జగన్ ఎమ్మెల్యేగా గెలిపిస్తే.. కోటంరెడ్డి చూపించే విశ్వాసం ఇదేనా

తెలుగు దేశం పార్టీ అధినేత చంద్రబాబునాయుడును ఎమ్మెల్యే కోటంరెడ్డి కలవలేదా అని మంత్రి ఆదిమూలపు సురేష్  ప్రశ్నించారు. అడ్డంగా దొరికిపోవడం వల్లే కోటంరెడ్డి ఇలా ట్యాపింగ్ డ్రామాకు తెరతీశారని ఆరోపించారు. వార్డు మెంబర్‌గా కూడా గెలవలేని కోటంరెడ్డిని ముఖ్యమంత్రి వైఎస్ జగన్మోహన్ రెడ్డి ఎమ్మెల్యేగా గెలిపిస్తే.. ఆయన చూపించే విశ్వాసం ఇదేనా? అని దుయ్యబట్టారు. కోటంరెడ్డికి ఓ పోలీస్‌ అధికారి ఆడియో రికార్డింగ్‌ పంపించడం హాస్యాస్పదంగా ఉందన్నారు.

పార్టీ మారే ఆలోచన పెట్టుకొని.. ప్రభుత్వంపై ఇలాంటి ఆరోపణలు చేయడం ఏమాత్రం సరికాదని మంత్రి ఆదిమూలపు సురేష్ పేర్కొన్నారు. ప్రస్తుతం ప్రజలు టీడీపీని నమ్మే పరిస్థితి లేదన్నారు. ఎమ్మెల్యే పిన్నెల్లి రామకృష్ణారెడ్డి మాట్లాడుతూ.. టీడీపీ ప్రధాన కార్యదర్శి నారా లోకేష్ పాదయాత్ర అట్టర్ ప్లాప్ అయ్యిందని, అందుకే కోటంరెడ్డిని అడ్డం పెట్టుకొని ఫోన్ ట్యాపింగ్ అంటూ డైవర్ట్ పాలిటిక్స్‌కు పాల్పడుతున్నారని ఆరోపించారు. కోటంరెడ్డికి దమ్ముంటే ఆ 51 సెకన్ల ఆడియోను బయటపెట్టాలని డిమాండ్ చేశారు.

చంద్రబాబుతో కోటంరెడ్డి కుమ్మక్కై, అడ్డంగా దొరికిపోయి, ఇప్పుడు ఈ దొంగ నాటకాలు ఆడుతున్నాడని ఎమ్మెల్యే పిన్నెల్లి ఫైరయ్యారు. ఆనం రామనారాయణరెడ్డి, కోటంరెడ్డి లాంటి వాళ్లు ఎంతమంది వెళ్లినా.. పార్టీకి ఎలాంటి నష్టం జరగదన్నారు. పార్టీలో ఇలాంటి కోవర్టులు ఉంటే, సీఎం జగన్‌ కచ్చితంగా వాళ్లను బయటకు పంపుతారని స్పష్టం చేశారు. ఎవరెన్ని నాటకాలు ఆడినా.. వచ్చే ఎన్నికల్లో వైసీపీ గెలుపుని అడ్డుకోవడం ఎవరివల్లా కాదని ధీమా వ్యక్తం చేశారు.