చుట్టాలతో రక్తదానం చేపించిన వరుడు,,,నంద్యాలలో ఓ పెళ్లిలో ఆసక్తికర ఘటన

నంద్యాల జిల్లాలో జరిగిన ఓ పెళ్లి వేడుక నలుగురికి అదర్శంగా నిలిచింది. సాధారణంగా పెళ్లికి వచ్చిన చుట్టాలకు మంచి సౌకర్యాలు.. ఎలాంటి ఇబ్బందులు కలగకుండా ఏర్పాట్లు చేయటం.. పసందైన వంటకాలతో విందు భోజనం పెట్టటం చూస్తుంటాం. ఇవే కాకుండా ఈ మధ్య.. పెళ్లికి వచ్చిన చుట్టాలు బోర్ ఫీలవకుండా.. ఓ వైపు పెళ్లి తంతు జరుగుతుంటే మరోవైపు సింగింగ్‌, డ్యాన్సింగ్, మిమిక్రీ, ఆటలతో.. ఎంటర్‌టైన్‌మెంట్‌ ప్రోగ్రాంలు కూడా పెడుతున్నారు. వధూవరులను ఆశీర్వదించి.. తోచిన కానుకలు సమర్పించి తిరిగి వెళ్లే బంధువులకు రిటర్న్ గిఫ్ట్‌లు కూడా ప్లాన్ చేస్తున్నారు. ఇదంతా సర్వసాధారణంగా జరిగే కార్యక్రమాలే.. అయితే ఆంధ్రప్రదేశ్‌లో నంద్యాలలోని ఓ ఫంక్షన్ హాల్‌లో జరిగిన వివాహంలో ఆ పెళ్లివాళ్లు చేపట్టిన పని మాత్రం ప్రత్యేకతను సంతరించుకుంది. వివాహ వేడుక జరుగుతున్న ఫంక్షన్ హాల్‌లోనే రక్తదాన శిబిరం ఏర్పాటు చేశారు. వచ్చిన చుట్టాలతో రక్తదానం చేపించేందుకు ప్లాన్ చేశారు. అయితే.. వచ్చిన బంధువులతోనే రక్తదానం చేపించటం కాదు.. పెళ్లి బట్టల్లో ఉన్న వరుడు కూడా బ్లెడ్ డొనేట్ చేసి అందరికీ ఆదర్శంగా నిలిచాడు.

నంద్యాలలోని ఓ ఫంక్షన్ హాల్‌లో పెళ్లి చేసుకుంటోన్న సూర్యతేజ్ అనే వరుడు.. తన వివాహ వేడుక సందర్భంగా సమాజానికి ఏదైనా ఉపయోగపడే పని చేయ్యాలని నిశ్చయించుకున్నాడు. ఈ క్రమంలోనే వచ్చిన చుట్టాలతో రక్తదానం చేపించాలనుకున్నాడు. అందుకోసం.. ఫంక్షన్ హాల్‌లోనే రక్తదాన శిబిరం ఏర్పాటు చేశాడు. అంతేకాదు.. పెళ్లిబట్టల్లో ఉన్న సూర్యతేజ్.. రక్తదానం చేసి వచ్చిన బంధువుల్లో స్ఫూర్తి నింపాడు. రక్తదానం అనేది.. ప్రాణదానంతో సమానమంటున్నాడు సూర్యతేజ్. రక్తం సమయానికి అందక ఎంతో మంది ప్రాణాలు కోల్పోతున్నారని ఆవేదన వ్యక్తం చేశాడు. ఆపదలో ఉన్నవారికి రక్తం అదించాలనే సదుద్దేశంతోనే తన పెళ్లి వేడుకలో రక్తదాన శిబిరాన్ని ఏర్పాటు చేసినట్టు వివరించాడు.

సూర్యతేజ్ ఆలోచనకు బంధువుల నుంచి ప్రశంసలు లభించాయి. ప్రశంసలు మాత్రమే కాదు రక్తదాన శిబిరానికి విశేష స్పందన కూడా వచ్చింది. పెళ్లికి వచ్చిన చుట్టాల్లో చాలా మంది రక్తదానం చేసి.. సూర్యతేజ్ తలపెట్టిన బృహత్తర కార్యక్రమంలో భాగస్వాములయ్యారు. బంధువులు ఇచ్చిన రక్తాన్ని స్థానికి బ్లడ్ బ్యాంకుల్లో నిల్వ ఉంచి.. అత్యవసర సమయాల్లో అవసరమున్నవారికి ఉపయోగిస్తామని నిర్వాహకులు తెలిపారు.

పెళ్లిలో రక్తదానం అనే కాన్సెప్ట్‌ గురించి తెలిసి.. స్థానికుల నుంచే కాదు సోషల్ మీడియాలో కూడా సూర్యతేజ్‌పై ప్రశంసల వర్షం కురుస్తోంది. "పెళ్లికొడుకు గట్టిగానే ప్లాన్ చేశాడుగా.. చుట్టాలందరితో రక్తదానం చేపించటమనేది ఏదైతే ఉందో.. ఆ ఆలోచనే వేరే లేవల్.." అంటూ కామెంట్లు వస్తున్నాయి.