ఆమంచికి పర్చూరు వైసిపి నేతల శుభాకాంక్షల వెల్లువ
Andhra Pradesh Telugu | Suryaa Desk | Published : Sun, Jan 01, 2023, 06:54 PM
వేటపాలెం మండలం పందిళ్ళపల్లి లోని చీరాల మాజీ ఎమ్మెల్యే ఆమంచి కృష్ణమోహన్ నివాసం వద్ద న్యూ ఇయర్ సందర్భంగా ఆదివారం సందడి వాతావరణం నెలకొంది. స్థానిక వైసిపి నేతలు, కార్యకర్తలు, ఆయన అభిమానులే కాకుండా చీరాల సబ్ రిజిస్ట్రార్ తదితర అధికారులు కూడా పెద్ద సంఖ్యలో తరలివచ్చి ఆమంచికి నూతన సంవత్సర శుభాకాంక్షలు తెలిపారు. ఇది ఒక్క ఎత్తైతే త్వరలో ఆమంచి కృష్ణమోహన్ పర్చూరు వైసిపి ఇన్చార్జిగా నియమితులు కానున్నట్లు వార్తలు వస్తున్న నేపథ్యంలో ఆ నియోజకవర్గం నుండి పార్టీ నేతలు కృష్ణమోహన్ వద్దకు క్యూ కట్టడం మరో విశేషం.
పర్చూరు ఏఎంసి చైర్మన్ జువ్వా శివరామకృష్ణ, డైరెక్టర్లు, కారంచేడు గ్రామ పార్టీ అధ్యక్షుడు యార్లగడ్డ పాపారావు, యార్లగడ్డ శ్రీకాంత్ తదితరులు ఆమంచిని కలిసిన వారిలో ఉన్నారు. ఇంకా పర్చూరు నియోజకవర్గ పరిధిలోని ఆరు మండలాలకు చెందిన పలువురు నేతలు ఆయనకు ఫోన్లో కూడా శుభాకాంక్షలు అందజేశారు. అలాగే పరుచూరు నియోజకవర్గంలో అనేక చోట్ల ఆమంచి కృష్ణమోహన్ కి నూతన సంవత్సర శుభాకాంక్షలు తెలుపుతూ ఫ్లెక్సీలు కూడా భారీ సంఖ్యలో వెలిశాయి.
|
|