీంకోర్టును ఆశ్రయించడంతో అప్పటి చీఫ్ జస్టిస్ ఎన్వీ రమణ చేసిన సూచనలతో కేసు ఉపసంహరించుకుంది.