పదిహేనేళ్లుగా పనిచేస్తున్నా గుర్తింపు లేదు....టీడీపీకి మరో సీనియర్ నేత రాజీనామా
Andhra Pradesh Telugu | Suryaa Desk | Published : Thu, Feb 16, 2023, 06:19 PM
పదిహేనేళ్లుగా పనిచేస్తున్నా గుర్తింపు లేదు అంటూ టీడీపీ రాష్ట్ర కార్యనిర్వహణ కార్యదర్శి డాక్టర్ సిపాయి సుబ్రమణ్యం తన పదవికి రాజీనామా చేస్తూ కన్నీటిపర్యంతం అయ్యారు. టీడీపీలో బీసీలకు సముచిత స్థానం కల్పించడం లేదని.. అందుకే పార్టీలో కొనసాగలేనని, టీడీపీకో దండం అంటూ రాజీనామా చేస్తున్నట్లు ప్రకటించారు. బీసీలకు టీడీపీలో ప్రాధాన్యత లేదని.. ఇకపై కూడా ఇవ్వరని, చంద్రబాబు బీసీలను మోసం చేస్తున్నారని మండిపడ్డారు.
పార్టీలో ఎంత కష్టపడి పని చేసినా బీసీలకు తగిన గౌరవం, గుర్తింపు లేదన్నారు. బడుగుల నాయకత్వం బలంగా ఉన్న నియోజకవర్గాల్లో కూడా బీసీలను ప్రోత్సహించడం లేదని.. 15 ఏళ్లపాటు టీడీపీలో పనిచేసినప్పటికీ తగిన గుర్తింపు లేదన్నారు. ఆర్గనైజింగ్ కార్యదర్శి పదవిని నామమాత్రంగా నిర్వహిస్తున్నానని.. తాను ఏ పార్టీలో చేరాలనేది నిర్ణయించుకోలేదని.. తన అనుచరులతో చర్చించిన తర్వాత ఏ రాజకీయ పార్టీలో చేరాలనే విషయంపై నిర్ణయం తీసుకుంటానని చెప్పారు.
డాక్టర్‌గా ప్రజలకు సేవలను అందించానని.. సుదీర్ఘకాలం రాజకీయాల్లో పాటు కొనసాగాలని భావిస్తున్నాను అన్నారు.
డాక్టర్ సిపాయి సుబ్రహ్మణ్యం స్వస్థలం తిరుపతి జిల్లా కాగా.. ఆయన చిరంజీవి స్థాపించిన ప్రజారాజ్యం పార్టీతో రాజకీయాల్లోకి అడుగు పెట్టారు. 2009 ఎన్నికల్లో శ్రీకాళహస్తి నుంచి ప్రజారాజ్యం అభ్యర్థిగా పోటీ చేసి ఓడిపోయారు. ఆ తర్వాత ఆయన టీడీపీలో చేరారు. టీడీపీ రాష్ట్ర కార్యనిర్వహణ కార్యదర్శి పదవిలో ఉన్నారు. ఆయన డాక్టర్ కావడంతో స్థానికంగా సేవలు అందించారు.
|
|