టాటా ఒక జెంటిల్‌మెన్, స్కాలర్: ఎలాన్ మస్క్

టాటా ఒక జెంటిల్‌మెన్ అని, స్కాలర్ (పండితుడు) అని ట్విట్టర్ అధినేత ఎలాన్  మస్క్ కితాబిచ్చారు. టాటా.. పరిచయం అక్కర్లేని పేరు. భారత్‌లో తిరుగులేని వ్యాపార సామ్రాజ్యాన్ని నెలకొల్పిన కుటుంబం. జంషెడ్ టాటాతో మొదలైన ప్రయాణం ఇప్పుడు రతన్ టాటా వరకు దిగ్విజయంగా కొనసాగుతూ వస్తోంది. ముఖ్యంగా రతన్ టాటా.. ప్రపంచవ్యాప్తంగా మంచి గుర్తింపును సంపాదించుకున్నారు. తన వ్యాపార నిర్వహణ, మానవత్వం, వినయంపై అంతా ప్రశంసలు కురిపిస్తుంటారు. అయితే.. అపర మేధావి, ప్రపంచ కుబేరుడు, టెస్లా, స్పేస్ ఎక్స్, బోరింగ్, ట్విట్టర్ వంటి దిగ్గజ సంస్థల సీఈఓ ఎలాన్ మస్క్ కూడా టాటాను పొగడకుండా ఉండలేకపోయారు.

అయితే మస్క్.. రతన్ టాటాను పొగిడిన విషయం పాతదే. రతన్ టాటా కంపెనీ టాటా మోటార్స్ గురించి, అది ఇండియాలో ఏం చేస్తుంది అన్న దానిపై ఓ విలేకరి అడిగిన ప్రశ్నకు 2009లో మస్క్.. టాటాను ప్రశంసలతో ముంచెత్తారు. టాటా ఒక జెంటిల్‌మెన్ అని, స్కాలర్ (పండితుడు) అని కామెంట్స్ చేశారు.

2009లో చార్లీ రోజ్‌కు ఇచ్చిన ఇంటర్వ్యూలో మస్క్ కీలక వ్యాఖ్యలు చేశారు. అప్పట్లోనే తక్కువ బడ్జెట్ నానో కారు మార్కెట్లోకి వచ్చింది. ఇక ఆ సమయంలోనే ఎలక్ట్రిక్ కార్ మేకర్ టెస్లా సీఈఓ అయిన మస్క్‌ను.. ఈ టాటా మోటార్స్ గురించి, ఇండియాలో అదేం చేస్తుంది? అనే విషయమై రోజ్.. మస్క్‌ను ఒక ప్రశ్న అడిగారు. 2300 డాలర్లలోనే రతన్ టాటా కారును తీసుకొస్తున్నారు? దీని భవిష్యత్తు ఏంటి? అన్న ప్రశ్నకు సమాధానమిచ్చిన మస్క్.. ఏమన్నారంటే?

తక్కువ ధరలో కారును తీసుకొచ్చిన రతన్ టాటా నిర్ణయం ప్రశంసనీయం అన్న ఎలాన్ మస్క్.. భవిష్యత్తు కష్టంగా ఉంటుందని జోస్యం చెప్పారు. భవిష్యత్తులో ఇంధన ధరలు పెరిగిన సమయంలో ఇది ఇబ్బందికరంగా మారుతుంది .. కానీ టాటా ఆలోచనకు ప్రశంసించాల్సిందే. ఆయనో జెంటిల్‌మెన్. స్కాలర్. అని అన్నారు మస్క్. అయితే మస్క్ అన్నింటినీ ఉటంకిస్తూ ఈ వ్యాఖ్యలు చేశారు. గ్యాసోలిన్ ధరలు పెరిగినట్లయితే.. కారును కొనుగోలు చేసిన ధర కంటే.. దానిని నడిపేందుకే ఎక్కువ ఖర్చు అవుతుందని అన్నారు. అయినా ఇక్కడ మస్క్ దూర దృష్టిని మెచ్చుకోవాల్సిందే. ఎందుకంటే ఆయన అన్నట్లే.. నానో కార్లు ఇప్పుడు మనుగడలో లేవు. డిమాండ్ తగ్గిపోవడంతో 2019 నుంచే వీటి తయారీని నిలిపివేశారు. అయితే ప్రపంచంలోనే అత్యంత చౌకైన కారు ఇదే కావడం విశేషం.

ఈ ఏడాది ప్రారంభంలో నానో కార్లపై, వీటిని తీసుకొచ్చేందుకు తనకు ప్రేరణను ఇచ్చిన విషయాలపై ఇన్‌స్టాలో ఓ పోస్ట్ చేశారు రతన్ టాటా. ''నానో లాంటి వాహనాలను తయారు చేయాలన్న నాకు కోరిక వెనక ప్రేరణ ఏంటంటే.. చాలా కుటుంబాలు తరచూ తమ పిల్లలతో కలిసి స్కూటర్లపై వెళ్లడాన్ని నేను చూస్తుండేవాడిని. తల్లీతండ్రి మధ్యలో కూర్చున్న పిల్లలు నలిగిపోతున్నారేమో అని నాకు అనిపించింది. గుంతలుగా ఉండే రోడ్లపైనా వారు అలాగే ప్రయాణించడం చూసి నాకో ఆలోచన తట్టింది. ముందు మేం ద్విచక్రవాహనాలను ఎలా భద్రంగా మార్చాలనే దానిపై దృష్టిపెట్టాం. ఆ తర్వాత నాలుగు చక్రాలు ఉండి.. కిటికీలు, డోర్లు లేకుండా కేవలం బగ్గీల్లాంటి వాహనాలను రూపొందించాలనుకున్నాం. కానీ చివరకు కారునే తయారుచేయాలని నేను నిర్ణయించుకున్నా. నానో ఎప్పటికీ మన ప్రజల కోసమే'' అని రతన్ టాటా ఆ పోస్ట్‌లో రాసుకొచ్చారు. దీంతో ఆయనపై అప్పట్లో అంతా ప్రశంసలు కురిపించారు.