సమాజ అవగాహనకు సి. ఎస్. పి కీలకం
Andhra Pradesh Telugu | Suryaa Desk | Published : Thu, Dec 29, 2022, 06:51 PM
సమాజం పట్ల బాధ్యతగల పౌరులుగా తీర్చిదిద్దేందుకు నూతన విద్యా విధానంలో కమ్యూనిటీ సర్వీసు ప్రాజెక్టు అత్యంత కీలకమైనదని కాలేజ్ డెవలప్మెంట్ కౌన్సిల్ డీన్ ఆచార్య వై. సుబ్బరాయుడు అన్నారు. గురువారం యోగి వేమన విశ్వవిద్యాలయం సివి రామన్ సైన్స్ సెమినార్ హాల్లో కమ్యూనిటీ సర్వీసు ప్రాజెక్టు కళాశాలల సమన్వయకర్తల శిక్షణ తరగతుల్లో ఆయన ప్రసంగించారు.
విద్యార్థి తన చుట్టూ ఏమి జరుగుతున్నది తెలుసుకోవాలంటే సమాజంలోకి వెళ్లాలని, అప్పుడే అవగాహన పెరుగుతుందన్నారు. సమాజంలోని సమస్యలను అర్థం చేసుకోవాలన్నా, సామాజిక సమస్యలకు పరిష్కారాలు రూపొందించాలన్నా కమ్యూనిటీ సర్వీసు ప్రాజెక్టులో పనిచేయడం అత్యంత అవసరమని అన్నారు. ప్రతి విద్యార్థి ఆరు వారాలపాటు కమ్యూనిటీ సర్వీసులో భాగస్వామ్యులు కావాలని సూచించారు.
బోర్డు ఫర్ కమ్యూనిటీ డెవలప్మెంట్ త్రు ఎడ్యుకేషన్ యూనివర్సిటీ కోఆర్డినేటర్ సంపత్ మాట్లాడుతూ విద్యార్థులను గ్రామాల అధ్యయనానికి ఎలా సంసిద్ధులను చేయాలో వివరించారు. సర్వేకు సంబంధించి సామాజిక సమస్యను ఎలా ఎంపిక చేసుకోవాలో, ప్రశ్నావళిని ఎలా రూపొందించుకోవాలో, సమాచారాన్ని ఎలా సేకరించాలో, ఎలా విశ్లేషించాలో, ప్రాజెక్టును ఎలా రాయాలో సవివరంగా తెలియజేశారు. సమన్వయకర్తల సందేహాలను నివృత్తి చేశారు.
|
|