శ్రీశ్రీ రవిశంకర్ కు,,,"ఎమిసరీ ఆఫ్ పీస్" అవార్డు

ప్రపంచ ప్రఖ్యాత మానవత వాది, ఆధ్యాత్మిక వేత్త, ఆర్ట్ ఆఫ్ లివింగ్ వ్యవస్థాపకుడు గురుదేవ్ శ్రీశ్రీ రవిశంకర్‌ను అమెరికాలోని ప్రతిష్టాత్మక జాతీయ మానవహక్కుల మ్యూజియం "ఎమిసరీ ఆఫ్ పీస్" (శాంతి దూత) అవార్డుతో సత్కరిచింది. ఐ స్టాండ్ ఫర్ పీస్ కార్యక్రమంలో భాగంగా రవిశంకర్ అమెరికాలో పర్యటిస్తున్నారు. ఈ నేపథ్యంలోనే అమెరికా జాతీయ మానవ హక్కుల మ్యూజియం శాంతి దూత అవార్డును ప్రదానం చేసింది. ఈ సందర్భంగా మాట్లాడిన అమెరికా జాతీయ మానవ హక్కుల మ్యూజియం డైరెక్టర్ శైలా కర్కెరా రవిశంకర్ సేవలను కొనియాడారు. ప్రపంచవ్యాప్తంగా 150 కి పైగా దేశాలలో సుదర్శన క్రియ, యోగా, ధ్యానం, ప్రాణాయామం ద్వారా కోట్లాది మందికి ఆరోగ్యాన్ని, ఆనందాన్ని అందిస్తున్నారంటూ ప్రశంసించారు. వివిధ జాతులు, వర్గాలు, దేశాల మధ్య సంఘర్షణల నివారణకు అవిశ్రాంతంగా కృషి చేస్తున్న రవిశంకర్ లాంటి మహోన్నత వ్యక్తికి ఈ ప్రత్యేకమైన అవార్డును అందించడం తమకెంతో గౌరవప్రదమని శైలా కర్కెరా పేర్కొన్నారు.

అవార్డు అందుకున్న అనంతరం శ్రీశ్రీ రవిశంకర్ తన సందేశమిచ్చారు. మనమంతా కలిసి ప్రపంచం అంతటా శాంతిని నెలకొల్పడానికి ప్రయత్నించాలని రవి శంకర్ పిలుపునిచ్చారు. వ్యక్తిగతంగా శాంతి లేకుంటే ప్రపంచ శాంతి సాధ్యం కాదన్నారు. బాహ్య ప్రపంచంలో శాంతి నెలకొనాలంటే మనం అంతరంగంలో ప్రశాంతంగా ఉండటం అవసరమని రవిశంకర్ ప్రభోదించారు.

గత నెలలో అమెరికాలోని గాంధీ ఫౌండేషన్ శ్రీశ్రీ రవిశంకర్‌కు "గాంధీ పీస్ పిలిగ్రిమ్" అవార్డును అందజేసిన విషయం తెలిసిందే. 'నేను శాంతి కోసం నిలబడతాను' (ఐ స్టాండ్ ఫర్ పీస్) అనే నినాదంతో శ్రీశ్రీ రవిశంకర్ ప్రపంచ వ్యాప్తంగా నిర్వహిస్తున్న కార్యక్రమం వచ్చే ఏడాది చివరకు వాషింగ్టన్‌లో జరుగనున్న ఉత్సవాలతో ముగియనుంది. మార్టిన్ లూథర్ కింగ్ జూనియర్ 60 సంవత్సరాల క్రితం ఐ హావ్ డ్రీమ్ అనే ఉపన్యాసం ఎక్కడ చేశారో అక్కడి నుంచే రవిశంకర్ కూడా.. ప్రపంచ శాంతికి, భిన్నత్వంలో ఏకత్వానికి, మానవాళి అంత కలసి నిలబడాలనే సందేశాన్ని ఇవ్వబోతున్నారు.