పేదల ప్రభుత్వానికి, పెత్తందార్ల పార్టీకి మధ్య యుద్ధం: సీఎం జగన్

రాష్ట్రంలో పేదల ప్రభుత్వానికి, పెత్తందార్ల పార్టీకి మధ్య యుద్ధం జరుగుతుందని.. ప్రజలంతా ఆలోచన చేయాలని ముఖ్యమంత్రి వైఎస్ జగన్ మోహన్ రెడ్డి  విజ్ఞప్తి చేశారు. Tenali: 175 నియోజకవర్గాల్లో పోటీ చేసి గెలిచే ధైర్యం మీకుందా..? అని చంద్రబాబు, పవన్ కళ్యాణ్‌ను సీఎం ప్రశ్నించారు. జగన్‌ పరిపాలనలో మంచి జరిగి ఉంటే.. తోడుగా ఉండండి అని ప్రజలను కోరారు. మేనిఫెస్టోలో 98.5 శాతం హామీలను నెరవేర్చి.. మీ బిడ్డ మిమ్మల్ని ఓటు అడగటానికి ముందుకొస్తున్నాడని స్పష్టం చేశారు. తెనాలిలో నిర్వహించిన బ‌హిరంగ స‌భలో ముఖ్యమంత్రి మాట్లాడారు.

'రైతులకు ఒకే ఒక్క మాట చెబుతున్నా.. రాష్ట్రంలో ఈరోజు యుద్ధం జరుగుతుంది. రైతులను వంచించిన చంద్రబాబు ఒకవైపున ఉంటే.. రైతన్నకు అండగా ఉంటున్న మనందరి ప్రభుత్వం మరోవైపు ఉండి యుద్ధం చేస్తోంది. వచ్చే ఎన్నికల్లో కరువుతో ఫ్రెండ్‌షిప్‌ ఉన్న చంద్రబాబు.. వరుణ దేవుడి ఆశీస్సులు ఉన్న మనందరి ప్రభుత్వానికి మధ్య యుద్ధం జరుగుతోంది. గవర్నమెంట్‌ బడుల్లో పేద పిల్లలకు ఇంగ్లిష్‌ మీడియం వద్దన్న బాబుకు.. గవర్నమెంట్‌ బడుల్లో నాడు–నేడుతో రూపురేఖలు మారుస్తూ, సీబీఎస్‌ఈ ఇంగ్లిష్‌ మీడియం తీసుకువచ్చిన మీ బిడ్డ ప్రభుత్వానికి మధ్య యుద్ధం జరుగుతోంది' అని జగన్ వ్యాఖ్యానించారు.

'మేనిఫెస్టోలో 98.5 శాతం హామీలను నెరవేర్చి.. మీ బిడ్డ మిమ్మల్ని ఓటు అడగటానికి ముందుకొస్తున్నాడు. ఎమ్మెల్యేలు గడప గడపకు తిరుగుతున్నారు. అక్కా ఇవన్నీ జరిగాయా అని అడుగుతున్నారు. చిక్కటి చిరునవ్వుల మధ్య మీ ఆశీస్సులు తీసుకొని బయల్దేరుతున్నారు. అందుకే మీ బిడ్డ 175కు 175 నియోజకవర్గాలు టార్గెట్‌ అని అడుగులు వేస్తున్నాడు. నేను చంద్రబాబుకు, దత్తపుత్రుడికి సవాల్‌ విసురుతున్నా.. 175 నియోజకవర్గాలకు 175 నియోజకవర్గాలు పోటీ చేసి గెలిచే ధైర్యం మీకుందా అని సవాల్‌ విసురుతున్నా.. ఆ ధైర్యం వాళ్లకు లేదు. కారణం ఏంటంటే.. ఏ రోజూ వారి జీవితాల్లో వారు ప్రజలకు చేసిన మంచి లేదు కాబట్టే.. వారికి ధైర్యం లేదు' అని జగన్ విమర్శించారు.

'మీ బిడ్డకు ఆధైర్యం ఉంది.. మంచి చేశాం కాబట్టి ఆ మంచి చెప్పుకొని మీ బిడ్డ మళ్లీ అధికారంలోకి వస్తాడనే నమ్మకం, ధైర్యం ఉంది. ఇదీ మీ బిడ్డకు, వాళ్లకున్న తేడా. ఆలోచన చేయండి.. రాబోయే రోజుల్లో కుట్రలు ఇంకా ఎక్కువగా కనిపిస్తాయి. రాజకీయాల్లో అన్యాయాలు ఇంకా ఎక్కువగా కనిపిస్తాయి.. అన్నీ గమనించండి. నిర్ణయం తీసుకునేటప్పుడు బాగా ఆలోచన చేసి తీసుకోండి. కేవలం మీ ఇంట్లో మంచి జరిగిందా లేదా అన్నదే ప్రామాణికంగా తీసుకోండి. మీ ఇంట్లో మంచి జరిగి ఉంటే మీ బిడ్డకు మీరే సైనికులుగా తోడుగా నిలబడండి' అని స్పష్టం చేశారు.