మంచు అందాలను చూసేందుకు పర్యాటకుల ఆసక్తి,,,మంచు కారణంగా పెరుగుతున్న రోడ్డు ప్రమాదాలు

మన్యంలో నెలకొన్న మంచు అందాలను చూసేందుకు పెరుగుతున్న పర్యాటకుల తాకిడితో అదే సందర్బంలో రోడ్డు ప్రమాదాలు కూడా పెరుగుతున్నాయి. విశాఖ మన్యం.. ప్రకృతి అందాలకు నెలవు. ముఖ్యంగా మంచు అందాలు పర్యాటకులను కట్టిపడేస్తాయి. అందుకే.. సూర్యోదయం సమయంలో మంచు అందాలను ఆస్వాదించేందుకు టూరిస్టులు క్యూ కడుతున్నారు. మంచు కురిసే వేళలో.. ఘాట్ రోడ్డుపై ప్రయాణానికి ఆసక్తి చూపిస్తున్నారు. అయితే.. అవే మంచు అందాలు పర్యాటకుల ప్రాణాలు తీస్తున్నాయి. మంచు కారణంగా రోడ్డు ప్రమాదాలు పెరిగి.. పర్యాటకుల ప్రాణాలు తీస్తున్నాయి. దీంతో అరకు, బొర్రా గుహలు వెళ్లేవారు జాగ్రత్తలు తీసుకోవాలని అధికారులు సూచిస్తున్నారు.

ఈ నెల ఒకటో తేదీన కర్ణాటక రాష్ట్రానికి చెందిన ముగ్గురు పర్యాటకులు మన్యం అందాలను తిలకించేందుకు వచ్చారు. డముకు సమీపంలో ఆరో నంబరు మలుపు వద్ద మంచు కారణంగా రహదారి కనిపించక.. కారు లోయలోకి దూసుకెళ్లింది. ఈ ఘటనలో ఓ పర్యాటకుడు అక్కడికక్కడే మృతి చెందాడు. ఘాట్‌ రోడ్డులో గతంలో సూచికలు, హెచ్చరిక బోర్డులు ఉండేవి. ప్రస్తుతం ఇవి చాలా చోట్ల కనుమరుగయ్యాయి. ముఖ్యంగా మలుపులు, ప్రమాదకర ప్రదేశాల వద్ద రేడియం స్టిక్కర్లతో గతంలో వీటిని ఏర్పాటు చేశారు. అలాగే రహదారి మధ్యలోనూ రేడియం గుర్తులను ఏర్పాటు చేశారు. ప్రస్తుతం ఇవి ఎక్కడా కనిపించటం లేదు. దీంతో ప్రమాదాలు ఇంకా పెరిగాయి.

మన్యంలో చలికాలంలో దట్టంగా పొగ మంచు కురుస్తుంటుంది. ముఖ్యంగా సాయంత్రం నుంచి తెల్లవారుజాము వరకు విపరీతమైన మంచు కురుస్తుంటుంది. ఈ వాతారణంలో గడిపేందుకు వచ్చే పర్యాటకులు పలు జాగ్రత్తలు తీసుకోవలసిన అవసరం ఉంది. ముఖ్యంగా రహదారిపై అవగాహన లేకపోవటం.. మంచు కారణంగా ఘాట్‌ రోడ్డు (Ghat Road) కనిపించకపోవటం మూలన ప్రమాదాలు అధికంగా జరుగుతున్నాయి. మంచు కారణంగా దగ్గరగా వస్తే గానీ మలుపులు కనిపించని పరిస్థితి ఉంటుంది. మలుపులతో ఉన్న ఘాట్‌ రోడ్డు ప్రయాణంపై అవగాహన లేనివారు ప్రమాదాలు కొనితెచ్చుకుంటున్నారు. దీంతో విహారయాత్రలు కాస్త.. విషాద యాత్రలుగా మారుతున్నాయి.