ఆ ప్రేమోన్మాదికి జీవితఖైదు... జరిమానా

ప్రేమ పేరుతో్ యువతి మరణానికి కారణమైన ఓ ఉన్మాదికి తగినశాస్త్రి జరిగింది. నడిరోడ్డుపై యువతిని దారుణంగా హత్య చేసిన ప్రేమోన్మాదికి కాకినాడ కోర్టు.. జీవిత ఖైదు, జరినామా విధించింది. కాకినాడ రూరల్ కూరాడ గ్రామానికి చెందిన కాదా దేవిక (21) గత ఏడాది అక్టోబర్‌ 8న బైక్‌పై వస్తున్న సమయంలో గుబ్బల వెంకట సూర్యనారాయణ వెంబడించి కాండ్రేగుల-కూరాడ మార్గమధ్యంలో కత్తితో దాడి చేసి ఆమెను అతి కిరాతంగా హత్య చేశాడు. ఈ ఘటన అప్పట్లో రాష్ట్రవ్యాప్తంగా సంచలనంగా మారింది.

ఈ క్రమంలో ముఖ్యమంత్రి వైఎస్ జగన్మోహన్ రెడ్డి ఆదేశాలతో విచారణ చేపట్టిన పోలీసులు.. నిందితుడిని అరెస్ట్‌ చేసి చార్జ్‌షీట్‌ దాఖలు చేశారు. దేవికా మృతిపై దిగ్భ్రాంతి వ్యక్తం చేసిన సీఎం.. ఆమె కుటుంబానికి రూ.10 లక్షల ఆర్ధిక సాయాన్ని అందించారు. ఈ నేపథ్యంలో 138 రోజుల్లో విచారణ పూర్తి చేసిన కోర్టు.. నిందితుడికి జీవిత ఖైదు, జరినామా విధించింది.

ఇదిలావుంటే ప్రేమోన్మాది గుబ్బల వెంకట సూర్యనారాయణ చేతిలో హతమైన కాదా దేవికపై జరిగిన దాడి అత్యంత పాశవికమైనదని ఫోరెన్సిక్‌ నిపుణులు నిర్ధారించారు. సూర్యనారాయణ దేవిక కాలర్‌ బోన్‌లో కత్తి దింపి ఎడమ వైపునకు చీల్చేశాడు. రెండువైపులా నరకడంతో మెడలోని రక్తనాళాలు పూర్తిగా తెగిపోయాయి. దేవిక మరణానికి అదే కారణమని నిపుణులు గుర్తించారు. విచక్షణారహితంగా కత్తితో పొడుస్తుండటంతో దేవిక రెండు చేతులూ అడ్డం పెట్టి రక్షించుకునే ప్రయత్నం చేసింది. అయితే అంతకు మించిన బలంతో అతడు కత్తితో పొడవడంతో దేవిక రెండు మోచేతుల పైభాగాల్లో లోతైన గాయాలయ్యాయి. ఈ క్రమంలోనే ఆమె ఎడమ చేతి ఎముకను సూర్యనారాయణ నరికేశాడు.

దీంతో ఆమె రెండు భుజాలు శరీరం నుంచి వేరు పడ్డాయి. ఎడమ భుజానికి ఆధారమైన హ్యూమరస్‌ ఛిద్రమైంది. అక్కడి ఎముకలో సైతం కత్తి దిగింది. కత్తి నేరుగా మెడలో దించిన ఆనవాళ్లున్నాయి. దేవిక శరీరంలో మొత్తం 15 బలమైన గాయాలున్నట్టు పోస్టుమార్టం నివేదికలో పేర్కొన్నారు. తన ప్రేమను కాదందన్న అక్కసుతో మానవ మృగంలా మారిపోయిన సూర్యనారాయణ ఈ ఘాతుకానికి ఒడిగట్టాడు.