ఓటుపై మమకారంతో పెళ్లి ముహుర్తం మార్చుకొన్నాడు

ఓ‌టు గురించి ఉపన్యాసాలు దంచేవారు సైతం వాటిని వినియోగించడంలో అలసత్వం ప్రదర్శిస్తారు. కానీ గుజరాత్ లోని ఓ వ్యక్తి తన పెళ్లి ముహుర్తం ఓటు వేసేందుకు ఇబ్బందికలగకుండా ఉండేందుకు ఆ సమయాన్నే మార్చేసుకొన్నాడు. ఓటు వేయడాన్ని కొంతమంది అసలు పెద్ద విషయంగానే చూడరు. ఓటు వేసినా.. వేయకపోయినా ఒక్కటే అనుకుంటారు. ఓ వ్యక్తి మాత్రం ఓటు వేయడం కోసం ఏకంగా తన పెళ్లి ముహూర్తాన్నే మార్చుకున్నాడు. ఈ ఘటన గుజరాత్ అసెంబ్లీ ఎన్నికల్లో  జరిగింది. అక్కడ గురువారం తొలి విడత పోలింగ్ జరిగింది. 19 జిల్లాల్లోని 89 అసెంబ్లీ స్థానాలకు పోలింగ్ జరిగింది. 788 మంది పోటీలో నిలబడ్డారు.

అయితే ఈ పోలింగ్ సందర్భంగా అరుదైన ఘటన చోటుచేసుకుంది. ఎన్నికల రోజు పెళ్లిళ్లు చేసుకున్న జంటలు.. ఆ పెళ్లి దుస్తుల్లోనే పోలింగ్ కేంద్రాలకు వచ్చారు. అయితే తపి జిల్లాలో ఓ వరుడు ఏకంగా తన పెళ్లి సమయాన్నే మార్చుకున్నాడు. ప్రఫుల్‌బీ అనే యువకుడికి మహారాష్ట్రలో గురువారం ఉదయం పెళ్లి చేయాలని పెద్దలు నిర్ణయించారు. అదే రోజు పోలింగ్ ఉండడంతో... తన పెళ్లిని సాయంత్రానికి వాయిదా వేసుకున్నాడు. పోలింగ్ కేంద్రం వద్ద ప్రఫుల్ బీ ఓటు వేసిన తర్వాత ప్రతి ఒక్కరూ ఓటు హక్కును వినియోగించుకోవాలని పిలుపునిచ్చాడు.

అలాగే కుచ్ జిల్లాలోని భుజ్ అసెంబ్లీ నియోజక వర్గంలో గల 208 పోలింగ్ కేంద్రంలో ఓ కొత్త జంట పెళ్లి దుస్తుల్లోనే తమ ఓటు హక్కును వినియోగించుకుంది. కవిత, వైభవ్‌ వివాహం గురువారం ఘనంగా జరిగింది. అదే రోజు పోలింగ్ జరగడంతో... పెళ్లి తర్వాత ఆ జంట పెళ్లి మండపం నుంచి నేరుగా పోలింగ్‌ కేంద్రానికి వెళ్లి ఓటు వేశారు. మరో పోలింగ్ కేంద్రంలో పెళ్లి కుమార్తె తన ఓటు హక్కును వినియోగించుకుంది. పింక్ కలర్ లెహంగాతో అందంగా ముస్తాబైన పెళ్లి కుమార్తె ఓటు వేసిన.. ఫోటోలు, వీడియోలు నెట్టింట్లో వైరల్ అయ్యాయి.