చంద్రబాబు రాష్ట్రానికి పట్టిన దరిద్రం: కన్నబాబు

చంద్రబాబుకు దేవుడు మతిమరుపు అనే వరం ఇచ్చారని వైఎస్సార్‌ కాంగ్రెస్ పార్టీ ఎమ్మెల్యే, మాజీ మంత్రి కురసాల కన్నబాబు  అన్నారు. చంద్రబాబునాయుడే రాష్ట్రానికి పట్టిన దరిద్రమని ఆయన వ్యాఖ్యానించారు. ఈ మేరకు బుధవారం కన్నబాబు మీడియాతో మాట్లాడుతూ.. చంద్రబాబుపై సీరియస్‌ కామెంట్స్‌ చేశారు. సభల్లో చంద్రబాబు ఏం మాట్లాడుతున్నారో ఆయనకే తెలియట్లేదని ఎద్దేవా చేశారు. చంద్రబాబు పూర్తిగా దిగజారి మాట్లాడుతున్నారని విమర్శించారు. 

ఇక, టీడీపీ ప్రధాన కార్యదర్శి నారా లోకేష్‌ పెద్ద ఐరన్‌ లెగ్‌ అని ప్రజలు అనుకుంటున్నారని కన్నబాబు ఎద్దేవా చేశారు. వీళ్ల ప్రచారయావతో నెల్లూరు జిల్లా కందుకూరు, గుంటూరులో అమాయకులను పొట్టనపెట్టుకున్నారనని దుయ్యబట్టారు. పుష్కరాల్లో చంద్రబాబు పబ్లిసిటీ పిచ్చికి అమాయకులు చనిపోయారని ఆరోపించారు.

ఇక, రాష్ట్రానికి వైఎస్‌ జగన్మోహన్‌ రెడ్డి ముఖ్యమంత్రి అయ్యాక.. రాష్ట్రం సస్యశ్యామలంగా ఉందని కన్నబాబు అన్నారు. సీఎం జగన్ ప్రతి పేదవాడి గుండె చప్పుడు వింటున్నారని పేర్కొన్నారు. అందుకే 2019 తర్వాత ఏ ఒక్క ఎన్నికల్లోనైనా టీడీపీ గెలిచిందా అని ప్రశ్నించారు. టీడీపీకి బలం లేకనే మిగిలిన పార్టీలను కలుపుకునేందుకు ప్రయత్నిస్తోందని ఎద్దేవా చేశారు. ఇక, పోలవరం ప్రాజెక్ట్ పూర్తి కాకపోవడానికి చంద్రబాబే కారణమని ఆరోపించారు. పోలవరం ప్రాజెక్టు గురించి మాట్లాడే హక్కు చంద్రబాబుకు లేదన్నారు. నిర్వాసితులను గాలికి వదిలేసి కాలక్షేపం చేశారన్నారు.

మరోవైపు రాష్ట్రంలో ఉద్యోగాలు ఇవ్వడం లేదంటూ ప్రభుత్వంపై దుష్ప్రచారం చేస్తున్నారని కన్నబాబు విమర్శించారు. సీఎం జగన్‌ వచ్చిన తర్వాత 6 లక్షలు ఉద్యోగాలు ఇచ్చామన్నారు. ఇక, ముఖ్యమంత్రి జగన్మోహన్ రెడ్డిని సైకో అంటూ చంద్రబాబు సంబోధించడంపై కన్నబాబు భగ్గుమన్నారు. చంద్రబాబును మించిన సైకో ఎవరూ లేరన్నారు. ప్రభుత్వంపై బురద చల్లడమే టీడీపీ అజెండా అని.. టీడీపీ తప్పుడు ప్రచారాలకు అనుకూల మీడియా సపోర్ట్‌ చేస్తోందని ఆరోపించారు.