వాటిని ప్రాథమిక స్థాయి పాఠ్యాంశాల్లో భాగం చేయాలి: కేళర హైకోర్టు

సత్ప్రవర్తన, మర్యాదలకు సంబంధించి అంశాలను ప్రాథమిక స్థాయి పాఠ్యాంశాల్లో భాగం చేయాలని కేరళ హైకోర్టు జస్టిస్ దేవన్ రామచంద్రన్ సూచించారు. అమ్మాయిలను అనుమతి లేకుండా తాకకూడదు. అమ్మాయి లేదా మహిళ వద్దు అని చెప్పిందంటే.. వద్దు అని అర్థం. ఈ విషయాన్ని అబ్బాయిలు అర్థం చేసుకోవాలి అని ఆయన పేర్కొన్నారు లైంగిక వేధింపులకు సంబంధించిన కేసు విచారణలో భాగంగా ఈ వ్యాఖ్యలు చేశారు. విద్యార్థులకు పాఠశాల స్థాయిలోనే ఈ విషయాన్నినేర్పించాలన్నారు. సత్ప్రవర్తన, మర్యాదలకు సంబంధించి అంశాలను ప్రాథమిక స్థాయి పాఠ్యాంశాల్లో భాగం చేయాలని జస్టిస్ దేవన్ రామచంద్రన్ సూచించారు.

విద్యార్థులపై లైంగిక వేధింపుల కేసులు పెరుగుతున్నాయని, ఎక్కువగా అబ్బాయిలే ఆరోపణలు ఎదుర్కొంటున్నారని జస్టిస్ దేవన్ రామచంద్రన్ అన్నారు. ‘అమ్మాయిని లేదా స్త్రీని ఆమె సమ్మతి లేకుండా తాకకూడదని అబ్బాయిలు తెలుసుకోవాలి. వారు ‘నో’ అంటే ‘వద్దు’ అని అర్థం చేసుకోవాలి’ అని ఆయన వ్యాఖ్యానించారు.

మహిళలను గౌరవభావంతో చూడటం పాత ఫ్యాషన్ కాదు, ఇది అన్ని కాలాలల్లోనూ ఆచరించాల్సిన ధర్మం. సమాజంలో మహిళలు సగ భాగం. మిగిలిన సగ భాగానికి జన్మనిచ్చేది మహిళే. కాబట్టి సమాజం అంటే మహిలళే..

జస్టిస్ దేవన్ రామచంద్రన్

కొల్లాంలోని టీకేఎం ఇంజినీరింగ్ కాలేజీకి చెందిన ఒక అబ్బాయి వేసిన పిటిషన్‌ను పరిశీలిస్తూ జస్టిస్ దేవన్ రామచంద్రన్ ఈ వ్యాఖ్యలు చేశారు. కాలేజీకి చెందిన ఇంటర్నల్ కమిటీ అతడిపై నివేదిక సమర్పించింది. ‘అబ్బాయిలు చాలా చిన్న వయస్సు నుంచే సెక్సిస్ట్ మూస పద్ధతులతో పెరుగుతారు. సోషల్ మీడియా, సమాజంలోని కొంత మంది ప్రభావం వారిపై పడుతోంది. ఒక అమ్మాయిని, లేదా స్త్రీని గౌరవించడం, గౌరవభావంతో చూడటం పాత ఫ్యాషన్ ఎంతమాత్రం కాదు. ఇది అన్ని కాలాలల్లోనూ ఆచరించాల్సిన ధర్మం. పురుషాధిక్యపు ప్రాచీన భావనలు మారాయి, అది మరింతగా మారాలి. లింగవివక్ష ఆమోదయోగ్యం కాదు. ‘కూల్’ ఎంతమాత్రం కాదు’ అని జస్టిస్ దేవన్ అన్నారు.

జస్టిస్ దేవన్ ఈ వ్యాఖ్యలు చేస్తూ.. మధ్యయుగ ఇస్లామిక్ వేదాంతవేత్త, ఆధ్యాత్మిక రచయిత ఇబ్న్ ఖయ్యిమ్ అల్ -జౌజియా కవితను ప్రస్తావించారు. ‘సమాజంలో మహిళలు సగ భాగం. మిగిలిన సగ భాగానికి జన్మనిచ్చేది మహిళే. కాబట్టి సమాజం అంటే మహిలళే’ అని ఆయన చెప్పారు.