వచ్చే ఎన్నికల్లో మాత్రం స్వతంత్ర అభ్యర్థగానే బరిలోకి.... సీబీఐ మాజీ జేడీ వీవీ లక్ష్మీనారాయణ

వచ్చే ఎన్నికల్లో విశాఖపట్నం ఎంపీగా పోటీ చేయనున్నట్లు సీబీఐ మాజీ జేడీ వీవీ లక్ష్మీనారాయణ ప్రకటించారు. ఈ విషయంలో తన ఆలోచన విధానాన్ని ఇప్పటికే ప్రకటించానని పేర్కొన్నారు. తన ఆలోచనా విధానం నచ్చి ఏదైనా పార్టీ వస్తే వారితో చర్చలు జరపడానికి సిద్ధంగా ఉన్నట్లు వెల్లడించారు. అయితే, మన ఎన్నికల వ్యవస్థలో స్వతంత్ర అభ్యర్థిగా కూడా పోటీ చేసే అవకాశం ఉందన్నారు. ఏది ఏమైనా, తన రాజకీయ భవిష్యత్తును కాలమే నిర్ణయిస్తుందని జేడీ లక్ష్మీనారాయణ చెప్పుకొచ్చారు.

ఇదిలావుంటే ముఖ్యమంత్రి వైఎస్ జగన్మోహన్ రెడ్డి ఆస్తుల కేసు విషయంలో సీబీఐ జేడీగా లక్ష్మీనారాయణ రాష్ట్రమంతా మంచి పేరు తెచ్చుకున్నారు. ఈ కేసులో ఎంతో దూకుడుగా వ్యవహరించి నిత్యం వార్తల్లో నిలిచారు. ఈ కేసు విచారణతోనే వీవీ లక్ష్మీనారాయణ పేరు కాస్తా జేడీ లక్ష్మీనారాయణగా మారింది.

ఆపై వాలంటరీ రిటైర్మెంట్ తీసుకున్న జేడీ లక్ష్మీనారాయణ రాజకీయాల వైపు అడుగులేశారు. ప్రముఖ సినీ నటుడు పవన్ కళ్యాణ్ స్థాపించిన జనసేన పార్టీలో చేరి.. 2019 ఎన్నికల్లో విశాఖపట్నం నుంచి ఎంపీ అభ్యర్థిగా పోటీ చేశారు. ఆ ఎన్నికల్లో వైసీపీ అభ్యర్థి ఎంవీవీ సత్యనారాయణ చేతిలో ఓడిపోయారు.

ఆ తర్వాత పవన్ కళ్యాణ్ పూర్తి స్థాయి రాజకీయాలు చేయకుండా.. సినిమాలు చేసుకుంటున్నారనే కారణం చెప్పి జనసేనకు గుడ్‌‌బై చెప్పారు. అప్పటి నుంచి సామాజిక సేవ, రైతులకు అండగా నిలవడమే లక్ష్యంగా ముందుకెళతానని ప్రకటించారు. కానీ మళ్లీ ఎన్నికలు దగ్గర పడుతున్న తరుణంలో రాజకీయంగా దృష్టిసారించారు. వచ్చే ఎన్నికల్లో పోటీ చేయబోతున్నట్లు ప్రకటించారు. అయితే, ఈ సారి జేడీ లక్ష్మీనారాయణ ఏదైనా పార్టీలో చేరి పోటీ చేస్తారా.. లేక ఇండిపెండెంట్‌గా బరిలో దిగుతారా అన్నది ఆసక్తికరంగా మారింది.