భవాని దీక్షల విరమణకు ఏర్పాట్లు పూర్తి
Andhra Pradesh Telugu | Suryaa Desk | Published : Sun, Dec 11, 2022, 08:35 PM
భవాని దీక్షల విరమణ దుర్గగుడి నిర్వాహకులు ఏర్పాటు పూర్తిచేశారు. ఇదిలావుంటే డిసెంబర్ 15 నుంచి 19 వరకూ భవాని దీక్షల విరమణ ఉంటుందని.. దుర్గగుడి ఈవో భ్రమరాంబ వెల్లడించారు. భవానీ దీక్షల విరమణకు అన్ని ఏర్పాట్లు చేశామని చెప్పారు. విరమణలకు 7లక్షల మంది భవానీ భక్తులు వస్తారని అంచనా వేస్తున్నామని.. 15వ తేదీ ఉదయం 6 గంటల నుంచి దీక్షల విరమణ ప్రారంభం అవుతుందని వివరించారు. ఈ ఏడాది కూడా 3 అగ్ని గుండాలు ఏర్పాటు చేశామని చెప్పారు. గత ఏడాది రూ.6 కోట్లు ఆదాయం వస్తే.. రూ.5 కోట్లు ఖర్చు అయ్యిందని వివరించారు.
భవానీల కోసం తాత్కాలిక షెడ్లు, కేశఖండన శాలలు ఏర్పాటు చేశామని దుర్గగుడి ఈవో భ్రమరాంబ వెల్లడించారు. వచ్చే భక్తుల రద్దీకి తగినట్లుగా రెండు క్యూ లైన్లు ఏర్పాటు చేశామన్నారు. 20 లక్షల లడ్డూలు సిద్ధం చేస్తున్నామని.. లడ్డూ విక్రయాలకు 10 కౌంటర్లు ఏర్పాటు చేస్తున్నామని చెప్పారు. సీతమ్మ పాదాలు, భవానీ ఘాట్, పున్నమి ఘాట్లలో జల్లు స్నానాలు ఏర్పాటు చేస్తున్నామని వివరించారు. భవానీల దీక్ష విరమణ తర్వాత విడిచిపెట్టే వస్త్రాల సేకరణకు కూడా ఏర్పాట్లు చేస్తున్నామని చెప్పారు. గిరి ప్రదక్షిణ చేసే వారికి ఎటువంటి ఇబ్బందులూ లేకుండా చర్యలు చేపడతామన్నారు.
|
|