ప్రేమ కోసం ఏకంగా విమానానే బెదిరింపులతో ఆపేశారు

ఢిల్లీ నుంచి పుణే వెళ్లాల్సిన స్పైస్‌జెట్‌ విమానంలో బాంబు ఉందంటూ గుర్తు తెలియని వ్యక్తి నుంచి వచ్చిన ఫోన్‌ కాల్‌ రెండు రోజుల కిందట అలజడి సృష్టించింది. విమానాన్ని నిలిపివేసిన అధికారులు సుమారు 3 గంటల పాటు తనిఖీలు చేసి, బాంబ్ లేదని తెలిపారు. అది నకిలీ ఫోన్ కాల్ అని తేల్చారు. గురువారం రాత్రి 9.30 గంటలకు బయల్దేరాల్సిన విమానం.. ఈ ఫోన్ కాల్ కారణంగా అర్ధరాత్రి 1.30 గంటలకు బయల్దేరి వెళ్లింది. ఈ ఘటనపై అధికారులు ముమ్మర దర్యాప్తు చేయగా.. విస్తుపోయే కారణం వెలుగులోకి వచ్చింది. ఈ ఘటన వెనుక ‘లవ్ ఎట్ ఫస్ట్ సైట్’ ఉన్నట్లు తేల్చారు.

స్పైస్‌జెట్‌‌ సంస్థకు చెందిన విమానం SG-8938 గురువారం రాత్రి ఢిల్లీ నుంచి పుణే వెళ్లేందుకు సిద్ధంగా ఉండగా.. ఎయిర్‌లైన్స్ కాల్‌ సెంటర్‌కు ఓ ఫోన్‌ కాల్‌ వచ్చింది. ఆ విమానంలో బాంబు ఉందని ఆ ఫోన్ కాల్ సారాంశం. స్పైస్‌జెట్ సిబ్బంది వెంటనే సీఐఎస్‌ఎఫ్‌ కు సమాచారం అందించారు. రంగంలోకి దిగిన భద్రతా సిబ్బంది, పోలీసులు.. విమానం నుంచి ప్రయాణికులందరినీ దింపేసి, దాన్ని నిర్మానుష్య ప్రదేశానికి తీసుకెళ్లి క్షుణ్నంగా తనిఖీ చేశారు.

ఈ ఘటన జరిగిన సమయంలో విమానంలో 182 మంది ప్రయాణీకులు, క్రూ సిబ్బంది ఉన్నారు. ప్రయాణీకుల లగేజీని కూడా క్షుణ్నంగా పరిశీలించారు. ఈ తనిఖీల్లో ఎలాంటి పేలుడు పదార్థాలు లభించలేదు. దీంతో ఆ ఫోన్ కాల్ ఉత్తుత్తిదే అని తేల్చారు. ఆ తర్వాత విమానం శుక్రవారం 1.30 AM గంటల సమయంలో పుణే బయల్దేరి వెళ్లింది.

అధికారులు ఈ కేసును ఇక్కడితోనే వదిలేయలేదు. దర్యాప్తు మమ్మరం చేశారు. ఫోన్ కాల్ చేసిన వ్యక్తి బ్రిటిష్ ఎయిర్‌వేస్‌ ట్రైనీ టికెటింగ్‌ ఏజెంట్‌ అభినవ్‌ ప్రకాశ్ (24) అని గుర్తించారు. ఆ తర్వాత అతడికి పలుమార్లు ఫోన్ చేయగా స్పందించలేదు. అతడి చిరునామాను ట్రేస్ చేసి అదుపులోకి తీసుకున్నారు. విచారణలో అతడు చెప్పిన విషయం విని అవాక్కయ్యారు.

టికెటింగ్ ఏజెంట్ అభినవ్ ప్రకాశ్‌కు రాకేశ్‌, కునాల్‌ సెహ్రావత్ బాల్య మిత్రులు. రాకేశ్, కునాల్ ఇటీవల మనాలీ ట్రిప్‌కు వెళ్లారు. అక్కడ మహారాష్ట్రకు చెందిన ఇద్దరు యువతులతో వారికి పరిచయం ఏర్పడింది. చూడగానే వారితో ప్రేమలో పడ్డారు. గురువారం ఆ అమ్మాయిలిద్దరూ స్పైస్‌జెట్‌ విమానంలో పుణే వెళ్లేందుకు టికెట్‌ బుక్‌ చేసుకున్నారు. ఢిల్లీలో వారితో కాసేపు సమయం గడుపుదామని భావించారు. యువతులు ఎక్కాల్సిన విమానం ఎలాగైనా ఆలస్యంగా బయల్దేరేలా చేయాలని పథకం వేసి, అభినవ్ ప్రకాశ్ సాయం కోరారు. తన ఫ్రెండ్స్‌కు సాయం చేసేందుకు ప్రకాశ్.. బాంబు బెదిరింపు కాల్ చేశాడు.

ప్లాన్ బాగా వర్కవుట్ అయ్యింది. కునాల్, రాకేశ్ తమ గర్ల్‌ఫ్రెండ్స్‌తో కలిసి బాగా ఎంజాయ్ చేశారు. వాళ్లు బయల్దేరాల్సిన విమానాన్ని తామే నిలిపివేయించామని గర్వంగా చెప్పుకున్నారు. ఆ తర్వాత వాళ్లను ఎయిర్‌పోర్టులో దిగబెట్టి ప్రకాశ్ రూమ్‌కు వెళ్లారు. మిత్రుడి ఐడియాను ప్రశంసల్లో ముంచెత్తారు. అక్కడ ముగ్గురు కలిసి బీర్లు తెచ్చుకొని పార్టీ చేసుకున్నారు.

ప్రకాశ్‌ను పోలీసులు అరెస్టు చేసిన విషయం తెలిసి రాకేశ్, కునాల్ పరారయ్యారు. తన స్నేహితులకు ఆ అమ్మాయిలు మనాలీ ట్రిప్ వెళ్లినప్పుడు పరిచయం అయ్యారని తెలిపిన ప్రకాశ్.. ఇది ఎప్పుడు జరిగిందో మాత్రం తనకు తెలియదన్నారు. వారిద్దరినీ అరెస్ట్ చేస్తే పూర్తి వివరాలు తెలుస్తాయని పోలీసులు చెబుతున్నారు.