వైషమ్యాలను మరచి,,,టర్కీకి భారత్ ఆపన్న హస్తం

క్లిష్ట సమయాల్లో వైషమ్యాలను పక్కనెట్టి భారత్ పొరుగు దేశమైన టర్కీకి అపన్నహస్తం అందించింది. ఇదిలావుంటే టర్కీ, సిరియాలను భారీ భూకంపం కుదిపేసింది. రిక్టర్ స్కేల్‌పై 7.4 తీవ్రతతో సోమవారం తెల్లవారుజామున భూకంపం సంభవించగా.. మరోసారి 7.9 తీవ్రతో భూమి కంపించింది. 24 గంటల వ్యవధిలో రిక్టర్ స్కేలుపై 6కిపైగా తీవ్రతతో మూడుసార్లు భూమి కంపించింది. దీంతో వేలాది మంది ప్రజలు ప్రాణాలు కోల్పోగా.. పెద్ద మొత్తంలో ఆస్తి నష్టం వాటిల్లింది. పెను విపత్తును ఎదుర్కొనేందుకు టర్కీ అంతర్జాతీయ సాయం కోరగా.. భారత్ వెంటనే స్పందించింది. వంద మంది సిబ్బందితో కూడిన రెండు బెటాలియన్ల ఎన్డీఆర్ఎఫ్ బలగాలతోపాటు.. శిథిలాల కింద ఎవరైనా చిక్కుకున్న వారిని గుర్తించే రెండు శునకాలను రెస్క్యూ ఆపరేషన్ కోసం భారత్ పంపిస్తోంది.

ఘజియాబాద్ నుంచి ఒకటి, కోల్‌కతా నుంచి మరొకటి చొప్పున ఎన్డీఆర్ఎఫ్ బలగాలను కేంద్రం టర్కీకి పంపిస్తోంది. ఎన్డీఆర్ఎఫ్ సిబ్బంది అక్కడ సహయక చర్యల్లో పాల్గొననున్నారు. వీరికి ఇంటర్నేషనల్ సర్టిఫికేషన్ ఉందని ఎన్డీఆర్ఎఫ్ చీఫ్ అతుల్ కర్వాల్ తెలిపారు. విపత్కర పరిస్థితుల్లో సహాయక కార్యక్రమాలు చేపట్టడం కోసం వారు తగిన శిక్షణ పొంది ఉన్నారని ఆయన చెప్పారు.

భారత్ పంపించిన ఎన్డీఆర్ఎఫ్ సిబ్బంది.. కుప్పకూలిన భవనాల శిథిలాల్లో చిక్కుకున్న వారిని గుర్తించి వెలికి తీయడంలో నిష్ణాతులు. టర్కీకి చేరుకోగానే తాము సహాయక చర్యలు చేపడతామని అతుల్ తెలిపారు. తాము పంపిస్తున్న రెండు జాగిలాలు.. శిథిలాల కింద చిక్కుకుపోయి ప్రాణాలతో ఉన్న వారిని గుర్తించేలా శిక్షణ పొందాయన్నారు. టర్కీకి పంపించడానికి వైద్య బృందాలను సైతం భారత్ సిద్ధంగా ఉంచింది. శిక్షణ పొందిన డాక్టర్లు, పారామెడికల్ సిబ్బంది, అత్యవసర మందులను టర్కీకి పంపడానికి సిద్ధంగా ఉంచామని అధికారులు తెలిపారు.

విదేశాలకు ఎన్డీఆర్ఎఫ్ బలగాలను భారత్ పంపించడం ఇది తొలిసారేం కాదు. 2011లో జపాన్‌లో భూకంపం, సునామీ, రేడియో ధార్మికత సమయంలో, 2015 నేపాల్ భూకంపం సమయంలోనూ ఎన్డీఆర్ఎఫ్ బలగాలు సహాయక చర్యల్లో పాల్గొన్నాయి. వాస్తవానికి టర్కీ పాకిస్థాన్‌కి మిత్ర దేశం. ఇటీవలి కాలంలో ఆ దేశం మరో పాకిస్థాన్‌లా వ్యవహరించింది. కశ్మీర్ విషయంలో టర్కీ పదే పదే భారత్‌ను ఇబ్బంది పెట్టేందుకు ప్రయత్నించింది. భారత్‌లో ముస్లింలపై దాడులు జరుగుతున్నాయని ఆ దేశం ఆరోపించింది. ఆర్టికల్ 370 రద్దు విషయంలో భారత్ తీరును తప్పు బట్టగా మన దేశం గట్టిగా బదులిచ్చింది. ఈ మధ్యే కశ్మీర్ విషయంలో ఓ అధికారిక కమిటీని ఏర్పాటు చేయాలని నిర్ణయించింది. కానీ ఇవేవీ పట్టించుకోకుండా టర్కీకి భారత్ ఆపన్న హస్తాన్ని అందించడం ద్వారా ‘వసుధైక కుటుంబ’ భావనను ప్రపంచానికి మరోసారి చాటిచెప్పింది.