ఆ విషయంలో కేంద్రం తీరుపై ఆగ్రహం వ్యక్తంచేసిన సుప్రీంకోర్టు

తాజాగా కేంద్ర ప్రభుత్వంపై సుప్రీం కోర్టు తీవ్ర ఆగ్రహం వ్యక్తంచేసింది. దీంతో సుప్రీంకోర్టులో న్యాయమూర్తుల నియామకానికి గత డిసెంబరులో కొలీజియం చేసిన ఐదు సిఫార్సులకు త్వరలో ఆమోదం తెలుపుతామని కేంద్రం సర్వోన్నత న్యాయస్థానానికి తెలియజేసింది. జస్టిస్‌ ఎస్కే కౌల్‌, జస్టిస్‌ ఏఎస్ ఓక్‌‌ల ధర్మాసనానికి అటార్నీ జనరల్‌ (ఏజీ) ఆర్‌.వెంకటరమణి ఈ విషయాన్ని వివరించారు. ఈ సందర్భంగా హైకోర్టు న్యాయమూర్తుల పదోన్నతుల విషయంలో జరుగుతున్న జాప్యంపై ధర్మాసనం తీవ్ర అసహనం వ్యక్తం చేసింది. ‘‘ఇది చాలా తీవ్రమైన విషయం. మరీ అసౌకర్యం కలిగించే నిర్ణయం తీసుకునేలా మమ్మల్ని ప్రోత్సహించవద్దు’’ కేంద్రాన్ని హెచ్చరించింది.

గతేడాది డిసెంబరు 13న ఐదుగురు హైకోర్టు జడ్జీల పేర్లను సుప్రీంకోర్టు కొలీజియం కేంద్రానికి సిఫార్సు చేసింది. రాజస్థాన్‌ హైకోర్టు ప్రధాన న్యాయమూర్తి జస్టిస్‌ పంకజ్‌ మిట్టల్‌, పట్నా హైకోర్టు సీజే జస్టిస్‌ సంజయ్‌ కరోల్‌, మణిపుర్‌ హైకోర్టు సీజే జస్టిస్‌ పీవీ సంజయ్‌కుమార్‌, పట్నా హైకోర్టు జడ్జి జస్టిస్‌ ఎహసానుద్దీన్‌ అమానుల్లా, అలహాబాద్‌ హైకోర్టు జడ్జి జస్టిస్‌ మనోజ్‌ మిశ్రాల పేర్లు ఇందులో ఉన్నాయి. సిఫార్సులు కేంద్రం వద్ద పెండింగులో ఉండగానే.. సీజేఐ జస్టిస్‌ డీవై చంద్రచూడ్‌ నేతృత్వంలోని కొలీజియం జనవరి 31న అలహాబాద్‌ హైకోర్టు సీజే జస్టిస్‌ రాజేశ్‌ బిందాల్‌, గుజరాత్‌ హైకోర్టు సీజే జస్టిస్‌ అరవింద్‌కుమార్‌ల పేర్లను పదోన్నతుల కోసం కేంద్రానికి పంపింది.

సీజే సహా మొత్తం 34 మంది జడ్జీల నియామక సామర్థ్యం ఉన్న సుప్రీంకోర్టులో ప్రస్తుతం 27 మంది న్యాయమూర్తులు ఉన్నారు. ఈ నేపథ్యంలో కొలీజియం సిఫార్సుల ఆమోదంలో కేంద్రం చేస్తున్న జాప్యంపై సుప్రీంకోర్టు విచారణ చేపట్టింది. ‘‘డిసెంబరులో ఐదు పేర్లు సిఫార్సు చేశాం.. ఫిబ్రవరి నెల వచ్చేసింది. ఆ ఐదుగురికీ నియామక ఉత్తర్వులు పంపుతున్నట్లు మేం రికార్డు చేయవచ్చా?’’ అని ఏజీని ప్రశ్నించింది. ‘‘నాకు ఉన్న సమాచారం మేరకు.. ఆదివారం నాటికల్లా ఉత్తర్వులు జారీ కావచ్చు. దయచేసి, రికార్డు చేయవద్దు’’ అని ఏజీ సమాధానం ఇచ్చారు.

అయితే, హైకోర్టు న్యాయమూర్తుల నియామకం అంశం మాత్రం కొంతకాలం వాయిదా వేస్తున్నట్లు ఏజీ వెంకటరమణి చెప్పగా.. ఈ జాప్యం తమకు ఇబ్బందికరంగా ఉందని ధర్మాసనం వ్యాఖ్యానించింది. ‘‘ఆ ఉత్తర్వులు జారీ కాకపోతే మమ్మల్ని ఏం చేయమంటారు? మా సిఫార్సులను ఉపసంహరించుకోవాలని మీరు కోరుకొంటున్నారా? హైకోర్టులో పనిచేసేందుకు ఫలానావాళ్లు తగిన వ్యక్తులని కొలీజియం భావించాక, ప్రభుత్వం ఆ విషయాన్ని జాప్యం చేస్తూపోతే ఎలా? కొన్ని కఠినమైన నిర్ణయాలు తీసుకునే అనివార్య పరిస్థితిని మీరు కల్పిస్తున్నారు’’ అని జస్టిస్ ఎస్కే కౌల్, జస్టిస్ ఏఎస్ ఓక్‌లు అసహనం వ్యక్తం చేశారు.

ఇందులో థర్డ్‌ పార్టీ జోక్యాన్ని తాము సహించబోమని పేర్కొన్నారు.‘‘ఒక హైకోర్టు నుంచి మరో హైకోర్టుకు జరిగే బదిలీల్లో జాప్యం ఉండకూడదు. ఇందులో ప్రభుత్వ పాత్ర స్వల్పమే.. జాప్యం జరిగితే పరిపాలన, న్యాయవ్యవస్థల పరంగా అవాంఛనీయ చర్యలకు దారి తీయవచ్చు.. ఓ హైకోర్టు సీజేగా ఒకరి పేరును మేము సిఫార్సు చేశాం.. ఆ జడ్జి 19 రోజుల్లో పదవీ విరమణ చేయబోతున్నారు. ఈ జాప్యంతో ఆయన సీజేగా నియామకం పొందకుండానే రిటైర్డ్‌ కావాలని మీరు కోరుకొంటున్నారా?’’ అని ధర్మాసనం ప్రశ్నించింది.

ఈ విషయం తనకు తెలుసని, తగిన చర్య తీసుకునేలా చూస్తామని ఏజీ బదులిచ్చారు. కొన్ని పేర్లు రాత్రికి రాత్రి ఆమోదిస్తారు, మరికొన్ని జాప్యం చేస్తారు.. ఒక పద్ధతంటూ లేదంటూ ధర్మాసనం మండిపడింది. అనంతరం విచారణను ఫిబ్రవరి 13కు వాయిదా వేసింది. పిటిషనరు తరఫున సీనియర్ న్యాయవాది ప్రశాంత్‌ భూషణ్‌ వాదనలు వినిపించారు.