ఈ సెక్టర్లలో పెట్టుబడులకు ఏపీలో అవకాశం.... మంత్రి గుడివాడ అమర్నాథ్

ఐటీ, అగ్రికల్చర్‌, హెల్త్‌, ఫార్మా, టూరిజం సహా పలు రంగాల్లో పెట్టుబడులకు ఉన్న అవకాశాలను గ్లోబల్ ఇన్వెస్టర్స్ సదస్సు ద్వారా తెలియజేస్తామని రాష్ట్ర ఐటీ, పరిశ్రమల శాఖ మంత్రి గుడివాడ అమర్నాథ్‌ వెల్లడించారు. ఆంధ్రప్రదేశ్‌లో పెట్టుబడులకు ఉన్న అవకాశాలను ప్రపంచానికి చెబుతామని ఆయన తెలిపారు. 14 రంగాల్లో పెట్టుబడులకు సంబంధించి ఒప్పందాలు (ఎంవోయూలు) జరుగుతాయని వెల్లడించారు. ఈ సదస్సుకు 25 దేశాలకు చెందిన ప్రతినిధులు వస్తారని పేర్కొన్నారు. రాష్ట్రంలో ఉన్న 14 సెక్టార్లను ఎంపిక చేసుకున్నట్లు చెప్పారు. ఈ మేరకు మంత్రి అమర్‌నాథ్‌ మంగళవారం మీడియాతో మాట్లాడుతూ.. మార్చి 3న ముఖ్యమంత్రి వైఎస్‌ జగన్మోహన్‌రెడ్డి గ్లోబర్ ఇన్వెస్టర్స్ సమ్మిట్‌ను ప్రారంభిస్తారని తెలిపారు. ఈ సమ్మిట్‌లో పరిశ్రమలకు సంబంధించిన ఎగ్జిబిషన్ ఉంటుందన్నారు. ఈ సందర్భంగా కొత్త ఇండస్ట్రియల్‌ పాలసీని (2023-2028) అమల్లోకి తీసుకొస్తామని పేర్కొన్నారు. ఈ సందర్భంగా ఐటీ, అగ్రికల్చర్‌, హెల్త్‌, ఫార్మా, టూరిజం సహా పలు రంగాల్లో పెట్టుబడులకు ఉన్న అవకాశాలు వివరిస్తామని వెల్లడించారు.

దేశంలోనే అతి పెద్ద సముద్ర తీరం కలిగిన రాష్ట్రంగా ఏపీ ఉందని మంత్రి అమర్నాథ్ పేర్కొన్నారు. పోర్టుల అభివృద్ధికి సంబంధించి పనులు వేగంగా జరుగుతున్నాయని తెలిపారు. ఈజ్‌ ఆఫ్‌ డూయింగ్‌ బిజినెస్‌లో ఏపీ మూడేళ్లుగా నెంబర్‌ వన్‌లో ఉందన్నారు. రాష్ట్రంలో మొట్టమొదటి సారిగా గ్లోబల్ ఇన్వెస్టర్స్ సమ్మిట్ నిర్వహిస్తున్నామని పేర్కొన్నారు. రాష్ట్రంలో ఉన్న వనరులు, మౌలిక వసతులు, సదుపాయాలు సమ్మిట్‌లో వివరిస్తామన్నారు. దేశంలో 8 శాతం ఎగుమతులు ఆంధ్రప్రదేశ్ రాష్ట్రం నుంచే జరుగుతున్నాయని చెప్పారు. దేశంలోని 11 ఇండస్ట్రియల్ కారిడర్లలో 3 ఏపీలోనే ఉన్నాయని తెలిపారు. పరిశ్రమలకు కేటాయించేందుకు 48 వేల ఎకరాల భూమి సిద్ధంగా ఉందన్నారు.

విశాఖపట్నం, అనంతపురం, తిరుపతిల్లో ఐటీ, ఎలక్ట్రానిక్ సెక్టార్‌లో 3 కాన్సెస్ట్ సిటీల ఏర్పాటు చేయాలని ప్రభుత్వం భావిస్తోందని మంత్రి అమర్నాథ్ తెలిపారు. నూతనంగా నిర్మాణం చేపట్టబోతున్న భోగాపురం ఇంటర్నేషన్ ఎయిర్‌పోర్టుకు అనుకుని 100 ఎకరాల్లో కొత్త ఐటీ పార్క్‌ను అభివృద్ధి చేయాలని కేబినెట్‌లో నిర్ణయం తీసుకున్నట్లు చెప్పారు. 3 లక్షల ఎస్‌ఎఫ్‌టీతో స్టార్టప్ టవర్‌ను కూడా నిర్మించాలని ఇటీవలే సీఎం జగన్ ఆదేశాలు జారీ చేశారన్నారు. ఇందుకు సంబంధించిన నిర్మాణ పనులను త్వరలో చేపట్టబోతున్నట్లు చెప్పారు. ఆంధ్రప్రదేశ్‌లో ప్రతి సెకన్‌కు ఒక మొబైల్ ఫోన్ తయారవుతుందని చెప్పడానికి గర్వపడుతున్నట్టుగా చెప్పారు.

ఇక, ఏపీ మారిటైం బోర్డ్ ద్వారా రూ. 15 వేల కోట్లతో పోర్టులు, ఫిషింగ్ హార్బర్లను అభివృద్ధి చేస్తున్నామని మంత్రి అమర్నాథ్ తెలిపారు. 10 పోర్టులు, 9 ఫిషింగ్ హార్బర్లతో రాష్ట్రంలో పారిశ్రామిక రంగం అభివృద్ధి చెందుతోందన్నారు. ప్రతి పోర్టుకి అనుంబంధంగా పోర్టు ఆధారిత పరిశ్రమలు అభివృద్ధి చేస్తామని చెప్పారు. ఫుడ్ ప్రాసెసింగ్‌లో కొబ్బరి ఎగుమతుల్లో ఆంధ్రప్రదేశ్ నంబర్ 1గా ఉందన్నారు. బొప్పాయి, టమాటా, మామిడి సంబంధిత ఫుడ్ ప్రాసెసింగ్ పరిశ్రమలపై దృష్టి పెట్టామని.. ఎక్కువ ఉద్యోగాలు కల్పించే టెక్స్‌టైల్‌ రంగంపై దృష్టి పెట్టామన్నారు.