ఓవైపు సమ్మె...మరో వైపు సెలవులు...మొత్తంగా నాలుగు రోజులు బ్యాంకులు బంద్

ఓవైపు సమ్మె...మరో వైపు సెలవులు...మొత్తంగా నాలుగు రోజులు బ్యాంకులు బంద్ కానున్నాయి. ఈ జనవరి 30, 31 తేదీల్లో బ్యాంక్ యూనియన్లు దేశవ్యాప్త సమ్మెకు పిలుపునిచ్చాయి. దీంతో బ్యాంకులు మూతపడనున్నాయి. ఈ రెండు రోజులే కాదు.. వరుసగా 4 రోజులు బ్యాంకులు తెరుచుకోవు. అదేంటి రెండు రోజుల స్ట్రైక్ అయితే 4 రోజులు తెరుచుకోకపోవడమేంటని అనుకుంటున్నారా? ఈ సమ్మెకు ముందు రెండు రోజులు నాలుగో శనివారం, ఆదివారం కూడా వస్తుంది. దీంతో వరుసగా నాలుగు రోజులు జనవరి 28, 29, 30, 31 తేదీల్లో బ్యాంక్‌‌లు పనిచేయవన్నమాట. ఈ సమయంలో బ్యాంక్ సర్వీసులపై ఎఫెక్ట్ పడనుంది. మీకు అర్జెంట్‌గా ఆ రోజుల్లో బ్యాంక్‌ల్లో ఏదైనా పని ఉంటే.. అది ఈ శుక్రవారం లోపు చూసుకోవడం మంచిది. తర్వాత ఇబ్బంది పడి లాభం ఉండదు.

కేంద్ర ఆర్థిక మంత్రి నిర్మలా సీతారామన్ ఫిబ్రవరి 1న వార్షిక బడ్జెట్ ప్రవేశపెట్టనున్నారు. అయితే ఈ బడ్జెట్ ప్రవేశపెట్టే ముందు నాలుగు రోజలు బ్యాంకులు పనిచేయవు. బడ్జెట్‌ ప్రకటనకు ముందే.. బ్యాంక్ యూనియన్లు సమ్మె చేయాలని నిర్ణయించుకున్నాయి. ఈ నేపథ్యంలోనే సరిగ్గా జనవరి 30, 31 తేదీల్లో సమ్మెకు పిలుపునిచ్చాయి. ఇది కోట్లాది మంది బ్యాంక్ కస్టమర్లపై ప్రభావం చూపనుంది. ఏటీఎం సేవలపైనా ఎఫెక్ట్ పడే అవకాశం కనిపిస్తోంది.

సాధారణంగా బ్యాంక్ సేవలు ఈ రోజుల్లో ఆన్‌లైన్‌లోనూ లభిస్తున్నప్పటికీ అందరికీ దీనిపై అవగాహన ఉండకపోవచ్చు. ఇంకా.. కొన్ని పనుల కోసం కచ్చితంగా బ్యాంకులకు వెళ్లాల్సి వస్తుంది. అప్పుడు బ్యాంకులు పనిచేయకపోతే.. మన పనే ఆలస్యం అవుతుంటుంది. అందుకే.. బ్యాంకులు పనిచేసే రోజు చూసుకొని వెళ్లడం ఉత్తమం. ముఖ్యంగా డబ్బులు బ్యాంకులో దాచుకోవడం, ఫిక్స్‌డ్ డిపాజిట్లు వంటివాటి కోసం, లాకర్ సేవల కోసం, చెక్ క్లియరెన్స్‌లు, డ్రాఫ్ట్ మేకింగ్ వంటి పనుల కోసం బ్యాంకులకే వెళ్లాల్సి ఉంటుంది.

మరో విషయం ఏంటంటే.. జనవరి 26న కూడా బ్యాంకులకు సెలవు. ఆ రోజు రిపబ్లిక్ డే సందర్భంగా.. జాతీయ సెలవు దినం పాటిస్తారు. ఈ మధ్యలో బ్యాంకులు పనిచేసేది అంటే.. జనవరి 27 మాత్రమే. అది శుక్రవారం. తర్వాత నాలుగో శనివారం (జనవరి 28), ఆదివారం (జనవరి 29), జనవరి 30, 31 తేదీల్లో సమ్మె. దీంతో 4 రోజులు బ్యాంకు సర్వీసులకు అంతరాయం కలగనుంది. ముఖ్యంగా తన పని రోజులను 5 రోజులకు పరిమితం చేయాలని.. బ్యాంక్ ఉద్యోగులు ఎప్పటినుంచో డిమాండ్ చేస్తున్నారు. పెన్షన్ వ్యవస్థను (NPS) కూడా రద్దు చేయాలని కోరుతున్నారు. ఇంకా జీతాలు ఎప్పటినుంచో పెంచాలని డిమాండ్ చేస్తున్నారు. కొత్తగా నియామకాలను కూడా వేగవంతం చేయాలని, అన్ని ఖాళీలను భర్తీ చేయాలని అడుగుతున్నారు.