ఠాక్రే అభిమానులు సంయమనం పాటించాలి..ఉద్దయ్ ఠాక్రే

 ‘‘ఈసీ మోదీకి బానిస, ఇంతకు ముందు ఎప్పుడూ ఇలా జరగలేదు’’ అని శివసేన పార్టీ చీఫ్, మాజీ ముఖ్యమంత్రి ఉద్దవ్ ఠాక్రే విమర్శించారు. ఠాక్రే అభిమానులు సంయమనం పాటించాలని, వచ్చే ముంబయి మున్సిపల్ ఎన్నికలకు సిద్ధంగా ఉండాలని ఆయన పిలుపునిచ్చారు. శివసేన పార్టీ గుర్తు అయిన విల్లు, బాణం.. ఏక్‌నాథ్ షిండే వర్గానికి కేటాయిస్తూ ఎన్నికల కమిషన్ తీసుకున్న నిర్ణయంపై మహారాష్ట్ర మాజీ ముఖ్యమంత్రి ఉద్ధవ్ ఠాక్రే తీవ్రంగా స్పందించారు.  శనివారం ముంబయిలోని తమ నివాసం మాతోశ్రీ వద్ద భారీగా చేరుకున్న తమ మద్దతుదారులను ఉద్దేశించి ఉద్థవ్ ఠాక్రే మాట్లాడుతూ..

గతంలో తన తండ్రి, శివసేన వ్యవస్థాపకుడు బాల్ ఠాక్రే పార్టీని స్థాపించిన తొలినాళ్లలో కారు పైకప్పు నుంచి అనుచరులను ఉద్దేశించి మాట్లాడిన విధంగా.. శనివారం తన కారు సన్‌రూఫ్‌పై నుంచి నిలబడి ఉద్ధవ్ ప్రసంగించారు. పార్టీ గుర్తును దొంగిలించారని, దొంగలకు గుణపాఠం చెప్పాల్సిన అవసరం ఉందని ఆయన వ్యాఖ్యానించారు. బాల్ ఠాక్రే 1966లో శివసేనను ఏర్పాటుచేసి.. మహారాష్ట్ర రాజకీయాల్లో చక్రం తిప్పారు. కానీ, ఎనిమిది నెలల కిందట ఏక్‌నాథ్ షిండే తిరుగుబాటు కారణంగా శివసేనలో చీలిక ఏర్పడింది. మరోవైపు, ఈసీ నిర్ణయాన్ని తప్పుబట్టిన ఉద్దవ్ వర్గం.. ఈ వివాదం సుప్రీం కోర్టులో ఉండగా బీజేపీ ఒత్తిడి చేసి మరీ షిండే వర్గానికి అనుకూలంగా నిర్ణయం తీసుకుందని విమర్శలు గుప్పిస్తోంది. ఈసీ చర్యలను తాము సుప్రీంకోర్టులో సవాల్ చేస్తామని స్పష్టం చేసింది.

2019 మహారాష్ట్ర అసెంబ్లీ ఎన్నికల్లో శివసేన, బీజేపీ కూటమిగా ఏర్పడి మెజార్టీ స్థానాలు దక్కించుకున్నాయి. అయితే, సీఎం పదవిని చెరో రెండున్నరేళ్లు పంచుకోవాలని.. ఈ విషయంలో బీజేపీ తమకు మాటిచ్చిందని శివసేన ఎదురుతిరిగింది. దీనికి బీజేపీ అంగీకరించకపోవడంతో 30 ఏళ్ల మైత్రికి కటీఫ్ చెప్పిన శివసేన.. బద్ధ శత్రువులైన కాంగ్రెస్, ఎన్‌సీపీలతో కలిసి ప్రభుత్వాన్ని ఏర్పాటు చేసింది. దీంతో హిందుత్వ సిద్ధాంతాలపై ఉద్ధవ్ ఠాక్రే రాజీ పడటాన్ని జీర్ణించుకోలేని.. షిండే వర్గం ఎదురుతిరగటంతో భారీ మూల్యం చెల్లించాల్సి వచ్చింది.

2019 ఎన్నికల్లో శివసేన తరపున గెలిచిన 55 మంది ఎమ్మెల్యేల్లో 40 మంది షిండే వైపే ఉన్నారు. మొత్తం ఎమ్మెల్యేలకు కలిపి 47 లక్షల 82,440 ఓట్లు రాగా.. షిండే వర్గానికి చెందిన 40 మంది ఎమ్మెల్యేలకు 36, 57,327 ఓట్లు దక్కాయి. అంటే మొత్తం ఓట్లలో 76 శాతం షిండే వర్గానికి.. 12 శాతం ఓట్లు ఉద్ధవ్ థాక్రే వర్గానికి వచ్చాయి. దీంతో.. ఎన్నికల సంఘం శివసేన గుర్తు విల్లు, బాణం షిండే వర్గానికి కేటాయిస్తూ ఈ నిర్ణయాన్ని వెలువరించింది.