ఉక్రెయిన్‌‌ కు మద్దతు పలికిన బ్రిటన్...కీవ్ లో దర్శనమిచ్చిన రుషి సునాక్

ఉక్రెయిన్ కు ఎల్లపుడు మద్దతుగా ఉంటామని బ్రిటన్ ప్రధాని రుషి సునాక్ అభయమించారు. ఇదిలావుంటే ఉక్రెయిన్‌‌పై రష్యా భీకర దాడులతో  విరుచుకుపడుతున్న వేళ.. బ్రిటన్ ప్రధాని రిషి సునాక్ కీవ్‌లో హఠాత్తుగా ప్రత్యక్షమయ్యారు. ఈ సందర్భంగా యుద్ధంలో తుది వరకూ ఉక్రెయిన్‌కు తోడుగా ఉంటామని అధ్యక్షుడు వొలోడిమిర్ జెలెన్‌స్కీకి అభయమిచ్చారు. రష్యా దాడుల నుంచి ఉక్రెయిన్‌ పౌరులను, జాతీయ మౌలిక సదుపాయాలను రక్షించడంలో సహాయపడటానికి కొత్త ప్యాకేజీని అందిస్తామని సునాక్ ప్రకటించారు. స్వేచ్ఛ కోసం పోరాటం అంటే ఏంటో బ్రిటన్‌కు బాగా తెలుసన్న సునాక్.. యుద్ధ సంక్షోభం నేపథ్యంలో మేమంతా ఎల్లప్పుడూ మీకు తోడుగా ఉంటామని ట్విట్టర్‌లో స్పష్టం చేశారు.

ఉక్రెయిన్‌కు ఇప్పటికే యూకే 2.3 బిలియన్ పౌండ్ల సైనిక సహాయాన్ని అందించిందని, తన నాయకత్వంలోనూ ఎటువంటి మార్పు ఉండదని భరోసా ఇచ్చారు. బ్రిటన్ ప్రధానిగా బాధ్యతలు చేపట్టిన తర్వాత సునాక్ తన తొలి విదేశీ పర్యటనకు యుద్ధ భూమి ఉక్రెయిన్‌ను ఎంపిక చేసుకోవడం గమనార్హం. బాలిలో జరిగిన జీ20 శిఖరాగ్ర సదస్సుకు హాజరైన సునాక్.. బ్రిటన్‌కు అందరూ అండగా నిలవాలని పిలుపునిచ్చిన విషయం తెలిసిందే. సదస్సు గతవారం ముగియగా.. నాలుగు రోజుల్లోనే కీవ్‌లో బ్రిటన్ ప్రధాని పర్యటించడం విశేషం.

యూకే ప్రధానితో భేటీ అనంతరం.. సోషల్ మీడియా ద్వారా జెలెన్‌‌స్కీ ఆ వివరాలను వెల్లడించారు. రష్యాతో యుద్ధం ప్రారంభమైన తొలినాళ్లలో ఉక్రెయిన్‌, బ్రిటన్‌ మధ్య సంబంధాలు దృఢంగా ఉండేవని తెలిపారు. తాజా సమావేశంలో ఇరుదేశాలకు సంబంధించిన కీలక అంశాలను చర్చించామని పేర్కొన్నారు. అంతేకాదు, రిషి సునాక్‌కు కృత‌జ్ఞ‌త‌లు తెలిపిన జెలెన్‌స్కీ.. మీలాంటి స్నేహితులు మాపక్కనే ఉన్నందున మా విజయంపై మాకు నమ్మకం ఉందన్నారు.

‘‘యూకే ప్రధాని రిషి సునాక్‌కు ధన్యవాదాలు.. మీలాంటి స్నేహితులు మా పక్కనే ఉన్నందున మా విజయంపై మాకు నమ్మకం ఉంది.. స్వేచ్ఛ కోసం నిలబడటం అంటే ఏమిటో మన రెండు దేశాలకు తెలుసు’’ అని జెలెన్‌స్కీ ట్వీట్ చేశారు. ఇక, ఈ ఏడాది ఆగస్టులో ఉక్రెయిన్ స్వాతంత్రదినోత్సవం సందర్భంగా ఆ దేశ ప్రజలకు సునాక్ లేఖ రాస్తూ.. రష్యాను ధైర్యంగా ఎదుర్కొంటున్న మీకు యూకే ప్రజల సంపూర్ణ మద్దతు ఉంటుందని పేర్కొన్నారు.

కీవ్ పోస్ట్‌ ప్రచురించిన ఈ లేఖలో.. తాను జీవితకాల స్నేహితుడిగా ఉంటానని, ఉక్రెయిన్‌ను సంపన్నమైన, ప్రతిష్టాత్మకమైన, ముందుకు సాగే దేశంగా పునర్నిర్మించడంలో సహాయం చేస్తానని సునాక్ చెప్పారు. ‘‘రష్యా దూకుడును ఎదుర్కోవడంలో మీ దృఢమైన ధైర్యం ప్రపంచవ్యాప్తంగా శాంతియుత, స్వేచ్ఛను ఇష్టపడే వ్యక్తుల్లో ఆశలు రేకిత్తించింది.. నిరంకుశత్వం, అసమానతలతో ఎప్పటికీ విజయం సాధించలేరనే స్పష్టమైన సందేశాన్ని పంపారు’’ అని ఉక్రెయిన్లపై సునాక్ ప్రశంసలు కురిపించారు.