ఈ వయస్సులో తొడగొట్టడం అవసరమా బాబు: మంత్రి కారుమూరి నాగేశ్వరరావు

ఈ మధ్యే చంద్రబాబు కొత్తగా తొడగొట్టడం కూడా మొదలుపెట్టారని.. ఈ వయసులో అలాంటివి అవసరమా అని మంత్రి కారుమూరి నాగేశ్వరరావు ప్రశ్నించారు.  ముఖ్యమంత్రి వైఎస్ జగన్మోహన్ రెడ్డి రాష్ట్ర ప్రజల హృదయాలకు దగ్గర కావడం చూసి తెలుగు దేశం పార్టీ అధినేత చంద్రబాబునాయుడుకు పిచ్చి ముదిరిందని ఆయన వ్యాఖ్యలు చేశారు. చంద్రబాబును ఎవరైనా మెంటల్‌ ఆస్పత్రిలో చూపించాలన్నారు.

కర్నూలులో న్యాయ రాజధాని వస్తే తమ ప్రాంతం అభివృద్ధి చెందుతుందనే ఆనందంలో అక్కడి ప్రజలు ఉన్నారని.. అందుకే వాళ్లు చంద్రబాబుని అడ్డుకొని ‘గో బ్యాక్‌’ నినాదాలు చేశారని మంత్రి నాగేశ్వరరావు పేర్కొన్నారు. ఈ మధ్యే చంద్రబాబు కొత్తగా తొడగొట్టడం కూడా మొదలుపెట్టారని.. ఈ వయసులో అలాంటివి అవసరమా? అని ఎద్దేవా చేశారు. పార్టీలకు అతీతంగా సీఎం జగన్ పథకాలు అందిస్తూ ప్రజలకు చాలా దగ్గరయ్యారని.. అది చూసి చంద్రబాబుకి ఈర్ష్య, ద్వేషం పెరిగిపోయాయని దుయ్యబట్టారు. అమరావతి రాజధాని కాకపోతే.. లక్షల కోట్ల రూపాయలు పోతాయనే బెంగ చంద్రబాబుకు పట్టుకుందన్నారు.

ఈ మేరకు ఆదివారం మంత్రి నాగేశ్వరరావు మీడియాతో మాట్లాడుతూ.. చంద్రబాబు ఎక్కడికి వెళ్లినా తన భార్యను అవమానించారంటూ సింపతీ రాబట్టాలని ప్రయత్నిస్తున్నారని మండిపడ్డారు. దమ్ముంటే అసెంబ్లీ రికార్డులు వెరిఫై చేసి నిరూపించాలని సవాల్ విసిరారు. చంద్రబాబు భార్యను తప్పుగా తాము ఒక్క మాట అన్నామని నిరూపిస్తే.. రాజకీయాల నుంచి శాశ్వతంగా తప్పుకుంటానని మంత్రి నాగేశ్వరరావు సవాల్ విసిరారు. మహానుభావుడైన దివంగత ముఖ్యమంత్రి ఎన్టీఆర్‌ని క్షోభ పెట్టి, ఆయన బ్యాంక్‌ అకౌంట్లను సైతం చంద్రబాబు బ్లాక్ చేయించారని ఆగ్రహం వ్యక్తం చేశారు. అంతకుముందు బీసీ న్యాయమూర్తులకు పదవులు రాకుండా చంద్రబాబు అడ్డుకున్నారని ఆరోపించారు.

వైసీపీ ప్రభుత్వం బీసీలకు పెద్దపీట వేసిందని.. సీఎం జగన్ హయాంలో ఎంతో మంది బీసీలు రాజ్యసభకు వెళ్లారని మంత్రి నాగేశ్వరరావు తెలిపారు. మంత్రి వర్గంలోని 25 మందిలో 17 మంది బీసీ, ఎస్సీ, ఎస్టీ మైనార్టీలు మంత్రులుగా ఉన్నారని.. చంద్రబాబు హయాంలో ఎప్పుడైనా బీసీలకు ప్రాధాన్యత ఉందా? అని ప్రశ్నించారు.