దళారుల చేతుల్లోకి కల్యాణోత్సవ టికెట్లు,,,అధిక ధరలకు విక్రయం

తిరుమల కొండపై దళారులు పాగావేస్తున్నారు. శ్రీవారి కల్యాణోత్సవం టికెట్లు అధిక ధరలకు విక్రయించిన ఘటన కలకలం రేపుతోంది. బెంగళూరుకి చెందిన భక్తులకు రెండు కళ్యాణోత్సవం టికెట్లను రూ.28,500 విక్రయించాడు ఓ వ్యక్తి. దీంతో తాము మోసపోయామని బాధితులు టీటీడీ విజిలెన్స్ అధికారులకు ఫిర్యాదు చేశారు. అయితే.. టికెట్లు విక్రయించిన వ్యక్తి.. టీటీడీ ఉద్యోగి సిఫార్సు లేఖపై టికెట్లను పొందినట్టు తెలుస్తోంది. దీనిపై టీటీడీ సీరియస్ అయ్యింది. సిఫార్సు లేఖలతో విడుదల చేసిన కళ్యాణోత్సవం టికెట్లపై ఫోకస్ పెట్టింది.

కేవలం కల్యాణోత్సవం టికెట్లు మాత్రమే కాదు.. ఇటీవల సుపథం ఎంట్రీ టికెట్ల దందా కూడా బయటపడింది. ప్రత్యేక ప్రవేశ దర్శనం ద్వారా.. శ్రీవారిని దర్శించుకోవాలంటే రూ.300 చెల్లించాలి. దాని కోసం ముందే టికెట్లు బుక్ చేసుకోవాల్సి ఉంటుంది. కానీ.. రూ.300 విలువైన టికెట్లను అక్రమంగా ఎక్కువ ధరకు అమ్ముకొని కొందరు సొమ్ము చేసుకుంటున్నారు. అందులో TTD ఉద్యోగి కూడా ఉన్నారని ఇటీవల గుర్తించారు. ఓ ప్రైవేట్ సెక్యూరిటీ గార్డు, దళారి, టీటీడీ ఉద్యోగి కలిసి ఈ దందాను చేస్తున్నట్టు గుర్తించారు.

ఇటీవల హైదరాబాద్, విజయవాడకు చెందిన కొందరు భక్తులకు.. ప్రత్యేక ప్రవేశ దర్శనం రూ.300 ధర గల 7 టికెట్లను రూ.20 వేలకు విక్రయించారు. దీనికి సంబంధించి విజిలెన్స్ వింగ్ అధికారులకు పక్కా సమాచారం అందడంతో తనిఖీలు నిర్వహించగా.. ప్రైవేటు సెక్యూరిటీ గార్డు నాగభూషణం, దళారి నాగరాజు అడ్డంగా దొరికిపోయారు. శ్రీవారి సేవల్లో పాల్గొనాలని అనుకునే భక్తులు.. టీటీడీ అధికారిక వైబ్‌సైట్ ద్వారా మాత్రమే టికెట్లు బుక్ చేసుకోవాలని అధికారులు సూచిస్తున్నారు. మధ్యవర్తులను, దళారులను నమ్మి మోసపోవద్దని హెచ్చరిస్తున్నారు. ఎవరైనా ఇలా టికెట్లు విక్రయిస్తామని చెబితే.. తమకు సమాచారం ఇవ్వాలని సూచిస్తున్నారు.