ఓ ఓటరు విన్నపంతో ఖంగుతిన్న ఎమ్మెల్యే...వైరల్ అవుతున్న ఆడియో

ఓటర్లు కూడా వింతగా ఉంటారు అన్నది ఓ ఆడియో వింటే మీకు అర్థమవుతుంది. ప్రజా ప్రతినిధులకు తమ సమస్యల గురించి చెప్పి పరిష్కారం కోరడం సాధారణ విషయమే. అయితే, మహారాష్ట్రలోని ఓ ఎమ్మెల్యేకు మాత్రం ఓ యువకుడి నుంచి వింత విజ్ఞాపన వచ్చింది. ఆ విజ్ఞాపనను ఎమ్మెల్యే కొట్టి పారేయకుండా, సావధానంగా విని స్పందించడం విశేషం. సదరు యువకుడు, ఎమ్మెల్యేతో మాట్లాడుతున్న ఆడియో టేపు మహారాష్ట్రలో సోషల్ మీడియాలో వైరల్ అవుతోంది. శివసేన ఉద్ధవ్‌ ఠాక్రే వర్గానికి చెందిన కన్నాడ్‌ ఎమ్మెల్యే ఉదయ్‌ సింగ్‌ రాజ్‌పూత్‌‌కు ఫోన్ చేసిన సదరు యువకుడు పల్లెటూరు అబ్బాయిలకు పిల్లను ఇవ్వడంలేదంటూ ఆవేదన వ్యక్తం చేశాడు. అంతటితో ఆగకుండా.. తాను పెళ్లి చేసుకొనేందుకు ఓ అమ్మాయిని వెతికి పెట్టాలని కోరాడు.

ఖుల్తాబాద్‌ ప్రాంతానికి చెందిన సదరు యువకుడు శివసేన పార్టీ కార్యకర్తే కావడం విశేషం. సోమవారం (జనవరి 9) ఎమ్మెల్యే ఉదయ్ సింగ్‌ రాజ్‌పూత్‌కు ఫోన్‌ కాల్ చేసి ఇలా మాట్లాడాడు.. ‘నాకు 8, 9 ఎకరాల భూమి ఉంది. కానీ, నేను పెళ్లి చేసుకుంటానంటే ఎవరూ పిల్లను ఇవ్వట్లేదు. కన్నాడ్‌లో అమ్మాయిలు ఉన్నారు. గ్రామీణ ప్రాంతాల్లో ఇప్పుడు ఇది పెద్ద సమస్యగా మారింది’ అని చెప్పాడు. అతడి సమస్యను సావధానంగా విన్న ఎమ్మెల్యే ఉదయ్ సింగ్.. తనకు బయోడేటా పంపాలని సదరు కార్యకర్తకు సూచించారు.

‘ఆ కార్యకర్త ఆందోళన గ్రామాల్లో నెలకొన్న ఈ సమస్య తీవ్రతకు అద్దం పడుతోంది. ఇలాంటి కాల్స్‌ చాలా వస్తున్నాయి. గ్రామంలో 2 వేల మంది జనాభా ఉంటే.. వారిలో 100 నుంచి 150 మంది వరకు అవివాహిత యువకులే ఉంటున్నారు. వాళ్లకు 100 ఎకరాల భూమి ఉన్నా సరే, పెళ్లి కోసం వారికి అమ్మాయిని చూడటం కష్టంగా మారింది. పట్టణ ప్రాంతాల్లో నివసించే వారికే తమ కుమార్తెలను ఇచ్చి పెళ్లి చేయాలని కొంత మంది అమ్మాయిల తల్లిదండ్రులు భావిస్తున్నారు’ అని ఎమ్మెల్యే ఉదయ్ సింగ్ అన్నారు. మహారాష్ట్రలో స్త్రీ, పురుషుల సంఖ్యలో తారతమ్యం ఎక్కువగానే ఉంది. జాతీయ కుటుంబ ఆరోగ్య సర్వే 2021 ప్రకారం మహారాష్ట్రలో ప్రతి 1000 మంది పురుషులకు 920 మంది మహిళలు (లింగ నిష్పత్తి) మాత్రమే ఉన్నారు.